Halloo 23 - Kafa Linguistics Project

Saari Qitoonaa Abrahami Maashee Xaaꞌoon Kemoona

¹ Saari balli hiyaa shabaatta nattaachaa,

² Kanaanee showooch beeti Qiriyaat Aribaa, ebiyoo Kebiroonaa qitiyan. Abrahami oogeton eeppii muushenehe.

³ Abrahamiyoo dubenee aafoochee tiyii hammiꞌi, Hitee asheenaꞌoyich ishichiye:

⁴ “Ta ittoshi daggooch dallaawoonaa shiqqoona taane. Ittoshi showee daggoochee maashee xaaꞌoon taach ittoshi kemaa, arooch ta mecheechi cahoon duuhona” iye.

⁵ Hiteenaꞌoo Abrahamich wochiꞌi ishichiyeete:

⁶ “No doonocho, waayebe. Ne, no daggooch ooge woraaferashoo neene. No maashee xaaꞌoochee ne shunnemmi gaawe xaaꞌooch ne mechee cahoon duuhe. Ne mechee cahoon ne duukkemmoyich koniyoona no daggoochee maashoon neech bayaache” iyeete.

⁷ Abrahamiyoo tiyii are showee asheenaꞌo tuneti Hiteenaꞌoyich yittii tiyiye.

⁸ Ishichiinoo iye: “Ta mechee cahoon ta duukkemmoyich ittoshi daaggitoyee, and illa Tsohaari bushoo Efiroonin taach qollebote.

⁹ Ebiyoo bi goyee buchi gashooch beeti, Makifeli xaqqee gofoon taach ittoshi aafoochaa bi kemmemmoyichiye. Ittoshi showee daggooch maasho taach bi beeyemmoyich, ceeni gatiyoona taach bi kemmemmoyich qollebote” iye.

¹⁰ Arooba Efirooni bi asheenaꞌo tuneti Hiteenaꞌo daggooch koteꞌi beetone. Biyoo katemeexi uxeree kellooch waaꞌi kiceeti asheenaꞌo bulli waayee beetaa, Abrahamich ishichii wochiye:

¹¹ “Ta doonocho, waayebe; goyee budonaa bi gashooch beeti xaqqee gofoonon neech immeto taane. Ta asheenaꞌo aafoochaa neech immeto taane. Ne mechee cahoon arooch duuhe” iye.

¹² Abrahamiyoo wochinnoon are asheenaꞌoyich yittii tiyiꞌi,

¹³ asheenaꞌo waayee beetaa, Efiroonin “Ta qolloon ne waayemmoyich neen qollehoye. Showee gatiyoon qocona; gijjoon ta waanee ne deqqemmona, ta mechee cahoon arooch duuhona” iye.

¹⁴ Efirooniyoo Abrahamich ishichiꞌi wochiye:

¹⁵ “Ta doonocho, waayebe. Showee gatiyoo awudde balle sheqeelee birewoo baachiye. Neennaa taannoyich ebi am beddahane? Ne mechee cahoon arooch duuhe” iye.

¹⁶ Abrahamiyoo Hiteenaꞌo aafoochaa Efirooni gettiti gatiyoon gaawiye iꞌi, aroobee giixechinaꞌochi qeellee doyoommon, awudde balle sheqeelee birewoon machoona qoccii immiye.

¹⁷ Ebiyoommi gommona Mamirichi goroochaa aabi-keyo waan beeti, Makifel beeti Efiroonichi budo, are budooch beeti xaqqee gofoonaa buchi daggooch beeti mixo bullina Abrahami hajjoo tunehe.

¹⁸ Katemee uxeree kellooch waati Hiteenaꞌo bulli aafoochaa, Abrahami hajjoo bi tuno manjiye.

¹⁹ Aroyee gubb Abrahami Kanaanee showooch, Kebirooni getteeti Mamirichi goroochaa aabi-keyo waan, Makifeli budooch beeti xaqqee gofee maacooch, bi mechee Saarichi cahoon duukkiye.

²⁰ Ebich budonaa bi daggooch beeti xaqqee gofoona, maasho bi tunemmoyich, Hitee asheenaꞌo Abrahamich bi hajjoo tunii guudiiheete.