Haddoo 35 - Kafa Linguistics Project

Leweenaꞌoyich Icheti Katemeenaꞌo

¹ Doono Yeeri Muusich Yoordaanoosi aachi gashoochaa, Yaariki katemee ciinooch beeti Moꞌabee gaddoochaa ishichiye:

² “Boonoshi woraashemmi iristoochee Leweenaꞌoyich, boonoshi beeyemmi katemeenaꞌonaa ebi katemeenaꞌochi guudooch beeti, boonoshi gijjeenaꞌo mocoon maayemmi miinji gaddoonon boonoshi immemmoyich Israꞌeeleenaꞌoyich gete.

³ Boonoshiyoo katemeenaꞌooch kotemminaꞌone. Katemeenaꞌochi guudooch beeti gaddo boonoshi miiminaꞌonaa boonoshi gijjeenaꞌo bullinoyich tunebe.

⁴ “Leweenaꞌoyich ittoshi immemmi miinji gaddo, katemee uxeroyee maach, katemee guudo bulliichaa hume hiroo tunebe.

⁵ Ebiyoo katemoo daggooch tunemmona bi awudde goco dambee tiijjii desh gutte hume hiroo, okkee tiijjii hach gutte hume hiroo tunemmone. Ebi xaaꞌeenaꞌo katemeexi asheenaꞌochi miinji gaddo tunemminaꞌone.

⁶ “Leweenaꞌoyich ittoshi immemmi katemeenaꞌo daggoochee shirittoo ashoon wuxiti asho aalle hami wodemmi shoobi katemoon tunemmone. Eboshiyee baroo aabbaa gutte katemoon boonoshich immemmo ittoshine.

⁷ Leweenaꞌoyich bulli aabbaa shimitte katemoon boonoshi miinji gaddoona tookki immemmo ittoshine.

⁸ Israꞌeeleenaꞌo woraashiti iristoochee Leweenaꞌoyich ittoshi immemmo ebiyoommoniye. Woddoon yechiti yoodo waanee woddoon, giishechoon yechiti yoodo waanee giishechoon imbote. Boonoshi ikkikkoona boonoshi woraashitoommonaa boonoshich beeti iristoommona boonoshi katemoochee Leweenaꞌoyich immemminaꞌone” iye.

Shoobi Katemenaꞌo

⁹ Aroochee Doono Yeeri Muusich ishichiye:

¹⁰ “Israꞌeeleenaꞌoyich ishichi gete: ‘Kanaanee showooch gimoyich Yoordaanoosin ittoshi kimiyooba,

¹¹ ariyaanoon diqqoona ashoon wuxiti asho aalleree arooch bi hammemmi shoobi katemoon ittoshich kaacote.

¹² Ashoon wuxiti asho nallooch, iiteenaꞌo aafooch bi giddemmi wottoon bi qitaachemmoyich, nichoon kichecho waanee shoobi katemeenaꞌo ittoshich tunebeete.

¹³ Ebi ittoshi immemmi shiritte katemeenaꞌo ittoshich shoobi katemeenaꞌo tunemminaꞌone.

¹⁴ Yoordaanoosi aachee beqachee keejje katemoon, Kanaanee showoochee keejje katemoon shoobi katemoon tunii immemmo ittoshine.

¹⁵ Ebi shiritte katemeenaꞌo ariyaanoon diqqoona ashoon wuxiti asho koniyoona bi aashemmoyich Israꞌeeleenaꞌoyich, ittoshi daggooch koteti dallaaweenaꞌonaa shiqqeenaꞌonoyich shoobi katemoon tunemminaꞌone.

¹⁶ “ ‘Tunebaani ikke asho baroon bi qitimmi wottoon xuuroona bi yexaa bi qitigaata, ashoon wuxitone; ashoon wuxiti asho qitibe.

¹⁷ Ashoon wuxa bede xaqqoon yechiꞌi, yexxii bi dichaa bi qitigaata, ebi asho ashoon wuxitone; ashoon wuxito qitibe.

¹⁸ Woyee ashoon wuxa bede mixon yechiꞌi, yexxii bi dichaa bi qitigaata, ebi asho ashoon wuxitone; ashoon wuxito qitibe.

¹⁹ Nichoon kichecho bi qelloona wuxibe. Ebi uroon bi danehooba wuxibe.

²⁰ Ikke asho baroon shixxiꞌi, xuqqii dichiꞌi bi wuxigaata woyee ikke mooyon bi toommooch duppiꞌi bi wuxigaata,

²¹ woyee shixxiꞌi kishoona yexxii bi wuxigaata, ebi uro qitibe. Nichoon kichecho ebi ashoon wuxiti uroon wuxibe. Biin bi danehooba wuxibe.

²² “ ‘Tunebaani kaaroona tuneyaanoon diqqoona ikkoo baroon xuqqii bi dichaa woyee ariyaanoon ikke mooyon bi toommooch bi dufaa,

²³ woyee beegaanoon wuxa bede xaqqoon bi toommooch bi dufaa are asho qitigaata, bi shixecho tuno bi qajjitoyich, wotta ariibee ebi uroon xanoyich tuniyaano bi tunetoyich,

²⁴ iiteenaꞌo ebi uroonaa nichoon kichechonochi daggooch ebi doyoommona nallibeete.

²⁵ Iiteenaꞌo, ashoon wuxiꞌi taggeeti uroon, nichoon kichecho kishoochee wodiiꞌi bi aallee hammiti shoobi katemooch wochoo boonoshich qaawiihe. Yaafeeti zayitoona huutteti qeeshee guudo qitimmi wottoon arooch beebe.

²⁶ “ ‘Tunebaani ashoon wuxiti uro bi beeti shoobi katemoochee maach bi keyaa,

²⁷ nichoon kichechi asho biin daneꞌi bi wuxigaata, damee hiishooch giyaachemmone.

²⁸ Ebi ashoon wuxiti uro qeeshee guudo qitimmi wottoon shoobi katemooch beemo biich qaawiihe. Tunebaani qeeshee guudo qititoyee gubb, bi iristooch wottoon hakkiye.

²⁹ “ ‘Illa ebi mooyinaꞌo ittoshi kotemmi xaaꞌoo bulliichaa ittoshinaa ittoshi bushaa bushoonoyich qociyoonaa doyoonon tunebeete.

³⁰ “ ‘Ashoon wuxiti asho koniyoona bi qitemmo miixoo miixegaata baachiye. Tunebaani ikke ashi miixoona asho qitaachemmone.

³¹ “ ‘Ashoon wuxiꞌi qitoo bi toommooch nalleeti asho qitibe; bi kashoon gijjoona bi biishemmoyich tuniyaahote.

³² “ ‘Qeeshee guudo qitaan beetaa bi showooch bi wottemmoyich, shoobi katemooch aallee hammiti uro waanee kashee qocoon deqqaahote.

³³ Damoo showoon eeꞌiibeeto bi tunetoyich, ittoshi beeyemmi showoon eeꞌiyaahote. Damoo ufeti showoo damoon ukkiti uroochi damoyee besh baroona xalleyaachemmone.

³⁴ Doono Yeeri ta Israꞌeeleenaꞌo daggooch ta beetoyich, ittoshi beeti, wotta ittoshi daggooch ta qeyaabeeti showoon eeꞌiyaahote’ itone gete” iye.