Haddoo 3 - Kafa Linguistics Project

Haroonichi Anaami Bushiisheenaꞌo Mooyo

¹ Doono Yeeri Siini guudi toommoochaa Muusina yibbaatehooba Harooninaa Muusinochi shiijjeroo ebine.

² Harooni anaami bushiisheenaꞌo shigo: Bi gutenee bushoo Nadaabi, wotta Abiihi, Elazaarinaa Itamaarinane.

³ Qeesheenaꞌo tunoyich huutteti, qeesheenaꞌo tuneꞌi maddoyich bariti Harooni anaami bushiisheenaꞌo eboshine.

⁴ Tunebaani Nadaabinaa Abiihina Siini barahoochaa yaafeyaani qaaqqoon Doono Yeeri aafooch boonoshi deejjiyooba, bi aafoochaa qitiyeete. Boonoshich bushiishoo aalletoyich, Elazaarinaa Itamaarina baach boonoshi nihoo Harooni kashoona beeti yemeenooch, qeesheenaꞌo tuneꞌi maddee beeheete.

Leweenaꞌo Maddoyich Ceekko

⁵ Doono Yeeri Muusich ishichiye:

⁶ “Lewi yoodoon deebiree, qeeshoo Haroonich boonoshi maddemmoyich, bi aafooch neechibe.

⁷ Danee duukkaanoochaa maddiibee, biinnaa Israꞌeelee asho bullinoyich wocheebeete.

⁸ Danee duukkaaneexi qiico bullin quyoona, Israꞌeeleenaꞌoyich wocheyoona danee duukkaanee daggooch maddebeete.

⁹ Leweenaꞌon Harooninaa bi bushiishoonoyich imbe. Boonoshiyoo Israꞌeeleenaꞌo daggoochee biich ciroona ichetinaꞌone;

¹⁰ qeesheenaꞌo tuneree boonoshi maddemmoyich Harooninaa bi anaami bushiisheenaꞌonon ukkiriibe. Tunebaani bare asho koniyoona danee duukkaanooch bi katinigaata, qitibe” iye.

¹¹ Doono Yeeri Muusich ishichiye:

^12-13 “Ebiyoche ta, maacwaqqo tuneti gutenee bushoochi qoodoyich Leweenaꞌon Israꞌeeleenaꞌo daggoochee deqqeto taane. Gutenee bushoo bulli taacho bi tunetoyich, Leweenaꞌo taacho tunebeete. Gibitsaa shiichii shiijjeti qaabboo bullin ta wuxiyooba, Israꞌeeleenaꞌoochee shiichii shiijjeti qaabboo bullin, ashoonaa gijjoonoochee taach bariito taane; taacho tunebeete. Ta, Doono Yeeri taane” iye.

Leweenaꞌo Haddeyoo

¹⁴ Doono Yeeri Siini barahoochaa Muusich ishichiye:

¹⁵ “Leweenaꞌon boonoshi qaabbechinaꞌo yari yaroonaa boonoshi gumbi gumboona haddibe. Ikke agenoonaa ebiyee damboona tuneti anaamo bullin haddibe” iye.

¹⁶ Muusiyoo Doono Yeeri biich gettitoommon, Lewi asheenaꞌon haddiye.

¹⁷ Boonoshi shigi shigo kooreeꞌi haddeeti Lewi bushiishoo, Gerishooni, Qohaatinaa Meraarinane.

¹⁸ Gerishooni bushiisheenaꞌo boonoshi shigi shigoona boonoshi gumbi gumboona, Libiininaa Shimeꞌinane.

¹⁹ Qohaati bushiisheenaꞌo shigo boonoshi gumbi gumboona Amiraami, Yitsaari, Kebirooninaa Uzeelinane.

²⁰ Meraari bushiisheenaꞌo boonoshi gumbi gumboona Mahilinaa Muushinane. Lewichi gumbeenaꞌo boonoshi qaabbechinaꞌo yari yaroona eboshine.

²¹ Gerishoonichi asheenaꞌoyich Libiinichi gumbee asheenaꞌonaa Shimeꞌichi gumbee asheenaꞌona beetinaꞌone. Eboshiyoo Gerishooni gumbee asheenaꞌone.

²² Ikke agenoonaa ebiyee damboona tuneꞌi haddeeti anaamo bullichi haddoo shabaatte humaa uuche balloone.

²³ Gerishoonichi gumbee asheenaꞌo aabi-gimo waan, danee duukkaanoyee gubbaa boonoshi kaamboon geddii koteheete.

²⁴ Gerishooni gumbee asheenaꞌochi ukkiroo Laꞌeeli bushoo Eliyasaafine.

²⁵ Gerishooni asheenaꞌo danee duukkaanoochaa, danee duukkaanoon, toommeexi bi qeroon, yaafeeti duukkaanee kellee maccillaatoon,

²⁶ danee duukkaanoonaa deejjee gudoonochi guudoona beeti addibaabee maccillaatoon, addibaabee kellee maccillaatoon woderoonaa eboshina tookkii maddooch gaacciibeeti qiico bullinon quyemminaꞌone.

²⁷ Qohaatichi asheenaꞌoyich Amiraami gumbee asheenaꞌo, Yitsaari gumbee asheenaꞌo, Kebirooni gumbee asheenaꞌonaa Uzeeli gumbee asheenaꞌona beetinaꞌone. Eboshiyoo Qohaatichi gumbeenaꞌone.

²⁸ Ikke agenoonaa ebiyee damboona tuneꞌi haddeeti anaamo bulli shimitte humaa shiritte balloone. Yaafe xaaꞌooch maddee ukkirittino boonoshich beetone.

²⁹ Qohaati bushiishoochi gumbeenaꞌo kaamboon gedi boonoshi kotemmo yaafee duukkaanee gaꞌooch, deshi-waaniye.

³⁰ Qohaati gumbee yareenaꞌochi ukkiroo, Uzeeli bushoo Elitsafaanine.

³¹ Taabootoon, madelloon, maqirajjoon, deejjee gudeenaꞌon, Yaafe Xaaꞌoochaa maddoyich gaacciibeeti qiiceenaꞌon, Yaafe Xaaꞌeexi Yaafee gimooch beeti maccillaateenaꞌonaa eboshina tookkii maddoyich gaacciibeeti qiico bullinon quyemminaꞌone.

³² Leweenaꞌo toommooch ukkiroo, qeeshoo Harooni bushoo Elazaarine. Biyoo Yaafe Xaaꞌooch maddee beetinaꞌo toommooch ukkiroone.

³³ Meraarichi gumbeenaꞌo Mahileenaꞌonaa Muusheenaꞌonane. Eboshiyoo Meraarichi gumbeenaꞌone.

³⁴ Ikke agenoonaa ebiyee damboona tuneꞌi haddeeti anaamo bullichi haddoo shiritte humaa gutte balloone.

³⁵ Meraarichi gumbee yareenaꞌochi ukkiroo, Abihayili bushoo Tsureeline. Kaamboon gedi boonoshi kotemmo yaafeeti duukkaanee dambi-waaniye.

³⁶ Meraari bushiisheenaꞌo quyemmo, yaafee duukkaanee shaaqqeenaꞌon, tuggeenaꞌon, tureenaꞌon, tureenaꞌo neexemmi baateenaꞌon, eboshichi qiiceenaꞌo bullinaa eboshina tookkii maddoyich gaacciibeeti qiico bullinoniye.

³⁷ Ebiyoommon wotta addibaabee guudoona beeti giimbeenaꞌonaa boonoshi neexemmi baateenaꞌonon, boonoshi xogeenaꞌonaa boonoshi wodereenaꞌonon quyemminaꞌone.

³⁸ Muusi, Harooninaa bi bushiishoona yaafee duukkaanoo beetoochaa aabi-keyo waan danee duukkaanee ciinooch boonoshi kaamboon gedi kotemminaꞌone. Boonoshiyoo Israꞌeeleenaꞌochi qoodoyich yaafee duukkaanoochaa maddemminaꞌone. Bare asho arooch bi katinigaata, qitemmone.

³⁹ Doono Yeerichi getoona Muusinaa Haroonina hadditi Leweenaꞌo, ikke agenoonaa ebiyee damboona tuneti anaaminaꞌo bulli, boonoshi gumbi gumboona haddeetinaꞌo hiyaa gutte humeenaꞌone.

Leweenaꞌo Gutenee Bushiisheenaꞌochi Qoodoyich Doono Yeerich Keyo

⁴⁰ Doono Yeeri Muusich ishichiye: “Israꞌeeleenaꞌochi gutenee bushiishoo bullin haddibe. Ikke agenoonaa ebiyee damboona tunetinaꞌon haddibe. Boonoshi shigoon koori yeshe.

⁴¹ Israꞌeeleenaꞌochi gutenee bushiishoo bullichi qoodoyich Leweenaꞌon, Israꞌeeleenaꞌo gijjoochee shiichii shiijjeto bullichi qoodoyich Leweenaꞌochi gijjeenaꞌon taach kichibe. Ta, Doono Yeeri taane” iye.

⁴² Ebich Muusi Doono Yeeri gettitoommon, Israꞌeeleenaꞌochi gutenee bushiishoo bullin haddiye.

⁴³ Ikke agenoonaa ebiyee damboona tuneti, boonoshi shigi shigoona haddeeti anaami gutenee bushiisheenaꞌo bulli hiyaa gutte humaa gutte ballaa shabaa keeminaꞌone.

⁴⁴ Doono Yeeri Muusich ishichiye:

⁴⁵ “Israꞌeeleenaꞌochi gutenee bushiishoo bullichi qoodoyich Leweenaꞌon, boonoshi gijjeenaꞌochi qoodoyich Leweenaꞌochi gijjeenaꞌon kichibe. Leweenaꞌo taacho tunebeete. Ta, Doono Yeeri taane.

⁴⁶ Leweenaꞌochi haddoyee beshiti gutte ballaa shabaa keejje Israꞌeeleenaꞌochi gutenee bushiisheenaꞌon biishoyich,

⁴⁷ ikkikke ashi qelloona uuchi uuche sheqeelee birewoon yaafee kechi machoona qocaa deꞌe. Ikke sheqeelo aaraa gutte giraam bedoone.

⁴⁸ Ebi biishee gijjoon Harooninaa bi bushiishoonoyich imbe” iye.

⁴⁹ Ebich Muusi Leweenaꞌonaa biisheeꞌi beshii echetinaꞌo waanee biishee gijjoon deqqiye.

⁵⁰ Israꞌeeleenaꞌochi gutenee bushiishoo waanee yaafee kechi machoona qocaa humaa keejje ballaa shichaa uuche sheqeeloon deqqiye.

⁵¹ Muusi Doono Yeeri biich gettiti qaaroommon biishee gijjoon Harooninaa bi bushiisheenaꞌonoyich immiye.