Halloo 16 - Kafa Linguistics Project

Haggaarinaa Ishmaꞌeelinochi Mooyo

¹ Abraami mechee Saarayi andoo bushoon shiyaaneene. Biich Haggaari getteebeeti gonnee beehan; biyoo Gibitsee asheene.

² Ikke areddoon Saarayi Abraamich “Eke ikke mooyon neech getona. Ta shiyaachemmoyich, Doono Yeeri ta maacoon dookkitone. Ebich, ebi ta gonnee Haggaar waan gibe. Diqqich bi waanaa bushiishoo taach danemmo tunemmone” iyan.

³ Abraamiyoo bi mechee Saarayi getteton waayehe. Abraami aashire naton Kanaanee showooch bi kotetoyee gubb, bi mechee Saarayi bi gonnee, Gibitsee ashe Haggaarin mechee bi tunemmoyich, bi keno Abraamich immahan.

⁴ Abraamiyoo Haggaar waan giyiye; Haggaariyoo xifahan. Xifeti bi tunoon bi ariihooba, bi gennee Saarayin qallayiyan.

⁵ Arooba Saarayi Abraamin “Haggaari taan qallayemmoyich tuniito neene. Biin neech immeti taane; tunebaani aree xifeti bi tunoon bi ariitoyee gubb, taan qallayitine. Neennaa taanna daggooch beeti mooyon Doono Yeeri nallibe” iyan.

⁶ Abraamiyoo Saarayich, “Ebiyoche, ne gonnee ne kishoochiye bi beeto. Ne shunnemmon shuunebe” iye. Aroyee gubb Saarayi Haggaarin oogeton iritiyaa bi shewiitoyich, bi aafoochee kechaa maxxahan.

⁷ Doono Yeerichi maraakoo barahooch beeti, ikke aachi xuuphee gaꞌoochaa Haggaarina danehe. Ebi aachi xuupho beeto, Shuuri barahooch daammiibeeti gommoochiye.

⁸ Biyoo “Haane, Saarayichi gonnee Haggaare, amoochee waanne? Amoochiye ne hammaabeeto?” iye. Haggaariyoo “Ta gennee Saaray waanee aallaꞌaniye ta hammaabeeto” iyan.

⁹ Doono Yeerichi maraakoo, “Ne gennee waan wotteree hambe. Bulli mooyona biich deꞌa geti hajjeebe” iye.

¹⁰ Wotta Doono Yeerichi maraakoo biich ishichiye: “Ne shiyemmi bushoochi shiijjereenaꞌon oogichi meechemmo taane; oogeton boonoshi meettitoyich, koniyoona haddii ciichoon hakkaachemmone” iye.

¹¹ Aroochee Doono Yeerichi maraakoo daakkiꞌi, “Ebiyoche, and xifeti neene; anaami bushoonoo shiyemmi neene; Doono Yeeri iriteyaꞌa ne cookoon bi waayetoyich, bushoochi shigoon, Ishmaꞌeeli geti shigiyemmi neene.

¹² Biyoo konichona deꞌa getaani babberoo tunemmone; asho bullin shixxemmone; asho bulliyoo biin shixxemmone; bi xibeenaꞌon shixiree, boonoshiyee bariree beeyemmone” iye.

¹³ Haggaariyoo, “Iberoon taan beeggiibeeti Yeerin ta aafoona beeggaꞌa, kashoona beehote?” iyaa, biinna yibbaateti Doono Yeerin “El Rooꞌi” iyan.

¹⁴ Ebich hanaach beddaahaa asheenaꞌo Qadeeshinaa Bereedina daggooch beeti aachi oppoon, “Lahayi Rooꞌichi oppo” ii ceeggiyeete.

¹⁵ Haggaari bi gennee Saaray waan bi wottetoyee gubb, Abraamich anaami bushoon shiyahan. Abraamiyoo ebi bushoon, Ishmaꞌeeli ii shigiihe.

¹⁶ Ebi bushoo Ishmaꞌeeli shiijjehooba, Abraami shinnaa shiritte nati ashoone.