Haddoo 27 - Kafa Linguistics Project

Tselofaadichi Maache Bushiisheenaꞌo Mooyo

¹ Minaasichi bushoo Makirichi bushoo Gilaadichi bushoo Hefeerichi bushoo Tselofaadichi maache bushiisheenaꞌo Yooseefichi bushoo Minaasichi gumbee ashi daggeexinaꞌone. Boonoshi shigo Mahilaahi, Noohi, Hogili, Milikinaa Tiritsina getteehe.

² Boonoshiyoo danee duukkaanee kellooch, Muusi aafooch, qeeshoo Elazaari aafooch, ukkireenaꞌonaa iiteenaꞌo bullinochi aafoochoo neexeechii ishichiyeete:

³ “No nihoo anaami bushoon shiyaanoon barahoochaa qititone. Bi qitito bi axaaxoonani Doono Yeeri toommooch tiyiti Qoraahichi asheenaꞌona tookkii bi guuphitoyich toonoone.

⁴ Anaami bushiishoon shimo bi qajjitoyich no nihoochi shigo gumbeenaꞌo daggoochee bi aallemmo amoyichiye? No niheesheenaꞌo daggooch iristoon noochoo imbote” iyeete.

⁵ Muusiyoo boonoshi mooyon Doono Yeeri aafooch giddiihe.

⁶ Doono Yeeriyoo Muusich ishichiye:

⁷ “Tselofaadichi maache bushiisheenaꞌo echeto tatoone. Boonoshi niheesheenaꞌo daggooch boonoshi qoodee iristoon boonoshich imbe. Boonoshi nihoochi iristo boonoshich ichebe.

⁸ “Israꞌeeleenaꞌoyichoo ishichibe: ‘Ikke asho anaami bushoon shiyaanoon bi qitigaata, bi iristoon bi bushech imbote.

⁹ Bushee biich aallegaata, bi iristoon bi maneenaꞌoyich imbote.

¹⁰ Manoo biich aallegaata, bi iristoon bi niheeshoyich imbote.

¹¹ Niheeshoo biich aallegaata, bi gumbee ashoochee katini bi xiboyich bi iristoon imbote. Biyoo ebi iristoon woraashibe. Ebiyoo Doono Yeeri ta, Muusich ta gettetoommon Israꞌeeleenaꞌoyich doyoonaa qociyoona tunebe itone’ gete” iye.

Yaasi Muusichi Xaaꞌooch Kereyoo

¹² Doono Yeeri Muusich ishichiye: “Abariimi guudooch keyiichi, Israꞌeeleenaꞌoyich ta immeti showoon ciine.

¹³ Ebi showoon ne ciinnetoyee gubb, ne manoo Haroonichoommon newoo wotta ne qaabbechinaꞌo waan xaꞌeyemmo neene.

¹⁴ Ebiyoo Tsiini barahooch beeti aachi gashoochaa iiteenaꞌo ta toommooch tiyiyooba asheenaꞌo aafoochaa ta getoon quyoona yaafoo tuniiꞌi taan oogiyoo ittoshi qajjitoyichiye” iye. Ebi aaco Tsiini barahooch, Qadeesh beeti Meriibi aacone.

¹⁵ Muusiyoo Doono Yeerich ishichiye:

^16-17 “Asho kasho bulli Nuggishoo Doono Yeero! Doono Yeeri ne asheenaꞌo qiddaalli bagoommon boonoshi tuneyaachemmoyich, boonoshi aafooch keyi giyemmi, wotta boonoshin yaabi kichi giijjemmi ashoon hini iiteenaꞌo toommooch ukkiriibe” iye.

¹⁸ Aroochee Doono Yeeri Muusich ishichiye: “Ayaano bi toommooch beeti asho, Nuuni bushoo Yaasin daami ne kishoon bi toommooch kotiibe.

¹⁹ Biinoo qeeshoo Elazaarinaa iitoo bullinochi aafooch neechibe. Boonoshi ciini beetaa biin ukkiriibe.

²⁰ Iitoo bulli biich deꞌa gettemmoyich ne oogoochee biich imbe.

²¹ Qeeshoo Elazaari Uriimoona ta daaggoon ariibeeto bi tunetoyich, biyoo Elazaarina degeebe. Biinnaa Israꞌeelee iitoo bullina Elazaarichi getoona keyeete; bi getoonoo gibeete” iye.

²² Muusiyoo Doono Yeeri gettitoommon tuniihe. Yaasinoo daammii qeeshoo Elazaarinaa iitoo bullinochi aafooch neechiye.

²³ Aroochee Doono Yeeri biich gettitoommon, bi kishoon bi toommooch kotiiꞌi ukkiriihe.