Halloo 15 - Kafa Linguistics Project

Doono Yeeri Abraamina Tookkii Wogoon Gimo

¹ Ebi mooyoyee gubb, Doono Yeeri yaaꞌoona Abraamich ishichiye: “Abraamo, shattaahine. Ta neen gaachoochoommon quyemmo taane; neech ta immemmi wojjoo oogeti woddoone” iye.

² Abraamiyoo “Nuggishoo Doono Yeero, bushaallo ta tunetoyich, taach ne immemmi mooyo taach amoon hallehe? Taach beeto bullin woraashemmo, hini Damaasiqee asho Elezeerine.

³ Taach bushoon imo ne qajjetoyich, ta gaddiretoochee ikkoo taach beeto bullin woraashemmone” iye.

⁴ Arooba Doono Yeeri wochinnoon Abraamich ishichiye: “Neech beeto bullin woraashemmo, ne gutenoochee kechemmi, ne hajjee bushoani, hini uro toonoone” iye.

⁵ Maach biin kichiꞌi, “Eke kaama shimaajj ciine; xojjeneenaꞌon haddaa ciichoon ne hakkigaata haddibe. Ebiyoommon ne shiijjereenaꞌo haddaa ciyaaneenaꞌo tunemminaꞌone” iye.

⁶ Abraamiyoo bi mulloon Doono Yeeri toommooch tooꞌiihe; ebi bi mullee tooꞌiyoo Yeeri aafoochaa biin cadiqiihe.

⁷ Aroochee Doono Yeeri Abraamich “Hini showoon ne woraashemmoyich neech imma, Kalideenaꞌo showooch beeti Uuri katemoochee neen kichiti Doono Yeeri taane” iye.

⁸ Tunebaani Abraami “Nuggishoo Doono Yeero, hini showoon woraashemmo ta tunoon amoona ariyehote?” iye.

⁹ Doono Yeeriyoo “Keejje nati gidereen, keejje nati emmisheen, keejje nati bagee baaddoon, daabbichoonaa uggoonon taach deebe” iye.

¹⁰ Abraamiyoo eboshi bullin deebii, guurii gutta kapphehe. Bi kapphetinaꞌon ciiniiꞌi, gutte xaaꞌooch kotiihe; tunebaani daabbichoonaa uggoonon kappheyaanoone.

¹¹ Arooba gaceenaꞌo ebi meenon maaya kindiyeete; tunebaani Abraami boonoshin yookkiye.

¹² Aabe giyi beddemmona, Abraamin magge tokketoo yechiye; shattiibeeti dunne manderoo bi toommooch waahe.

¹³ Arooba Doono Yeeri Abraamich ishichiye: “Ebin manjii ariibe; ne shiijjereenaꞌo ashi showooch shiqqoo tunemminaꞌone; are showeexi asheenaꞌo guunon tunii awudde balle naton boonoshin neexi hajjemminaꞌone.

¹⁴ Tunebaani guunon tuniiꞌi boonoshin hajjiibeeti asheenaꞌo toommooch nallemmo taane; aroyee gubb wodde gaannoon yeshiree are showoochee kechemminaꞌone.

¹⁵ Tunetaa ne, diggoona beeree ne qaabbechinaꞌo waan xaꞌeyemmo neene; geene baayi qitiree, duukkeyemmo neene.

¹⁶ Ne shiijjereenaꞌo hiniich wotteree boonoshi woyemmo, awuddinnee shiijjeroobaniye. Ebichi wottoon boonoshi yagemmo, hini Amooreenaꞌochi axaaxoo oogichii woddemmi wottooniye” iye.

¹⁷ Aabe giyaa xumemmona, gocheexi qaaqqee cufoonaa qaaqqee conjoona ebi kapphetaa koteti meechi gutte daggoona beshehe.

¹⁸ Arooba Doono Yeeri ishichiꞌi Abraamina tookkii wogoon giyiye: “Gibitsee aacoochee tiijjiree ooge aaco Efiraaxis beddaahaa, hini showoon ne shiijjereenaꞌoyich immemmo taane.

¹⁹ Hini ta immemmi showoo, Qeeneenaꞌocho, Qenizeenaꞌocho, Qadimoneenaꞌocho,

²⁰ Hiteenaꞌocho, Ferizeenaꞌocho, Refayeenaꞌocho,

²¹ Amooreenaꞌocho, Kanaaneenaꞌocho, Girigaasheenaꞌochonaa Yebuseenaꞌochonane” iye.