Halloo 13 - Kafa Linguistics Project

Abraaminaa Looxina Barbaroo

¹ Ebina Abraami Gibitsee kechiye; bi mecheenaa biich beeto bullinon yechiꞌi, bi hilla wotteꞌi, Negeebi barahooch hammiye. Looxiyoo biinna tookkii hammiye.

² Abraami gijjoon, birewoonaa aachoonon hajjiꞌi oogichii gaannetone.

³ Negeebi barahoochee tiyii, ikke xaaꞌoochee bare xaaꞌooch besheebee Beeteel waan, ebiyoo shiichii bi duukkaanoon bi xogiti, Beeteelinaa Aayinochi gutte daggooch beeti xaaꞌooch hammiye.

⁴ Are xaaꞌoo wotta shiichiꞌi deejjee gudoon bi shuuneti xaaꞌoone. Ebi aroochaa Abraami wochinnoon Doono Yeerich goyinnehe.

⁵ Abraamina tookkii hammiti Looxich wotta miimo, bagoonaa emmishoona, kechi ashoonaa guunona beetone.

⁶ Ebich tookkii ikkooch beemoyich xaaꞌoo boonoshich xebbehe; boonoshich beeti gijjoo oogichii bi meettitoyich, ikkooch beemon hakkaaneenaꞌone.

⁷ Abraaminaa Looxinochi gijjeenaꞌon quyeebeeti qiddeenaꞌo daggooch kaaro giyiye. Ebi yemeenooba Kanaaneenaꞌonaa Ferizeenaꞌona ebi are showooch beetinaꞌone.

⁸ Ebich Abraami Looxich ishichiye: “Neennaa taanna xiboo noone. No daggooch, ne qiddeenaꞌonaa ta qiddeenaꞌona daggoochoo kaaro beeyaaye.

⁹ Ne beeggaa beetoommon, showoo gaminoone. Ebich no barbarigaata, gaawiye. Yooche baddi showoon ne shunigaata, qanne badd hammemmo taane. Qanne baddi showoon ne shunigaata, yooche badd hammemmo taane” iye.

¹⁰ Looxiyoo bi aafoon kaachiꞌi, Yoordaanoosi guudoona beeti naqqe showoo bulli aachechi xaaꞌoo bi tunoon beeggiye. Doono Yeeri Sodoominaa Gomoorinon bi aalliyoyee aaf, ebi xaaꞌoo Tsoꞌar beddaahaa, Doono Yeerichi bechee mixinaꞌo beeti xaaꞌoommo, Gibitsee showeexi Abbaayi aachi guudoona beeti naqqe showoommone.

¹¹ Ebich Looxi Yoordaanoosi guudoona beeti naqqe showoo bullin shunnii deqqiye; arooch hamma aabi-keyo waan qaxiriye. Ebiyoommi gommona Abraaminaa Looxina ikkoo baroo waanee barbariye.

¹² Abraami Kanaanee showooch kotehe. Looxiyoo bi hammiti showeexi naqqe xaaꞌooch beeti katemeenaꞌochi gutte daggooch kotehe; bi duukkaanoon giddii giddii xogiibee Sodoom katinniye.

¹³ Tunebaani Sodoomee asheenaꞌo oogeti gonde asheenaꞌone; Doono Yeeri aafooch magge axaaxoon shuunee beeheete.

Abraami Kebirooni Gaꞌooch Hammii Koto

¹⁴ Looxi Abraamiyee bi baritoyee gubb, Doono Yeeri Abraamich ishichiye: “Ne beeti xaaꞌooch neexeechi, ne aafoon kaachiree aabi-keyonaa aabi-gimonooch, dambi-waaninaa deshi-waaninooch ciine.

¹⁵ Ne ciinnaabeeti showoo bullin neennaa ne shiijjereenaꞌonoyich immemmo taane; bulli yemeenoon ittoshicho tunemmone.

¹⁶ Ne shiijjereenaꞌonoo showee toommeexi qacoochoommon meechemmo taane. Koniyoona showee toommeexi qacoon haddii ciichoon hakkaanoone. Ebiyoommon ne shiijjereenaꞌo haddaa ciyaaneenaꞌo tunemminaꞌone.

¹⁷ Hini showoon neech immemmo taane. And tiyiree, ebi showoo bullin guudi beege” iye.

¹⁸ Ebich Abraami bi duukkaanoon waaxxiꞌi tiyii qaxiriye. Hammiꞌinoo Kebirooni gaꞌooch beeti, Mamirichi gorooch shaggiꞌi, arooch kotehe. Aroochoo Doono Yeerich deejjee gudoon shuunehe.