Haddoo 32 - Kafa Linguistics Project

Yoordaanoosi Aachee Beqachi Yoodeenaꞌo

¹ Roobeelinaa Gaadinochi yoodeenaꞌoyich meeti gijjoo beetone. Boonoshiyoo Yazeeree showoonaa Gilaadee showoona gijjeenaꞌoyich mashaamiti xaaꞌoo tunoon beeggiꞌi,

² Muus waan, qeeshoo Elazaarinaa iiteenaꞌochi ukkireenaꞌona waan waaꞌi ishichiyeete:

^3-4 “Doono Yeeri Israꞌeeleenaꞌo koyi yechemmoyich tuniiti showeexi katemeenaꞌo, Axarooti, Diibooni, Yazeeri, Nimiraahi, Heshiboni, Elaleehi, Sebaami, Neebinaa Beꞌoonina gijjoyich gaawetinaꞌone. Ne guunoo noochoo meeti gijjoo beetone.

⁵ Ne aafoochaa gidoon no danegaata, ne guuno nooch ebi showoon iristo tuniiree imbe. Yoordaanoosi aacoyee beqach no kimmemmoyich tuniyaahine” iyeete.

⁶ Muusiyoo boonoshich ishichiye: “Ittoshi maneenaꞌo ginooch hami beetaa, ittoshi hiniich koteya qaawiyote?

⁷ Doono Yeeri boonoshich immemmi showooch boonoshi kimaachemmoyich Israꞌeeleenaꞌo mulloon ittoshi niriibeeto amoyichiye?

⁸ Showoon boonoshi qiiddemmoyich Qadeesh Barinee ittoshi niheenaꞌon ta daachiihooba boonoshi tuniito ebiyoommoniye.

⁹ Eshikooli bambooch beddaahaa hammii, showoon beeggii wotteꞌi, Doono Yeeri boonoshich immiti showooch boonoshi giyaachemmoyich Israꞌeeleenaꞌo mulloon wuxitinaꞌone.

¹⁰ Arooba Doono Yeeri kaaro cufiye; biyoo ishichiꞌi wogehe:

¹¹ ‘Iberoon gettoye; boonoshi ceeni mulloona taan dabboo boonoshi qajjitoyich, Gibitsee kechiti, boonoshi eeno hiye natonaa ebiyee damboona tuneti asheenaꞌoochee ikkolla Abrahamich, Yisaaqinaa Yaaqobinoyich imma ta wogeti showoon beegaachemmone.

¹² Boonoshi ceeni mulloona Doono Yeeri taan dabbiti, Qenizee asho Yefuuni bushoo Kaaleebinaa Nuuni bushoo Yaasinoyee besh boonoshi daggoochee ikkolla beegaachemmone’ iye.

¹³ Doono Yeeri Israꞌeeleenaꞌo toommooch oogichiꞌi bi kaaretoyich, bi aafooch gonde mooyon shuuneti ebi shiijjeroo bulli aallemmi wottoon aabbe naton barahooch boonoshi yallyallimi beeyemmoyich tuniihe.

¹⁴ “Hini axaaxechinaꞌochi shiijjereenaꞌote. Doono Yeeri kaaroon Israꞌeeleenaꞌo toommooch woddiyoyich ittoshi niheenaꞌochi xaaꞌooch kereeto ittoshine.

¹⁵ Biin dabboochee gubb ittoshi wotta gaata, andoo hini asheenaꞌo bullin barahooch duppemmone. Boonoshi aallee naboo tunemmo ittoshine” iye.

¹⁶ Aroochee boonoshiyoo bi waan giddeꞌi biich ishichiyeete: “Hiniich no gijjeenaꞌoyich maggoon, wotta no bushiisheenaꞌoyich katemoon no shuunemmoyich nooch daaggibe.

¹⁷ Aroochee Israꞌeeleenaꞌon boonoshi xaaꞌooch no shakkiimmi wottoon, ginooch qanniree boonoshi aafooch hammemmo noone. No bushiisheenaꞌoo hini showeexi asheenaꞌon shati keqqaanoon mishigechi katemooch kotemminaꞌone.

¹⁸ Israꞌeeleenaꞌo bulli boonoshich icheti iristoon boonoshi woraashimmi wottoon no kexooch wotteyaachemmo noone.

¹⁹ Yoordaanoosi aacoyee haqach, aabi-keyo waanee iristoon no woraashitoyich, boonoshina tookki Yoordaanoosi aacoyee beqachee iristoon woraashaachemmo noone” iyeete.

²⁰ Aroochee Muusi boonoshich ishichiye: “Ebin ittoshi tuniigaata, Doono Yeeri aafooch cuyeꞌi ginooch ittoshi qannigaata,

²¹ Doono Yeeri, bi etteenaꞌon bi aafoochee yookkii bi kichimmi wottoon, ittoshi bulliyona bi aafooch ginooch qanniꞌi Yoordaanoosin ittoshi kimigaata,

²² showee Doono Yeerich hajjeetoyee gubb, wottoon hakkiyote. Ebin ittoshi tuniigaata, Doono Yeerinaa Israꞌeeleenaꞌonoyich ceechoo ittoshich qaawiibeeti mooyon ceechemmo ittoshine. Hini showoo Doono Yeeri aafooch ittoshich iristo tunemmone.

²³ “Tunebaani ebin tuniyoo ittoshi qayigaata, Doono Yeerin xuqqemmo ittoshine. Ebi ittoshi axaaxoo ittoshin gawukkaachemmo bi tunoon ariibote.

²⁴ Ittoshi bushiishoyichoo katemoon, ittoshi gijjoyichoo maggoon shuunebote. Ittoshi giyiti gibenee qaaroonoo ceechibote” iye.

²⁵ Aroochee Roobeelinaa Gaadinochi yoodeenaꞌo Muusich ishichiyeete: “Ne guuno no, no doono ne gettetoommon tuniyemmo noone.

²⁶ No bushiisheenaꞌo, no mecheenaꞌo, no miiminaꞌo bullinaa no bageenaꞌona hini Gilaadi beeti katemeenaꞌooch beebeete.

²⁷ Tunebaani ne guuno no, no doono ne gettetoommon no ikkikkoona ginooch qanniree Doono Yeeri aafooch koyooch hammemmo noone” iyeete.

²⁸ Aroochee Muusi boonoshichon ciinnii beetona qeeshoo Elazaarich, Nuuni bushoo Yaasinaa Israꞌeelee yoodee yaree ukkireenaꞌonoyich ishichiꞌi gettiye:

²⁹ “Gaadi yoodoonaa Roobeeli yoodoona boonoshi ikkikkoona ginooch qanniree Doono Yeeri aafooch ittoshina tookki Yoordaanoosin kimmemminaꞌo boonoshi tunegaata, showoon kochiꞌi ittoshi yeshigaata, Gilaadee showoon boonoshich iristo tunii imbote.

³⁰ Tunebaani ginooch qanniꞌi ittoshina tookkii kimo boonoshi qayigaata, boonoshi iristoon Kanaanee showoochee ittoshina tookki qoodeyemminaꞌone” iye.

³¹ Gaadinaa Roobeelinochi yoodee asheenaꞌo ishichiꞌi wochiyeete: “Doono Yeeri gettitoommon tuniyemmo noone.

³² Ginooch qanniree Doono Yeeri aafooch, Kanaanee showooch kimmemmo noone. Tunebaani no woraashemmi iristo Yoordaanoosi aacoyee haqach, hiniich tunemmone” iyeete.

³³ Muusiyoo Gaadinaa Roobeelinochi yoodeenaꞌoyich, Yooseefi bushoo Minaasi yoodoochee qatinaꞌonoyichoo Amooreenaꞌo taatoo Sihoonichi taatee showoon, Bashaanee taatoo Oogichi taatee showoon, ebi showooch beeti katemoonaa bi guudeexi showoonon immiye.

³⁴ Gaadi yoodee asheenaꞌo Diiboonin, Axarootin, Aroꞌeerin,

³⁵ Atiroot Shofaanin, Yazeerin, Yogibaahin,

³⁶ Beet Nimiraahinaa Beet Haraaninon xaqqee uxerechi katemoo tuniiꞌi shuuneheete. Miinji maggoonoo shuuneheete.

³⁷ Roobeeli yoodee asheenaꞌo Heshibonin, Elaleehin, Qiriyatayimin,

³⁸ boonoshi shigo shaddeeti Neebin, Baꞌaal Meꞌooninaa Sibiminon shuuneheete. Ebi boonoshi shuuneti katemeenaꞌoyich bare shigoon kichiyeete.

³⁹ Minaasi bushoo Makirichi asheenaꞌo Gilaadee showooch hammii showoon kochii yechiꞌi are showooch beeti Amooreenaꞌon yookkiyeete.

⁴⁰ Ebina Muusi Gilaadee showoon Minaasi bushoo Makirichi asheenaꞌoyich immiye. Biyoo arooch kotehe.

⁴¹ Minaasi bushoo Yaꞌiiri hammii gafeenaꞌon kochii yechiꞌi, Yaꞌiirichi Gafeenaꞌo ii shigiihe.

⁴² Nobaahiyoo hammii Qenaatinaa bi guudoona beeti gafeenaꞌonon kochii yechiꞌi, bi shigoona Nobaahi ii shigiihe.