Haddoo 5 - Kafa Linguistics Project

Kaambo Yaafeyoo

¹ Doono Yeeri Muusich ishichiye:

² “Qeddee shaddee biiyecho bullin, bi achoochee awaawunoo ufee beetonaa dubenoon yeshona eeꞌeto bullinon kaamboochee boonoshi kichemmoyich Israꞌeeleenaꞌoyich gete.

³ Ittoshi daggooch ta koteebeeti ittoshi kaamboon boonoshi eeꞌiyaachemmoyich, ebi eeꞌeti asheenaꞌo anaamon tuneba maacheen kaamboochee maach kichibote” iye.

⁴ Israꞌeeleenaꞌo ebi boonoshich getteeton tuniiheete; Doono Yeeri Muusich gettitoommon, boonoshin kaamboochee kichiyeete.

Xuqqiti Asho Tuniyemmi Mooyo

⁵ Doono Yeeri Muusich ishichiye:

⁶ “Israꞌeeleenaꞌoyich ishichibe: ‘Ikke asho, anaamo tuneba maachee Doono Yeerich gibeneyoon qajjiꞌi, amee axaaxoonolla bi shuunegaata, ebi asho xuꞌechone.

⁷ Bi shuuneti axaaxoon aannibe; bi deqqiti mooyo bullin, wotta are bi deqqiti moochi toommooch uuche kishoochee ikkoon daakkiree bi xuqqiti uroyich imbe.

⁸ Tunebaani wochi bi immemmoyich uro xibaallo bi tunegaata, ebi mooyo Doono Yeerich kechito tuneree, qeeshoyich ichebe; ebiyoo bi axaaxoon maariyoyich bi giddiibeeti bagee baaddoo toommooch daakkaa ichebe.

⁹ Israꞌeeleenaꞌo Doono Yeerich imoyich giddiibeeti yaafeeti wojjoo bulli, ebi wojjoon deqqiibeeti qeeshoyich tunebe.

¹⁰ Asho bulli kichiti yaafeeti mooyo qeeshoyich tunebe; asho qeeshoyich immiibeeti amee mooyolla biich tunebe’ gete” iye.

Shaddoona Phuuqeeti Mecheenaꞌo Mooyo

¹¹ Doono Yeeri Muusich ishichiye:

¹² “Israꞌeeleenaꞌoyich ishichibe: ‘Ashi mechee qocee gondoona bi kenoyich gibeneyaane,

¹³ bare ashoona tookkii qeyeti bi tunegaata, ebiyoo bi kenoyich xalle arichetaano bi tunegaata, qocoo gondeti bi tunetaanoona yecheyaane bi tunetoyich ebi bi qocee gondo xalla keyaano, bi toommooch miixemmi miixoo aallo bi tunegaata,

¹⁴ bi keno qanaateto iberoon ure eeꞌetee bi tunegaata woyee bi mechee eeꞌetaanoon qanaateto bi tunegaata,

¹⁵ ebi uro bi mecheen qeeshoo waan deebe. Are ureechi qoodoyich gutte kobbaye sheqee buddinoon buuroyich deebe. Ebi qanaatoyich giddeti maayi buuro xuꞌoon shalligichiibeeti, shalligichee buuro bi tunetoyich, bi toommooch zayitoon ukkaaye; ixaanoonoo geddaaye.

¹⁶ “ ‘Qeeshoo ureen aaf giddiiree, Doono Yeeri aafooch neechibe.

¹⁷ Aroochee yaafeeti aacon nuuqqee qiicoona kitiichi, yaafee duukkaanee godooch beeti buttoochee giishechoon ushiree aachi daggooch gede.

¹⁸ Qeeshoo ureen Doono Yeeri aafooch neechiichi, ureechi qelli kaafoon shoote; qanaatoyich giddeti shalligichee buuroon ure kishooch yechiibe. Aroochee qeeshoo ufon deebiibeeti caame aacon bi kishooch yeshe.

¹⁹ Qeeshoo ishichi ureen wogiibe: “Bare anaamo neen qeyaano tunegaata, kenechi tunaabee ne kenoyee baroona eeꞌetaane ne tunegaata, ufon deebiibeeti ebi caame aaco neen mangaaye.

²⁰ Tunebaani kenechi tunaabee, ne kenoyee baroon qaawaꞌa eeꞌeti ne tunegaata, ne keno tuneyaani asho neen qeyito tunegaata,

²¹ Doono Yeeri ne maache achoon taxxii, ne maacoonoo nafii, ne ashi daggooch ufonaa maxxaaroonoyich neen tuniibe.

²² Ufon deebiibeeti ebi aaco ne maacooch giyiree, ne maacoon nafii ne maache achoonoo taxxiibe” gete. “ ‘Ureyoo “Ameena, ameena” getuye.

²³ “ ‘Qeeshoo ebi ufinaꞌon kooribe. Ebi kooreeton caame aachi qiicooch gedi maye;

²⁴ ufon deebiibeeti caame aacon ureyich bi uchaa, aaco bi ashittinooch giyiꞌi, shooddii biiyoyee shiichiree,

²⁵ qeeshoo qanaatoyich giddeti maayi buuroon ure kishoochee deꞌe; maayi buuroon Doono Yeeri aafooch kaama tiijjiichi deejjee gudooch deebe.

²⁶ Qeeshoo ikke koppee ceeni maayi buuroon shalligichoo bi tunemmoyich daami deejjee gudooch michibe; aroyee gubb, ure aacon bi uchemmoyich tuniibe.

²⁷ Aacon bi uchemmoyich bi tuniitoyee gubb, ure eeꞌeti, wottoo bi kenoyich gibeneyaane bi tunegaata, ufon deebiibeeti aaco bi ashittinooch giyiree biin shoodi biijjemmone; bi maaco nafemmone; bi maache achoo taxxemmone; ureyoo bi ashi daggooch uppeti tunemmine.

²⁸ Tunebaani ure eeꞌetaani xallee bi tunegaata, ebi mooyo bi toommooch shagaachemmone; bushoonoo shiyemmine.

^29-30 “ ‘Illa ikke ure kenechi tunaabee qocoo gondaꞌa bi qelloon eeꞌiiti bi tunegaata woyee bi keno qanaatecho tuneꞌi bi mecheen bi qanaategaata, qanaateechi sheeroo ebine. Biyoo ureen Doono Yeeri aafooch neechibe. Qeeshoo ebi sheeroo bullin ure toommooch tuniibe.

³¹ Uroo xuꞌoochee xalloo tunemmone; tunebaani ure gondeti bi tunegaata, bi gondee naboona xuuxemmine’ gete” iye.