Haddoo 31 - Kafa Linguistics Project

Israꞌeeleenaꞌo Miidiyameenaꞌon Koyo

¹ Doono Yeeri Muusich ishichiye:

² “Israꞌeeleenaꞌochi nichoon Miidiyamee asheenaꞌo toommooch kichibe. Aroochee newoo, ne qaabbechinaꞌo waan xaꞌeyemmo neene” iye.

³ Muusiyoo Israꞌeeleenaꞌoyich ishichiye: “Miidiyameenaꞌon koyooch boonoshi hammemmonaa Doono Yeerichi qoodoyich Miidiyameenaꞌo toommooch nichoon boonoshi gaaccemmonoyich ittoshi asheenaꞌo daggoochee giishecheenaꞌon ginee koyoyich qanniibote.

⁴ Israꞌeelee yoodi yoodoochee ikkikke hume ashoon ginooch daachiibote” iye.

⁵ Ebich Israꞌeeleenaꞌo daggoochee aaraa gutte hume asheenaꞌo, ebiyoo ikkikke yoodoochee ikkikke hume asheenaꞌo ginooch hamoyich qanniyeete.

⁶ Muusiyoo yoodi yoodoochee ikkikke hume asheenaꞌon ginooch daachiihe. Boonoshinaa qeeshoo Elazaari bushoo Finihaasinon ginooch daachiihe. Yaafeeti qiicoonaa hukkeebeeti tiroonon biich immiye.

⁷ Doono Yeeri Muusich gettitoommon Miidiyameenaꞌon kochiꞌi, anaamo bullin wuxiyeete.

⁸ Ebi qititinaꞌo daggooch uuche Miidiyamee taateenaꞌo, eboshiyoo Eewi, Reqeemi, Tsuuri, Huurinaa Reebina beetinaꞌone. Beꞌoori bushoo Balaaminoo wuxiyeete.

⁹ Aroochee Israꞌeeleenaꞌo Miidiyamee maacheenaꞌonaa bushiisheenaꞌonon kecciyeete. Boonoshi miimon, bagoon, emmishoonaa boonoshi qiico bullinon daammiyeete.

¹⁰ Boonoshi koteti katemoo bullinaa kaambo bullinon qaaqqoona michiyeete.

¹¹ Boonoshi kecciti ashoonaa gijjoona bullin yechiꞌi,

¹² Muusi, qeeshoo Elazaarinaa Israꞌeelee iitoona beetooch, Yoordaanoosi aachi gashooch, Yaariki katemee ciinooch beeti Moꞌabi gaddeexi kaambooch deebiyeete.

Ginee Naayinaꞌo Wotto

¹³ Muusi, qeeshoo Elazaarinaa iiteenaꞌochi ukkireenaꞌo bullina boonoshina daneya kaamboochee maach kechiyeete.

¹⁴ Muusiyoo ginee koyoochee wotteti ginee iraasheenaꞌochi ukkireenaꞌon, humee iraasheenaꞌonaa ballee iraasheenaꞌonon kaarehe.

¹⁵ Boonoshichoo ishichiye: “Maacheenaꞌon aabichiꞌi kashoona echiihote?

¹⁶ Feꞌoori guudoochaa tuneti mooyona Balaamichi ciicoon waayeꞌi Israꞌeeleenaꞌo Doono Yeerin boonoshi xuqqemmoyich naboon tunetinaꞌo eboshi tooneete? Ebina Doono Yeerichi asheenaꞌo toommooch naxo kindiye.

¹⁷ Andoo boonoshi anaami bushiishoonaa anaamona tookkii daneti maacheenaꞌo bullinon wuxibote.

¹⁸ Tunebaani anaamona tookkii daneyaani gidiideenaꞌon ittoshich echiibote.

¹⁹ “Ittoshi daggoochee ashoon wuxito woyee dubenoon yechito bulli shabaatte qemon kaamboyee maach kotebe. Keejjinnee qemoobinaa shabaattinnee qemoobinon ittoshi qelloonaa keceenaꞌonon xalliibote.

²⁰ Taho bullin, ebiyoommon gooqqoochee, emmishee huushoochee wotta mixoochee shuuneeti amoonolla xalliibote” iye.

²¹ Aroochee qeeshoo Elazaari ginoochee wotteti asheenaꞌoyich ishichiye: “Doono Yeeri Muusich gettiti sheeree doyoo ebine:

^22-23 Qaaqqoona miccii aalloon hakkaani aachoon, birewoon, gooshoon, xuuroon, shombeqoonaa budoonon qaaqqoona xalliibote. Ebina xallemmone. Tunebaani wotta xalliyee aacona xalliyoo qaawiihe. Qaaqqoon hakkaani mooyon xalliyee aacona baach xalliibote.

²⁴ Shabaattinee qemooba ittoshi tahoon mayote. Aroochee xallemmo ittoshine. Ebiyee gubb, kaambooch gimon hakkemmo ittoshine” iye.

Kecoon Qoodeyoo

²⁵ Doono Yeeri Muusich ishichiye:

²⁶ “Ne, qeeshoo Elazaarinaa iiteenaꞌochi yari yaree ukkireenaꞌona kecceti ashoonaa gijjoonon haddibote.

²⁷ Kecoon gutta qoodiree ginooch hammii koyetinaꞌonaa iitoo bullinoyich qoodibe.

²⁸ Koyooch hammiti ginechinaꞌochi qoodoochee, ebiyoo kecceti ashoochee, wotta miimoochee, kuroochee, bagoonaa emmishoonoochee uuche balloochee ikkoon Doono Yeeri taach gibiroon kichibote.

²⁹ Ebin boonoshi qoodoochee deꞌiree Doono Yeeri taach deejjoon tunii qeeshoo Elazaarich imbe.

³⁰ Israꞌeeleenaꞌochi qoodoochee, ebiyoo kecceti asheenaꞌoochee, miimoochee, kuroochee, bagoonaa emmishoonoochee, gijjoo bulliichee aachoochee ikkoon deꞌiree Doono Yeeri ta duukkaaneexi maddooch ukkireti Leweenaꞌoyich imbe” iye.

³¹ Muusinaa qeeshoo Elazaarina Doono Yeeri Muusich gettitoommon tuniiheete.

³² Ginooch hammiti asheenaꞌo keccii deebiti mooyo boonoshich boonoshi echiitona tookkii ebine: Shiritte ballaa shabaa uuche hume bagoonaa emmishoona,

³³ shabaa gutte huma miimo,

³⁴ shichaa ikke hume kuroonaa

³⁵ anaamona tookkii daneyaani shaashaa gutte hume maacheenaꞌonane.

³⁶ Ginooch hammiti asheenaꞌoyich qoodeeti qato ebine: Bagoonaa emmishoona keejje ballaa shaashaa shabaatte humaa uuche balloone.

³⁷ Aroochee shiritte ballaa shabaa uuchoo Doono Yeerich gibiro kechiye.

³⁸ Miiminaꞌo shaashaa shiritte humeenaꞌone. Aroochee shabaa guttoo Doono Yeerich gibiro kechiye.

³⁹ Kureenaꞌo shaashe humaa uuche balleenaꞌone. Aroochee shichaa ikkoo Doono Yeerich gibiro kechiye.

⁴⁰ Asho aaraa shiritte humoone. Aroochee shaashaa guttoo Doono Yeerich gibiro kechiye.

⁴¹ Muusiyoo Doono Yeeri biich gettitoommon, Doono Yeerichi qoodee gibiroon qeeshoo Elazaarich immiye.

⁴² Ginooch hammiti asheenaꞌo waanee Muusi qooditi qato Israꞌeeleenaꞌochi qoodoone;

⁴³ iiteenaꞌoyich qoodeeti qoodoo ebine: keejje ballaa shaashaa shabaatte humaa uuche balle bagoonaa emmishoona,

⁴⁴ shaashaa shiritte hume miimo,

⁴⁵ shaashe humaa uuche balle kuroonaa

⁴⁶ aaraa shiritte hume maache bushiisheenaꞌonane.

⁴⁷ Israꞌeeleenaꞌochi qoodoochee Muusi ashoonaa gijjoonoochee aachoochee ikkoon tiijjiye. Doono Yeeri biich gettitoommon, Doono Yeerichi yaafee duukkaanoon quyoona maddeebeeti Leweenaꞌoyich immiye.

⁴⁸ Ginee iraasheenaꞌo, eboshiyoo humee iraasheenaꞌonaa ballee iraasheenaꞌona Muus waan waaꞌi,

⁴⁹ Muusich ishichiyeete: “Ne guuno no, no kishooch beeti ginee naayinaꞌon haddito noone. No haddaa ikkolla shappito aalloone.

⁵⁰ Ebich no ikkikkoona no daneti aachee qiicoon, aachee allubboon, aachee shagaamoon, axxaamittoon, waajji aachoonaa qettee aachoonon, no kashoon Doono Yeeri aafoochaa maariyoyich, Doono Yeerich wojjoo deebeto noone” iyeete.

⁵¹ Muusinaa qeeshoo Elazaarina ebi aachoochee shuuneeti qiiceenaꞌon boonoshi kishoochee deqqiyeete.

⁵² Humee iraasheenaꞌonaa ballee iraasheenaꞌona Doono Yeerich wojjoo boonoshi giddiiti aachoo bulli gutte balle kiilo giraam bedoone.

⁵³ Ginee naayinaꞌo boonoshi qelli qelloona kecoochee deqqitinaꞌone.

⁵⁴ Muusinaa qeeshoo Elazaarina aachoon humee iraasheenaꞌonaa ballee iraasheenaꞌona waanee deqqiꞌi, Doono Yeeri aafoochaa Israꞌeeleenaꞌo gabeyemmoyich danee duukkaanooch giijjiyeete.