Halloo 18 - Kafa Linguistics Project

Abrahami Bushoon Shiyemmo Tuno Gibenikkeyoo

¹ Ikke areddoon, aabee qellayooch Abrahami Mamirichi goree gaꞌooch beeti, bi duukkaanee gaaddaafooch koteꞌi bi beetaa, Doono Yeeri biich bekkehe.

² Abrahamiyoo kaama ciinniꞌi, keejje asheenaꞌo bi ciinooch neexee beetinaꞌon beeggiye. Boonoshin beeggiꞌi, bi duukkaanoochee boonoshi beetooch wocona hammiye; showooch guufeꞌi boonoshin diggiihe.

³ Ishichiinoo iye: “Ta doonocho, ne aafoochaa gidoo daneto ta tunegaata, ‘Ne guuno taan beshe hammaahine’ iyaa neen qollehoye.

⁴ Hini michi yiirooch kote kashebote. Giisheche aaco waataa ittoshi baatoon machebote.

⁵ Ittoshi guuno ta waan waato ittoshine. Ebich ittoshin bi kupphiyemmoyich, giisheche maayoon ta deebaa mamote. Aroyee gubb hammemmo ittoshine” iye. Boonoshiyoo “Gaawiye; ne gettetoommon tuniibe” iyeete.

⁶ Ebich Abrahami afaafinoona Saari beeti duukkaanooch giyiye. Saarichoo “Eke kaateree gaawe qacini buddinoochee keejje qeelloon kichi xiriꞌiree koshon kachiibe” iye.

⁷ Aroochee Abrahami bi miimo beetooch wocona hammii, bariyee gubbenoon deebii bi gaddiretoyich immiye; biyoo bekkech kaatee bashiꞌi, kachii qanniihe.

⁸ Abrahamiyoo gurimoonaa xalle ejjoonon, ebi qanniti meenonoo deebii iibbeenaꞌoyich giddiihe. Boonoshi maa beetaa, Abrahami are michi yiirooch boonoshi aafooch neexee beehe.

⁹ Boonoshiyoo Abrahamin “Ne mechee Saari aayane?” ii echeheete. Abrahamiyoo “Okk duukkaanee maaciye bi beeto” iye.

¹⁰ Ebi iibbeenaꞌoochee ikkoo Abrahamich, “Waabeeti natooch ebi goora iberoon ne waan wotteree woyemmo taane; ne mechee Saariyoo anaami bushoon shiyemmine” iye. Saariyoo biyee gubb beeti duukkaanee kellooch beechaa, ishi yibbaatoon ellaa beehan.

¹¹ Abrahaminaa Saarina geenaa baayetinaꞌone; maacheenaꞌoyich tuneebeeti doyoo bi waanee echee yagitone.

¹² Ebich Saari “Hini geenee baayeti ta, anaamona dano taan emirikkehe? Wotta ta doonoo oogeton geenetone” iyaa bi mulloona gabaꞌa miiccahan.

¹³ Arooba Doono Yeeri Abrahamich ishichiye: “Saari ‘Geenaa baayeti ta, iberoon bushoon shiyehota?’ iyaa, amoyich miiccahane?

¹⁴ Iberoon Doono Yeerin mawemmi mooyo beete? Waabeeti natooch ebi goora ne waan wotteree woyemmo taane; Saari anaami bushoon shiyemmine” iye.

¹⁵ Saariyoo bi shattetoyich, “Miicaane taane” iyaa nookkahan. Tunebaani aroo “Iberoon miicceti neene” iye.

Abrahami Sodoomich Doono Yeerin Qollo

¹⁶ Ebiyee gubb, asheenaꞌo aroochee tiyii qaxiriyeete. Hammii, Sodoomi dugilla ciicheebeeti xaaꞌooch shaggiyeete. Abrahamiyoo boonoshin deenna tookkii hammitone.

¹⁷ Hammii boonoshi beetaa, Doono Yeeri ishichiye: “Tuniiya ta iyaa beeton Abrahamich aachehota?

¹⁸ Abrahami shiijjeroo iberoon arichetonaa giidechi aagetoona tunemmone; showee toommeexi aageteenaꞌo bulliyoo biinna diireyemminaꞌone.

¹⁹ Kaamoonaa tate mooyonon tuniyoona ta gommon boonoshi quyemmoyich, bi bushiisheenaꞌonaa biyee gubbi shiijjereenaꞌona taach deꞌa ii beetinaꞌon bi tuniyemmoyich, biin kaacceto taane; bi bushiisheenaꞌo ebin boonoshi tuniigaata, biich ta getteti mooyo bullin tuniyemmo taane” iye.

²⁰ Doono Yeeriyoo Abrahamich ishichiye: “Sodoominaa Gomoorinochi toommooch cookeebeeti cookoo woddetone; boonoshi axaaxoo oogeton maggoone.

²¹ Ebi boonoshi mooyo ta waayetoommon, iberoo bi tunoonaa tunee bi qayonon xiishoyich, boonoshi waan kindaaniye ta beeto” iye.

²² Arooba gutte asheenaꞌo aroochee boonoshi aafoon Sodoom waan wochiꞌi qaxiriyeete. Tunetaa Abrahami Doono Yeeri aafooch neexeꞌi beehe.

²³ Abrahamiyoo giddeꞌi ishichiye: “Iberoon cadiqe ashoon axaaxechona tookki hidi aalliyenne?

²⁴ Aache cadiqe asheenaꞌo ebi katemee daggooch danegaatoche? Ebi katemooch beeti aache cadiqe asheenaꞌoyicha getiree are katemoon maaraanoon iberoon bullin hidi aalliyenne?

²⁵ Ebiyoommi gaboo ne waanee wohe! Cadiqe ashoon axaaxechona tookkii wuxoo, cadiqe ashoonaa axaaxechonochi toommooch ikkochii nalloo, ebiyoommi shuunoo ne waanee wohe! Showee toommooch beetinaꞌo bullichi Nallechi ne, dayinnetaalloon nallenne?” iye.

²⁶ Doono Yeeriyoo “Sodoom aache cadiqe asheenaꞌon ta danegaata, boonoshicha getiree arooch beetinaꞌo bullin maaremmo taane” iye.

²⁷ Abrahamiyoo wochiye; ishichiinoo iye: “Ta Doonocho, hini showoochee halleeti ta neenna tookkii yibbaateya aafoon ta kupphetoyich, taan maaribe.

²⁸ Diqqich aachoochee uuchoo shappigaatoche? Ebi shappiti uuche asheenaꞌochi naboona katemoo bullin hidi aalliyenne?” iye. “Aroochee aabbaa uuche cadiqe ashoon ta danegaata, katemoon aalliyaache” iye.

²⁹ Wotta ishichiye: “Diqqich arooch aabboo baach danegaatoche?” iye. Doono Yeeriyoo “Aabboyicha getiree, katemoon aalliyaachemmo taane” iye.

³⁰ Abrahamiyoo “Ta Doonocho, kaareyaahine. Wochinnoon getona. Diqqich shaashoo baach danegaatoche?” iye. Doono Yeeriyoo “Arooch shaashoon ta danegaata, katemoon aalliyaachemmo taane” iye.

³¹ Wochinnoon “Ta Doonocho, neenna tookkii yibbaateya aafoon ta kupphetoyich taan maaribe. Diqqich arooch hiyoo baach danegaatoche?” iye. Doono Yeeriyoo “Hiyoyicha getiree, katemoon aalliyaachemmo taane” iye.

³² Abrahamiyoo “Ta Doonocho, kaareyaahine. Ikke wottoon baach getona. Diqqich arooch aashiroo baach danegaatoche?” iye. Biyoo “Aashiroyicha geti katemoon aalliyaachemmo taane” iye.

³³ Doono Yeeriyoo Abrahamina tookkii yibbaatoon bi ciichitoyee gubb, hammiye. Abrahamiyoo bi kexooch wottehe.