Halloo 27 - Kafa Linguistics Project

Yisaaqi Yaaqobin Diiroo

¹ Yisaaqi geenee baayeꞌi bi aafo yaamehooba, bi qaabbe bushoo Esayin ceeggiꞌi ishichiye: “Ta bushoocho!” iye. Esayiyoo eekkehe.

² Yisaaqiyoo ishichiye: “Ebeege, geeneto taane. Aata ta qitemmo gaata ariyaano taane.

³ Ebich and cooxon ne wuxaabeeti maꞌoonaa shangoonon yeshiree, kubbooch hambe. Cooxonoo wuxiree deebe.

⁴ Qitaan beechi, neen ta diiremmoyich, ta shunnaa beetoommon tunii shaawujji shuuneree, taach giddiibe” iye.

⁵ Arooba Yisaaqi bi bushoo Esayich ishin bi gettii beetaa, Ribiqi waayaa beehan. Ebich Esayi deꞌa iꞌi cooxon wuxi deeba kubbooch bi hammiichaa,

⁶ Ribiqi bi bushoo Yaaqobich ishichiyan: “Ne aabbi ne manoo Esayich,

⁷ ‘Cooxon wuxi deebi, shaawujji shuuneree, taach ne giddiitaa maachi, qitaan beebee Doono Yeeri aafoochaa neen diiribona’ ii bi gettii beetaa waayeti taane.

⁸ And ta bushoocho, neech ta gettaabeeti mooyon waayebe.

⁹ And hamiree gutte gaawe emmishee bushiishoon taach deebe. Tawoo ne aabbi shunnii beetoommon tunii shaawujjiree shuunemmi taane.

¹⁰ Aroochee qitaan beebee neen bi diiremmoyich, biich daami ne giddiitaa mame” iyan.

¹¹ Yaaqobi bi indee Ribiqich ishichiye: “Ta manoo Esayichi ashittino shokke eexone; tunebaani taacho naalloone.

¹² Taabbi taan shafeꞌi bi ariigaata, biin dawushito ta tunoon ariyemmone; ebi tunegaata, diiroon tuneyaanoon ufon ta toommooch deebemmo taane” iye.

¹³ Bi indeyoo wochaꞌa, “Ta bushoocho, ebi ufo ta toommooch tunebe. Aaxxiyaahine; ta getteton baach waayebe. Hamiree taach deebe” iyan.

¹⁴ Ebich hammii deebii bi indeech immiye. Biyoo Yisaaqi shunnii beetoommon tuniyaꞌa shaawujjaa kachiihan.

¹⁵ Aroochee kexooch beeti, bi qaabbe bushoo Esayichi gaawe tahoon deebaa, bi guuche bushoo Yaaqobich tajjiyan.

¹⁶ Emmishee gooqqoon deebaa, Yaaqobichi kishoonaa naalloo tuneti bi qettoonooch geddahan.

¹⁷ Aroochee bi qanniiti shaawi maayoonaa koshonon Yaaqobich immahan.

¹⁸ Yaaqobiyoo bi nihoo waan yechii hammiꞌi, “Taabbo!” iye. Yisaaqiyoo eekkeꞌi, “Ta bushoocho, ne koni neene?” iye.

¹⁹ Yaaqobiyoo bi nihoyich “Ta, ne gutenee bushoo Esayi taane. Ne gettetoommon tuniyaꞌa deebeto taane. Taan ne diiremmoyich, wuxaa qannaayaꞌa ta deebetoochee, eke kaama tiyi koteree mame” iye.

²⁰ Yisaaqiyoo bi bushoon “Ta bushoocho, ebi aati goora danaꞌa waanne?” iye. Yaaqobiyoo “Ne Nuggishoo Doono Yeeri taach kaatee daniiteenane” iye.

²¹ Yisaaqiyoo Yaaqobin “Ta bushoocho, ne, iberoon ta bushoo Esayi ne tunoon ta ariyemmoyich, eke hach ta waan ne giddetaa shafebona” iye.

²² Yaaqobiyoo bi nihoo Yisaaq waan giddehe. Bi nihoo bi kishoona shafeebee, “Hini qaaro Yaaqobi qaaroone; tunebaani kishoo Esayi kishoone” iye.

²³ Bi kishoo bi manoo Esayi kishoommi eechecho bi tunetoyich, Yisaaqi Yaaqobin bariiꞌi ariyaanoone. Ebich Yaaqobin diiriye.

²⁴ Yisaaqiyoo “Iberoon ta bushoo Esayi neene?” ii echehe. Yaaqobiyoo “Eeha taane” iye.

²⁵ Aroochee Yisaaqi “Eke illa ta bushoocho, neen ta diiremmoyich, wuxaꞌa qannaayaa ne deebetoochee taach ne giddiitaa mamona” iye. Yaaqobiyoo maayoon bi nihoyich giddiihe; woyinee uyoonoo deebiye. Biyoo maa uchiye.

²⁶ Aroochee bi nihoo Yisaaqi Yaaqobin, “Ta bushoocho, eke hach gidderee taan shumbe” iye.

²⁷ Yaaqobiyoo giddeꞌi shummiye. Yisaaqiyoo Yaaqobichi tahee cinnoon shiiqqeꞌi tiyii ishichii diiriye: “Ebiyoche, ta bushoo cinno Doono Yeeri diiriti budochi cinnoommone.

²⁸ Yeeri shimaajji shuxoon, showee qeemon, beshaa beshiti maayoonaa woyinee uyoonon neech imbe.

²⁹ Aageteenaꞌo neech hajjeebeete; aagetee asheenaꞌo neech goyinnebeete. Ne maneenaꞌo toommooch doonon tunebe. Ne indee shiyetinaꞌo neech yiti goyinnebeete. Neen uppimmo koniyoona uppeto tunebe; neen diirimmo koniyoona diireeto tunebe” iye.

Esayi Yisaaqin Diiree Qollo

³⁰ Yisaaqi Yaaqobin diirii bi ciichitoyee gubb, Yaaqobi bi nihoo Yisaaq waanee kechii hammiye. Bekkech areegaata, Esayi kubboochee waa giyiye.

³¹ Esayiyoo wotta shaawi maayoon qanniiꞌi bi nihoyich deebii, “Taabbo, tibe. Taan ne diiremmoyich, wuxaꞌa qanniyaa ta deebetoochee mame” iye.

³² Yisaaqiyoo “Ne koni neene?” iye. Biyoo “Ta, ne gutenee bushoo Esayi taane” iye.

³³ Yisaaqiyoo oogeton keqqiꞌi wotwotii qeweebee, “Ishigaata, shiichii wuxii bi deebiton taach maanjito konine? Ne womoyee shiichaa maaꞌa diirito taane; iberoon aroo diireeton tunemmone” iye.

³⁴ Esayi ishin bi nihoo getaa waayeꞌi, bi qaaroon oogichii tiittee eeppiye. Bi nihoonoo “Taabbo, taanoo wotta diiribe” iye.

³⁵ Yisaaqiyoo “Ne manoo maroona waaꞌi, ne diiroon deqqitone” iye.

³⁶ Esayiyoo “Yaaqobi bi getteeto tatoone. Ebina gutte wottoon taan dawushiye; shiichii ta qaabbittinoon deqqiye; and wotta taach icheshi diiroon boggiye” iye. Wotta Esayi bi nihoon “Taach ne echiiti diiroo amolla aalle?” ii echehe.

³⁷ Yisaaqiyoo wochii Esayich ishichiye: “Ebiyoche, ne toommooch biin doonjiito taane; bi maneenaꞌo bulli biich hajjeyemmoyich, maayoonaa woyinee uyoona biich abbetemmoyich diirito taane. Ta bushoocho, illa neech amoon hallibote?” iye.

³⁸ Esayiyoo bi nihoon “Taabbo, neech beeti diiree ikke baachiye? Taabbo, taanoo wotta diiribe” iye. Biyoo tiittee eeppiye.

³⁹ Yisaaqiyoo wochiꞌi ishichiye: “Ne beeyemmo, qeemi showoochee, shimaajji shuxoocheenoo wohireeshiye.

⁴⁰ Ginoona beeyemmo neene; ne manoyichoo hajjeyemmo neene. Tunebaani bi toommooch ne tiyihooba, bi waanjoon ne qettoochee duppemmo neene” iye.

Yaaqobi Labaan Waan Aasheya Hamo

⁴¹ Bi nihoo Yaaqobin bi diiritoyich, Esayi Yaaqobin shixxiye. Esayi bi mulloona “Ta nihoo and qitiya bedditone. Eefoyee gubb ta manoo Yaaqobin wuxemmo taane” ii gabiye.

⁴² Ribiqi bi qaabbe bushoo Esayi gabiti gaboon waayahan; guuche bi bushoo Yaaqobinoo ceekkiyaꞌa ishichiyan: “Ne manoo Esayi neen wuxiya bi gabitoyich and kashetone.

⁴³ Andoo ta bushoocho, neech ta gettaa beeton tuniibe. Karaan beeti ta manoo Labaan waan kaate maxxebe.

⁴⁴ Ne manoo ippo beshemmi wottoon, giisheche aaboon arooch beebe.

⁴⁵ Bi ippo beshetaa, bi toommooch ne tuniiti mooyon bi battehooba, wotteree ne woyemmoyich, wochiyemmi taane. Amoyichiye ittoshi guttoon ikke areddoon ta muccemmo?” iyan.

⁴⁶ Aroochee Ribiqi Yisaaqich “Esayi shaaggiti Hitee maacheenaꞌochi naboona beemo taach caammitone. Yaaqobiyoo wotta hini showeexi Hitee maache bushiishoo daggoochee mecheen shaaggemmo bi tunegaata, qitoo taach gaawiye” iyan.