Haddoo 34 - Kafa Linguistics Project

Kanaanee Showee Daaro

¹ Doono Yeeri Muusich ishichiye:

² “Israꞌeelee asheenaꞌoyich ishichi gete: ‘Kanaanee showooch ittoshi giyiyooba, iristo tunii ittoshi woraashemmi showee daaro ebine:

³ Deshi-waani ittoshi daaro Tsiini barahoochee tiijji Edoomee showee danooch beddaahaa tunemmone. Ebi deshi-waani daaro bi tiyemmo aabi-keyo waanaa, Kiikki baharee deshi ciiroocheeniye.

⁴ Aroochee Aqirabiimi deshee damboochaa deshi-waan wotteree Tsiin beddaahaa hamiree, Qadeesh Barinaa deshi-waan neexemmone. Aroochee Hatsaar Adaar besheree Azimoon shaggemmone.

⁵ Ebi daaro Azimoonee Gibitsee aaco waan guudi, Meditiraanee baharooch tuggemmone.

⁶ “ ‘Aabi-gimo waani ittoshi daaro Meditiraanee baharo tunemmone. Aabi-gimo waani ittoshi daaro ebine.

⁷ “ ‘Dambi-waani ittoshi daarooch, Meditiraanee baharoochee Hoori guudooch beddaahaa malletoon gedote.

⁸ Ebiyoommon wotta Hoori guudoochee Hamaati katemooch beshe kaattooch beddaahaa malletoon gedote. Aroochee ebi daaro Tsedaad beddemmone.

⁹ Wotta Zifiroonin besheree Hatsaar Enaan tuggemmone. Dambi-waani ittoshi daaro ebine.

¹⁰ “ ‘Aabi-keyo waani ittoshi daarooch Hatsaar Enaanee Shefaam beddaahaa malletoon gedote.

¹¹ Ebi daaro Shefaamee tiyi Ayinaa aabi-keyo waan beeti Ribila beddaahaa kindiree, Kinerootee baharoyee aabi-keyo waan beeti geppooch shaggemmone.

¹² Aroochee ebi daaro Yoordaanoosi aacon yeshi kindiree, Kiikki baharooch tuggemmone. Illa guude gawe ittoshi showee daaro ebine’ gete” iye.

¹³ Muusi Israꞌeeleenaꞌoyich ishichiꞌi gettiye: “Yiixiyaa qachi yoodeenaꞌoyich bi ichemmoyich Doono Yeeri gettiti, ixoona ittoshi qoodeyemmi showoo ebine.

¹⁴ Roobeeli yoodee asheenaꞌo boonoshi yari yaroona, Gaadi yoodee asheenaꞌo boonoshi yari yaroona, Minaasi yoodoochee qatinaꞌoo boonoshi iristoon deqqitinaꞌone.

¹⁵ Ebi gutte yoodaa qachi asheenaꞌo Yoordaanoosi aachee beqachee, Yaariki ciinoochee, aabi-keyo waanee boonoshi iristoon deqqitinaꞌone” iye.

Showoon Qoodoyich Kaacheti Iraasheenaꞌo

¹⁶ Doono Yeeri Muusich ishichiye:

¹⁷ “Showoon iristo tunii ittoshich qoodemmi asheenaꞌo qeeshoo Elazaarinaa Nuuni bushoo Yaasinane.

¹⁸ Showoon iristo tunii boonoshi qoodemmoyich yoodi yoodoochee ikkikke ukkiroon daakkemmo ittoshine.

¹⁹ Ebi asheenaꞌochi shigo: Yihudi yoodoochee Yefuuni bushoo Kaaleebi,

²⁰ Simooni yoodoochee Amihuudi bushoo Shemuꞌeeli,

²¹ Biiniyaami yoodoochee Kisilooni bushoo Elidaadi,

²² Daani yoodoochi ukkiroo Yogili bushoo Buqiihi,

²³ Yooseefi bushiishoochee Minaasi yoodoochi ukkiroo Efoodi bushoo Haneeli,

²⁴ Efreemi yoodoochi ukkiroo Shifitaani bushoo Qemuꞌeeli,

²⁵ Zebulooni yoodoochi ukkiroo Farinaaki bushoo Elitsafaani,

²⁶ Yisakoori yoodoochi ukkiroo Azani bushoo Felixeeli,

²⁷ Aseeri yoodoochi ukkiroo Sheloomi bushoo Ahihudinaa

²⁸ Nifitaali yoodoochi ukkiroo Amihuudi bushoo Fedaheelinane” iye.

²⁹ Doono Yeeri Kanaanee showoochaa Israꞌeeleenaꞌoyich iristoon boonoshi qoodemmoyich bi gettiti asheenaꞌo eboshine.