Haddoo 9 - Kafa Linguistics Project

Beshee Baaroo Wochinnoon Baareyoo

¹ Gibitsee boonoshi kechiti guttinnee natooba, ikkinnee agenooch Doono Yeeri Muusich Siini barahoochaa ishichiye:

² “Israꞌeeleenaꞌo Beshee Baaroon maacheeti baaree aabooba boonoshi baaremmoyich tuniibe.

³ Hini agenee aaraa awuddinnee qemooba showee shimmishimmooch maacheeti baaree aabooba baaribeete. Qociyoo bulliyoommona, geto bulliyoommonoo baaribeete” iye.

⁴ Muusiyoo Beshee Baaroon boonoshi baaremmoyich, Israꞌeeleenaꞌoyich gettiye.

⁵ Batti batti agenee aaraa awuddinnee qemooba, showee shimmishimmooch Beshee Baaroon Siini barahoochaa baariyeete. Israꞌeeleenaꞌo Doono Yeeri Muusich gettitoommon bulli mooyon tuniiheete.

⁶ Tunebaani boonoshi daggoochee ikkikkeenaꞌo dubenoon yeshona eeꞌetinaꞌo boonoshi tunetoyich, arooba Beshee Baaroon baaroo hakkaaneenaꞌone. Boonoshiyoo Muusinaa Haroonina waan hammiyeete.

⁷ Muusichoo “Dubenoon yeshona eeꞌeto noone; tunebaani maacheeti aabooba Israꞌeeleenaꞌona tookki Doono Yeerich deejjoon no giddiyaachemmoyich no bachaa beeto, amoyichiye?” iyeete.

⁸ Muusiyoo boonoshich “Doono Yeeri ittoshichon amoon bi gettemmo gaata ta waayemmi wottoon quyebote” iye.

⁹ Doono Yeeri Muusich ishichiye:

¹⁰ “Israꞌeeleenaꞌoyich ishichi gete: ‘Ittoshi daggoochee woyee ittoshi shiijjereenaꞌo daggoochee, asho koniyoona dubenoon yeshona bi eeꞌegaata woyee wohi gommooch hammito bi tunegaata, Doono Yeeri taach Beshee Baaroon baaroo hakkiye.

¹¹ Ebinoo guttinnee agenee aaraa awuddinnee qemooba showee shimmishimmooch baaribeete; baaree bagoon shittoo giyaani koshonaa caammiibeeti michi waamona tookki mameete.

¹² Deco harimmi wottoon amoonolla echiyaanoon mameete; bi shaawushoon tiichaayeete; Beshee Baaree qociyoommona bulli mooyon tuniibeete.

¹³ Tunebaani ikke asho, xalloo tuneebee, wotta wohi gommooch hamaanoon Beshee Baaroon baaroo bi qayigaata, ebi asho bi asheenaꞌo daggoochee kichaa yookkebe; ebiyoo maacheeti baaree aabooba Doono Yeeri taach deejjoon giddiyoo bi qajjitoyichiye. Ebi uro bi axaaxoyich sheereyemmone.

¹⁴ “ ‘Ittoshi daggooch koteti shiqqoo Beshee Baaroon Doono Yeeri taach baariya bi qaawigaata, Beshee Baaree qociyoommonaa doyoommonon tuniibe; ittoshi daggooch beeti shiqqoyichoo tuneba showee bushoyich barbaraani ikke qociyoo tunebe’ gete” iye.

Yaafee Duukkaanee Tookkaa Qubo Bekko

¹⁵ Yaafee duukkaanoo xogeehooba, qubo yaafee duukkaanoon qeriye; xumoochee harooch beddaahaa yaafee duukkaanee tookkaa qaaqqoon shaahii aaxxee beehe.

¹⁶ Eechiꞌi kuxaanoon qerii beehe; qubo xumoon qaaqqoon shaahi beehe.

¹⁷ Qubo duukkaanee toommoochee bi tiyiyooba, Israꞌeeleenaꞌo qaxirii beeheete. Qubo hammii neexeti xaaꞌooch Israꞌeeleenaꞌo kaamboon geddii kotee beeheete.

¹⁸ Doono Yeerichi getoona Israꞌeeleenaꞌo qaxirii beeheete; Doono Yeerichi getoona kaamboon geddii kotee beeheete. Qubo yaafee duukkaanee toommooch bi beeti yemeeno bulliich boonoshi kaambooch kotee beeheete.

¹⁹ Qubo meeti aaboon yaafee duukkaanee toommooch bi yagitaanona, Israꞌeeleenaꞌo Doono Yeerichi getoon quyeheetani, qaxiraaneenaꞌone.

²⁰ Ikkikkoochaa qubo yaafee duukkaanee toommooch giisheche aaboon yagii beehe. Arooba Doono Yeerichi getoommona are kaambooch yagii beeheete; wotta Doono Yeerichi getoommonoo qaxirii beeheete.

²¹ Ikkikkoochaa qubo xumoochee harooch beddaahaa baach yagii beehe. Harooch qubo tiyimmona qaxirii beeheete; xumoonoo tuneba areddoon, qubo tiyimmona qaxirii beeheete.

²² Qubo gutte qemon tuneba ikke agenoon, woyee ikke naton duukkaanee toommooch bi yagigaata, Israꞌeeleenaꞌo qaxiraanoon boonoshi kaambooch kotee beeheete; tunebaani bi tiyiyooba, qaxirii beeheete.

²³ Doono Yeerichi getoona kaamboon geddii kotee beeheete; Doono Yeerichi getoonoo qaxirii beeheete; Doono Yeeri Muusina bi gettitoommon, Yeerichi getoon quyee beeheete.