Haddoo 36 - Kafa Linguistics Project

Kenoon Shaaggiti Maacheenaꞌochi Iristee Mooyo

¹ Yooseefi shiijjereenaꞌochi gumbeenaꞌo daggoochee, Minaasi bushoo Makirichi bushoo Gilaadichi gumbee yaree ukkireenaꞌo Muusinaa Israꞌeelee yoodeenaꞌochi yaree ukkireenaꞌona aafooch giddeꞌi,

² ishichiyeete: “Showoon Israꞌeeleenaꞌoyich iristo tunii ixoona qoodi ne immemmoyich Doono Yeeri no doono neech gettitone. Wottoo no manoo Tselofaadichi iristoon bi maache bushiisheenaꞌoyich ne immemmoyich Doono Yeeri no doono neech gettitone.

³ Tunebaani Israꞌeeleenaꞌo daggoochee, no yoodoyee bare yoodoochee kenoon boonoshi shaagigaata boonoshi qoodoo no yaree iristoochee deꞌaa boonoshi shaaggimmi asheenaꞌo beeti yoodoyich daakkeyemmone. Ebi tunegaata, no ixee iristo shappemmone.

⁴ Israꞌeeleenaꞌochi Yobeelee nato shagiyooba boonoshi iristo boonoshi shaaggiti asheenaꞌo beeti yoodee iristooch daakkeyemmone. Boonoshi iristo no yareenaꞌochi iristoochee dekkemmone” iyeete.

⁵ Muusiyoo Doono Yeerichi qaaro gettii beetoommon, Israꞌeeleenaꞌoyich ishichiꞌi gettiye: “Yooseefi yoodeenaꞌo gettito tatoone.

⁶ Tselofaadichi maache bushiishoon ciinnii beetona Doono Yeeri gettiibeeto ebiniye: ‘Boonoshi qaabbechinaꞌochi yoodoochee baach tunebaani boonoshi shunnimmon shaagon hakkiyeete.

⁷ Ebina Israꞌeeleenaꞌochi iristo ikke yoodoochee barooch besheyaachemmone. Israꞌeeleenaꞌo boonoshi ikkikkoona boonoshi qaabbechinaꞌochi yoodee iristoona neexebeete.

⁸ Israꞌeelee yoodo aabiicheenona iristoon woraashimmi maache bushee bi ikkikkoona bi qaabbechinaꞌochi yoodee gumboochee tuneti anaamon shaaguye. Ebina Israꞌeelee asho bi ikkikkoona bi yari yaroo waanee iristoon woraashemmone.

⁹ Iristo ikke yoodoochee bare yoodooch besheyaachemmone. Israꞌeeleenaꞌochi yoodo bi ikkikkoona bi iristoona neexebe’ itone” iye.

¹⁰ Tselofaadichi maache bushiisheenaꞌo Doono Yeeri Muusich gettitoommon tuniiheete.

¹¹ Tselofaadichi maache bushiisheenaꞌo Mahilaahi, Tiritsi, Hogili, Milikinaa Noohina boonoshi niheesheenaꞌochi bushiisheenaꞌon shaaggiyeete.

¹² Yooseefi bushoo Minaasi gumbee asheenaꞌoochee kenoon shaaggiyeete. Boonoshi iristo boonoshi qaabbechinaꞌochi yoodoyich manjiye.

¹³ Yoordaanoosi aachi gashooch, Yaariki katemee ciinooch beeti Moꞌabi gaddooch boonoshi beetaa Doono Yeeri Muusina Israꞌeeleenaꞌoyich bi immiti geteenaꞌonaa doyeenaꞌona eboshine.