Halloo 11 - Kafa Linguistics Project

Baablooni Bakkooch Shuuneeti Dilaaloo

¹ Wonna showee toommooch beeti asheenaꞌo bulli yibbaateebeeto, ikke noonoona baachiye.

² Asheenaꞌo aabi-keyo waanee hammiibee, Shinaaree showooch ikke bakkoon daneꞌi, arooch koteheete.

^3-4 Asheenaꞌoo boonoshinaa boonoshina “No shigo ceekkemmonaa showee toommo bulliich shaceyaanoon ikkooch no beeyemmonoyich, ittoshi waataa nooch katemoonaa bi cilloo shimaayooch tuggeti dilaaloonon shuunebone” iyeete. Aroochee ishichiyeete: “Ittoshi waataa nuuqqoochee xuuboon hachibone. Bi kupphemmoyichoo qaaqqoona koribone” iyeete. Xaqqee qoodoyich xuuboon shuuneheete; ikke xuubee toommooch bare xuuboon keciꞌi reenjoona yeshiiheete.

⁵ Ebina katemoon shuuneheete. Arooba Doono Yeeri ebi asheenaꞌo shuuneti katemoonaa dilaaloonon beegga kindiye.

⁶ Doono Yeeri ishichiye: “Ebi asheenaꞌo ikkeenaꞌone; boonoshi bulli ikke noonoona yibbaatee beetinaꞌone. And illa ebin shuuneya tiyitinaꞌoyich, gubbich boonoshi gabito bullin tuniyoyich boonoshin mawemmo amolla aalloone.

⁷ Wobote; kindibone. Boonoshinaa boonoshina ikkoo gettiibeeto baroyich bi giyaachemmoyich, boonoshi noonoon aroochaa baccibone” iye.

⁸ Ebina Doono Yeeri asheenaꞌon showee toommo bulliich shacciye. Ebich ebi katemoon shuunoon qajjiyeete.

⁹ Doono Yeeriyoo showee toommo bulliich beeti asheenaꞌochi noonoon aroochaa bi baccitoyich, ebi katemee shigo, Baablooni getteehe. Aroocheenoo Doono Yeeri asheenaꞌon showee toommo bulliich shaccitone.

Sheemichi Shiijjereenaꞌo

¹⁰ Sheemichi shiijjereenaꞌo eboshine: Aalliyee aaco besheti gutte natoyee gubb, Sheemi ball nattiichii, Arifakisaadin shiyihe.

¹¹ Aroochee bare anaami bushiishoonaa maache bushiishoonon shiyihe. Arifakisaadin bi shiyitoyee gubb, uuche ball nattiichii qitiye.

¹² Arifakisaadiyoo shaashaa uucha nattiichii, Seelin shiyihe.

¹³ Aroochee bare anaami bushiishoonaa maache bushiishoonon shiyihe. Seelin bi shiyitoyee gubb, awudde ballaa keejj nattiichii qitiye.

¹⁴ Seeli shaasha nattiichii, Ebeerin shiyihe.

¹⁵ Aroochee bare anaami bushiishoonaa maache bushiishoonon shiyihe. Ebeerin bi shiyitoyee gubb, awudde ballaa keejj nattiichii qitiye.

¹⁶ Ebeeri shaashaa awudd nattiichii, Feleegin shiyihe.

¹⁷ Aroochee bare anaami bushiishoonaa maache bushiishoonon shiyihe. Feleegin bi shiyitoyee gubb, awudde ballaa shaasha nattiichii qitiye.

¹⁸ Feleegi shaasha nattiichii, Reꞌin shiyihe.

¹⁹ Aroochee bare anaami bushiishoonaa maache bushiishoonon shiyihe. Reꞌin bi shiyitoyee gubb, gutte ballaa yiixiya nattiichii qitiye.

²⁰ Reꞌi shaashaa gutta nattiichii, Seruugin shiyihe.

²¹ Aroochee bare anaami bushiishoonaa maache bushiishoonon shiyihe. Seruugin bi shiyitoyee gubb, gutte ballaa shabaatta nattiichii qitiye.

²² Seruugi shaasha nattiichii, Nakoorin shiyihe.

²³ Aroochee bare anaami bushiishoonaa maache bushiishoonon shiyihe. Nakoorin bi shiyitoyee gubb, gutte ball nattiichii qitiye.

²⁴ Nakoori hiyaa yiixiya nattiichii, Taarin shiyihe.

²⁵ Aroochee bare anaami bushiishoonaa maache bushiishoonon shiyihe. Taarin bi shiyitoyee gubb, balli aaraa yiixiya nattiichii qitiye.

²⁶ Taari shaba nattiichii, Abraamin, Nakoorinaa Haraaninon shiyihe.

Taarichi Shiijjereenaꞌo

²⁷ Taarichi shiijjereenaꞌo eboshine: Taari Abraamin, Nakoorinaa Haraaninon shiyihe. Haraaniyoo Looxin shiyihe.

²⁸ Haraani, bi nihoo Taari batt kashoona beetaa, bi shiijje showoo tuneti, Kalideenaꞌo showooch beeti, Uuri katemoochaa qitiye.

²⁹ Abraaminaa Nakoorina mecheenaꞌon shaaggiyeete. Abraami mechee Saarayi getteehan. Nakoori mechee wotta Miliki getteehan. Miliki Haraani busheene. Haraaniyoo Milikinaa Isikinochi nihoone.

³⁰ Saarayiyoo xaafee bi tunetoyich, bushoo biich aalloone.

³¹ Taari, bi bushoo Abraamin, bi bushoochi bushoo, Haraanichi bushoo Looxin, Abraami mechee, bi naamechee Saarayinoo yechiꞌi, Kanaanee showooch hamma, Kalideenaꞌo showooch beeti, Uuri katemoochee kechiye. Tunebaani Karaan shaggiꞌi, arooch koteheete.

³² Taariyoo Karaan beechii, bi shiijjeti gutte ballaa uuche natona qitiye.