Haddoo 8 - Kafa Linguistics Project

Ceecheenaꞌo Boonoshi Xaaꞌooch Koto

¹ Doono Yeeri Muusich ishichiye:

² “Haroonich ishichibe: ‘Shabaatte ceechoon maqirajjee toommooch ne kotii beegaata, ebi shabaatte ceechoo maqirajjee toommooch tuneree bi ciinooch bi bekkiyemmoyich tuniibe’ gete” iye.

³ Harooniyoo ebiyoommon tuniihe; Doono Yeeri Muusich gettitoommon, maqirajjee ciinooch bi bekkiyemmoyich ceechoon kotiihe.

⁴ Ebi maqirajjo duchoochee tiijjiꞌi bi cillooch beeti bungooch beddaahaa, qicheti aachoochee shuuneetone; bi shuuneeto Doono Yeeri Muusich bekkiitoommoniye.

Leweenaꞌochi Xalloonaa Yaafeyoonochi Qociyoo

⁵ Doono Yeeri Muusich ishichiye:

⁶ “Leweenaꞌon Israꞌeeleenaꞌo daggoochee kichiree boonoshi xallemmoyich tuniibe.

⁷ Boonoshin ne xallii beegaata, ebin tuniibe. Xalliyee aacon boonoshi toommooch wucibe. Boonoshi ashittinee eexo bullin appoona cakke, boonoshi tahoonoo mayi boonoshi xallemmoyich tuniibe.

⁸ Aroochee wuronaa maayi buuroyich zayitoona xirikketi qacini buddinoonon deebeete. Newoo axaaxee maariyee deejjoyich giddemmi bare wuron deebe.

⁹ Leweenaꞌon danee duukkaanee aafooch giddiibe. Israꞌeeleenaꞌochi iitoo bullin kicibe.

¹⁰ Doono Yeeri ta aafooch ne giddiiti Leweenaꞌo toommooch Israꞌeeleenaꞌo boonoshi kishoon kotiibeete.

¹¹ Aroochee Harooni Israꞌeeleenaꞌo daggoochee Leweenaꞌon Doono Yeeri taach boonoshi maddemmoyich, kaama tiijjaa giddeebeeti deejjoommon tunii Doono Yeeri ta aafooch giddiibe.

¹² “Leweenaꞌo boonoshi kishoon wurinaꞌochi qellooch boonoshi kotiitoyee gubb, boonoshi axaaxoon maariyoyich ikkoon axaaxee deejjoo, wotta ohe ikkoon micciibeeti deejjoo tunii Doono Yeeri taach deejjibe.

¹³ Leweenaꞌon kaama tiijjaa giddeebeeti deejjoommon tuniiree Doono Yeeri ta aafooch giddiibe. Harooninaa bi bushiisheenaꞌonon boonoshi toommooch ukkiriibe.

¹⁴ Ebina Leweenaꞌo taachinaꞌo boonoshi tunemmoyich Israꞌeeleenaꞌo daggoochee bariibe.

¹⁵ “Boonoshin xallii, kaama tiijjaa giddeebeeti deejjoommon tuniyaꞌa ne giddiitoyee gubb, shuunee maddoyich danee duukkaanooch giyemminaꞌone.

¹⁶ Boonoshiyoo Israꞌeelee maacheenaꞌochi maacwaqqoon tuneti, Israꞌeeleenaꞌochi gutenee bushiishoo bullichi qoodoyich, ciroona taach boonoshi ichetoyich, boonoshin taacho tuniito taane.

¹⁷ Asho tuneba gijjoo, Israꞌeeleenaꞌo daggooch shiichii shiijjeti qaabboo taachone. Gibits beeti qaabboo bullin ta wuxiyooba, taacho boonoshi tunemmoyich boonoshin bariito taane.

¹⁸ Israꞌeeleenaꞌo gutenee bushiishoo bullichi qoodoyich Leweenaꞌon taach tuniito taane.

¹⁹ Israꞌeeleenaꞌo daggoochee Leweenaꞌon Harooninaa bi bushiishoonoyich wojjaa immeto taane; ebiyoo danee duukkaanoochaa Israꞌeeleenaꞌoyich boonoshi maddemmonaa Israꞌeeleenaꞌo diqq Yaafe Xaaꞌooch katiniree boonoshi naxeyaachemmoyich, Israꞌeeleenaꞌochi axaaxoon boonoshi maariyemmonoyichiye” iye.

²⁰ Muusi, Harooninaa Israꞌeelee iitoo bullina, Doono Yeeri Muusich gettitoommon Leweenaꞌoyich tuniiheete.

²¹ Leweenaꞌo axaaxoochee boonoshi qelloon xalliiheete; boonoshi tahoonoo machiyeete. Harooniyoo kaama tiijjaa giddeebeeti deejjoochoommon, Doono Yeeri aafooch boonoshin giddiihe; wotta boonoshi axaaxoon xalliyee doyoonoo tuniihe.

²² Asheenaꞌo, Doono Yeeri Leweenaꞌochon Muusich bi gettitoommon, boonoshich tuniiheete. Ebiyee gubb, Leweenaꞌo Harooninaa bi bushiisheenaꞌonoyee desh tuneꞌi, boonoshi maddoon maddoyich danee duukkaanooch giyiyeete.

²³ Doono Yeeri Muusich ishichiye:

²⁴ “Leweenaꞌochon ciinnii beetona qociyoo ebine: Hiyaa uuche natoochee tiijjii, ebiyee dambeenaꞌo maddoyich danee duukkaanooch woyemminaꞌone.

²⁵ Boonoshi eeno aache natt bedigaata, boonoshi maddoon neechemminaꞌone; ebiyee gubb shuuneyaachemminaꞌone.

²⁶ Aroyee gubb, danee duukkaanoochaa boonoshi maneenaꞌon gaachebeetani, boonoshi qelloona maddaayeete; illa Leweenaꞌochi maddoon ciinnii beetona ne dojjemmo ebiniye” iye.