Haddoo 30 - Kafa Linguistics Project

Mookkee Mookko

¹ Muusi Israꞌeelee yoodeenaꞌochi ukkireenaꞌoyich ishichiye: “Doono Yeeri gettiti mooyo ebine:

² Asho Doono Yeerich mookkoon bi mookkegaata woyee wogoon bi giyigaata, bi heciyoon shaddaaye. Bi noonoochee kechitoommon bullin tuniibe.

³ “Maache bushee bi bushittinoona bi nihoo kexooch beechaa Doono Yeerich mookkoon bi mookkegaata woyee wogoon bi giyigaata,

⁴ bi nihoo bi mookkoon woyee wogoon bi gimon waayeechii amoonolla getaanoon cikkii bi qayigaata, bi mookko bullin woyee bi wogeti wogo bullin ceechoo biich qaawiihe.

⁵ Tunebaani bi nihoo waayeꞌi bi bayigaata, bi mookkoon woyee wogoon ceechoo biich qaawiyaachemmone. Bi nihoo bajjitoyich Doono Yeeri biin maaremmone.

⁶ “Ebiyoommon wotta ikke ure mookkaachaa woyee bi noonoochee muricaa wogoon giyaachaa kenoon bi shaagigaata,

⁷ bi kenoo ebin waayeechii amoonolla getaanoon cikkii bi qayigaata, bi mookkoon woyee bi wogoon ceechoo biich qaawiihe.

⁸ Tunebaani bi keno waayeꞌi bi bayigaata, tuniyoyich bi mookketi mookkoon woyee bi noonoochee muricaa bi wogeti wogoon ure toommoochee kindiyemmone. Doono Yeeriyoo ureen maaremmone.

⁹ “Tunebaani bi keno qititi woyee gawukkeeti ure, bi mookketi mookkoon woyee bi wogeti wogoon ceechoo biich qaawiihe.

¹⁰ “Maachee bi keno kexooch beechaa bi mookkegaata woyee bi wogegaata,

¹¹ bi keno waayeechii bayaanoon cikkii bi qayigaata, bi mookko bullin woyee bi wogeti wogo bullin ceechoo biich qaawiihe.

¹² Tunebaani bi keno ebin bi waayehooba bi bayigaata, bi mookkoon woyee bi noonoochee muricaa bi wogeti wogoon ceechoo biich qaawiyaache. Bi keno bajjitoyich Doono Yeeri biin maaremmone.

¹³ Bi keno bi mookketi mookkoon woyee bi qelloon giishiyoyich bi wogeti wogo bullin echiyoon woyee manjiyoon hakkiye.

¹⁴ Tunebaani bi keno ebi mooyon amoonolla getaanoon qemoochee qemooch cikkii bi qayigaata, ebi bi mookko bullin woyee bi toommooch beeti, bi wogeti wogo bullin manjiitone getone. Ebi mooyon waayeꞌi, amoonolla getaanoon cikkii bi qajjitoyich, manjiitone.

¹⁵ Tunebaani ebi mooyon waayee yagiichii bi echiigaata, ebi ureechi axaaxoon shaaggemmo biine” iye.

¹⁶ Illa Doono Yeeri Muusich immiti, kenoonaa mecheenochi daggooch, wotta nihoonaa kexooch tookkii beeti busheenochi daggooch beeti, mookkee qociyoo ebine.