Halloo 12 - Kafa Linguistics Project

Doono Yeeri Abraamin Ceego

¹ Ikke areddoon Doono Yeeri Abraamich ishichiye: “Ne showoochee, ne xibeenaꞌo waanee, ne nihoo kexoochee keyiree, neech ta bekkiyemmi showooch hambe.

² “Meeti shiijjereenaꞌon neech ta imaa, boonoshiyoo aricheti aagetoon tunemminaꞌone. Neen diiremmo taane; ne shigoonoo aricheto tuniyemmo taane. Ebich meeti asheenaꞌo neenna diireyemminaꞌone.

³ Neen diirimmon diiremmo taane; neen uppimmon uppemmo taane; showee toommooch beeti ashi yareenaꞌo bulli neenna diireyemminaꞌone” iye.

⁴ Abraamiyoo Doono Yeeri biich bi gettitoommon, Karaanee tiyii hammiye; Looxiyoo biinna tookkii hammiye. Ebiyooba Abraami shabaa uuche nati ashoone.

⁵ Abraamiyoo bi mechee Saarayin, bi manoochi bushoo Looxin, boonoshi gijjoonaa Karaanaa boonoshi daneti guuninaꞌo bulloshinon yechiꞌi tiyiye; boonoshiyoo Kanaanee showooch qaxiriyeete. Kanaanee showooch shaggiꞌi,

⁶ Abraami Shekeem beeti Mooreehi gorooch beddaahaa, besheꞌi hammiye. Ebiyooba Kanaaneenaꞌo ebi are showooch beeheete.

⁷ Doono Yeeri Abraamich bekkeꞌi, “Hini showoon ne yaroyich immemmo taane” iye. Ebich Abraami biich bekketi Doono Yeerich goyinneya, are xaaꞌooch deejjee gudoon shuunehe.

⁸ Aroochee tiyiꞌi, Beeteelaa aabi-keyo waan, guudinaꞌo beeti showooch hammiye. Aroocheenoo Beeteelin aabi-gimo waan, Aayin aabi-keyo waan tuniiꞌi, bi duukkaanoon xogiye. Aroochaanoo wotta deejjee gudoon shuuneꞌi, Doono Yeerich goyinnehe.

⁹ Abraami aroochee tiyiꞌi qaxiriibee, Negeebi barahoo waan hammiye.

Abraami Gibits Hamo

¹⁰ Arooba Kanaanee showooch shaacoo giyiye. Giidechi shaacoo giyitoyich, Abraami ebi shaacoo beshemmi wottoon koteya desh, Gibits hammiye.

¹¹ Gibitsee showooch giya katinniichii, bi mechee Saarayich ishichiye: “Ikke mooyon neech getone; mallet gaawe ne tunoon ariibeeto taane.

¹² Gibitsee asheenaꞌo neen beegiree, ‘Bi mecheene’ getiree taan wuxiichi kashoona ne beeyemmoyich neen tuniyemminaꞌone.

¹³ Ebich ne naboona taach bi gaawemmonaa ta kasho wodemmonoyich, ‘Bi manee taane’ gete” iye.

¹⁴ Abraami Gibits bi shaggiyooba, Gibitsee asheenaꞌo Saarayi oogeton mallet gaawe ure bi tunoon beeggiyeete.

¹⁵ Faroonichi iraasheenaꞌo beeggiꞌi, ureen Farooni aafoochaa worganee naadiyeete; ebina ureen taatoochi mechee bi tunemmoyich, bi kexooch daammiyeete.

¹⁶ Taatoo ureechi naboona Abraamich gaawe mooyon tuniihe; biichoo bageenaꞌon, miiminaꞌon, kureenaꞌon, gaaleenaꞌon, wotta gonneenaꞌonaa guuninaꞌonon immiye.

¹⁷ Tunebaani Doono Yeeri Abraami mechee Saarayichi naboyich Farooninaa bi kexeexi asheenaꞌo bullinon ooge naxoona yexxiye.

¹⁸ Ebich Farooni Abraamin ceekkiiꞌi ishichiye: “Ebi shaahe mooyon amoyich ta toommooch tuniinne? Ne mechee bi tunoon amoyich taach getaachine?

¹⁹ ‘Ta maneene’ iyaꞌa shaagga ta daammemmoyich amoyich tuniinne? And illa ebeege ne mechee; yeshi hambe” iye.

²⁰ Aroochee Farooni bi asheenaꞌo Abraamin boonoshi kichi daachiyemmoyich gettiye. Boonoshiyoo Abraamin, bi mecheenaa biich beeto bullinon Gibitsee kichii daachiiheete.