Haddoo 6 - Kafa Linguistics Project

Naaziroo Tunee Doyoo

¹ Doono Yeeri Muusich ishichiye:

² “Israꞌeeleenaꞌoyich ishichibe: ‘Ikke asho, anaamo tuneba maachee Doono Yeerich bi qelloon bariiꞌi Naaziroo tunoyich bi mookkegaata,

³ woyinee uyoonaa mashiibeeti uyoonoochee bi qelloon bariibe; woyinoochee woyee kashi uyoochee shuuneeti kiikkiti uyoon uchaaye; woyinee aafo hiicaa shuuneeti uyoon uchaaye; woyinee moochoon woyee shuuꞌon maayaaye.

⁴ Bi qelloon bariiꞌi bi beeti aabo bulliich woyinee aafoon tuneba bi goroon, woyinoochee daneebeeti mooyo amoonolla maayaaye.

⁵ “ ‘Bi qelloon bariyoyich bi mookketi aabo bulliich bi qellooch appoo shagaachemmone. Doono Yeerich bi bariti aabo ciyimmi wottoon yaafeeto tunemmone; bi qelli eexonoo dichemmone.

⁶ Doono Yeerich bi qelloon bariiꞌi bi beeti aabo bulliich dubenee achooch shaggaaye.

⁷ Doono Yeerich bi qelloon bi bariiti malletoo bi qellooch bi beetoyich, bi nihoo tuneba bi indee, bi manoo tuneba bi manee, qititaanona bi qelloon eeꞌiyaaye.

⁸ Bi qelloon bi bariiti aabo bulliich Doono Yeerich yaafeetone.

⁹ “ ‘Asho bi gaꞌoochaa diqqoona qitaa yaafeeti bi qelloon bi eeꞌiigaata, bi xalleebeeti aabooba, ebi geto shabaattinnee qemooba, bi qelloon cakkebe.

¹⁰ Shimittinnee qemooba gutte daabbichoon woyee gutte uggee cobbelloon danee duukkaanee kellooch, qeeshoo waan deebe.

¹¹ Qeeshoo ikkoon axaaxee deejjoyich, wotta ohe ikkoon micciibeeti deejjoyich giddiibe; ebiyoo dubenee naboona bi eeꞌetoyich biin maariyemmone. Ebi arooba, wochinnoon Doono Yeerich bi qelloon yaafibe;

¹² Naaziroo tuneꞌi maddoyich wochinnoon bi qelloon Doono Yeerich bariibe; ikke nati bagee baaddoon xuꞌee deejjoyich deebe. Tunebaani bi Naazirittino eeꞌetoyich ebiyee aaf Naaziroo tuneebee bi echeti aabo biich haddeyaachemmone.

¹³ “ ‘Illa bi bariti aabo ciirehooba, Naaziroochi qociyoo ebine: Danee duukkaanee kellooch gidderee,

¹⁴ bi deejjoon Doono Yeerich giddiibe. Bachaalli ikke nati bagee baaddoon micciibeeti deejjoyich, bachaalli ikke nati gidere bageen axaaxee deejjoyich, bachaalli ikke ooge bagee baaddoon ikkittinee deejjoyich,

¹⁵ shittoo giyaanoon kachiti ikke gemee koshon, ebiyoo zayitoona xirikketi qacini buddinoochee kachiti tagge koshon, shittoo giyaani, zayito huutteꞌi shishiitaa kachiti koshon, maayi buuroonaa uyee deejjoonon giddiibe.

¹⁶ Qeeshoo eboshin axaaxee deejjoonaa micciibeeti deejjoonon tuniiree Doono Yeeri aafooch giddiibe.

¹⁷ Ooge bagee baaddoon ikkittinee deejjoyich gemee toommeexi shittoo giyaani koshona tookki Doono Yeerich deejjemmone. Qeeshoo maayi buuroonaa uyee deejjoonon deejjemmone.

¹⁸ “ ‘Naaziroo bi bariiti bi qelloon danee duukkaanee kelloochaa cakkebe. Are bi qelloon daamiree ikkittinee deejjoo micciibeeti qaaqqooch gede.

¹⁹ “ ‘Naaziroo yaafeeti bi qelloon bi cakketoyee gubb, qeeshoo kiicheti bagee baaddoochi wochoon, wotta gemoochee shittoo giyaani ikke tagge koshonaa shittoo giyaani ikke shishe koshonon daamiree, Naaziroo kishooch yechiibe.

²⁰ Aroochee qeeshoo Doono Yeeri aafooch kaama tiijjaa giddeebeeti deejjoon tuniiree giddiibe; kaama tiijjeeti gaggimatoonaa deejjeeti galloona tookkii yaafeeto, qeeshoo qoodoo tunemmone; ebiyee gubb Naaziroo woyinee uyoon uyon hakkiye.

²¹ “ ‘Mookkoon mookketi Naaziroochi qociyoo ebine. Tunebaani ikke Naaziroo ebi qociyoyee beshoon Doono Yeerich tuniyoyich bi mookkegaata, ebi aroon tuniyoo biich qaawiihe’ gete” iye.

Qeesheenaꞌochi Diiroo

²² Doono Yeeri Muusich ishichiye:

²³ “Harooninaa bi bushiishoonon, ‘Israꞌeeleenaꞌon ittoshi diirii beegaata,

²⁴ “Doono Yeeri neen diiribe; neen quyebe;

²⁵ Doono Yeeri bire aafoona neen ciine; neech ariqqebe;

²⁶ Doono Yeeri bi aafoon ne waan wochibe; diggoon neech imbe” getote’ gete.

²⁷ “Ebina ta shigoon ceeggiꞌi Israꞌeeleenaꞌon boonoshi diirigaata, tawoo boonoshin diiremmo taane” iye.