Haddoo 24 - Kafa Linguistics Project

¹ Balaamiyoo Doono Yeeri Israꞌeeleenaꞌon diiriya bi qaawoon bi ariitoyich, aafichoommon kaayiya hamaanoone; tunebaani barahoo waan guuddii ciinniye.

² Biyoo boonoshi yoodi yoodoona kaamboon geddiꞌi koteti Israꞌeeleenaꞌon beeggiye. Yeerichi Ayaano bi toommooch waahe.

³ Biyoo ishichii yibbaatooch giyiye: “Beꞌoori bushoo Balaamichi keemo, bi aafo gaxxeeti ashi qaaro, ebine:

⁴ Yeerichi qaaroon waayeebeeto, Beshe Hakkechi Nuggishoochi yaaꞌoon beeggiibeeto, showooch guufeto, tunebaani bi aafo gaxxeeto, ishichiye:

⁵ “Yaaqobo, ne duukkaaneenaꞌo, Israꞌeelo, ne beeyi xaaꞌeenaꞌo, am shaahoon gaaweheete!

⁶ “Bambeenaꞌoomminaꞌo, aachi gashooch beeti bechee mixinaꞌoomminaꞌo, Doono Yeeri bechiti, ereeteenaꞌoomminaꞌo, aachi gashooch beeti yigee mixinaꞌoomminaꞌone.

⁷ Boonoshi gaanneenaꞌoochee aaco kechemmone; boonoshi yareenaꞌoo wodde aacon danemminaꞌone. “Boonoshi taatoo, Agaagiyee beshemmone; boonoshi taatittinoo oogemmone.

⁸ “Boonoshin Gibitsee kichito, Yeerine. Boonoshi giidoo gaahee giidoommone. Boonoshi etteenaꞌo tuneti aageteenaꞌon aalliyemminaꞌone; boonoshi shaawushoon tiishi buriccemminaꞌone; shangoona boonoshin kochemminaꞌone.

⁹ Daaheroochoommon miqqetone; daaherechoommonoo showooch qeyitone; biin shuurikkemmo, konine? “Neen diirimmo bulli diireeto tunebe; neen uppimmo bulli uppeto tunebe” iye.

¹⁰ Balaaqi Balaamin oogichiꞌi kaarehe; bi kishoonoo qahiye. Aroochee Balaaqi Balaamich ishichiye: “Ta etteenaꞌon ne uppemmoyich ceekkiihoye; tunebaani ne keejje wottoon boonoshin diirihine.

¹¹ And illa, ne showooch tiyi hambe. Neech gaacca ito taane; tunebaani Doono Yeeri neech gaacoon mucciitone” iye.

¹² Aroochee Balaami Balaaqich ishichiye: “Ta waan ne wocheti ne wocheyechinaꞌoyich,

¹³ ‘Balaaqi bi kexooch ceenniti birewoonaa aachoonon taach bi immimmo gaatoona, Doono Yeerichi qaaroon ceechoyee besh, ta daaggoona deꞌoon woyee gondoon tuniyoon hakkaache. Doono Yeeri gettimmon baach gettemmo taane’ iyaꞌa getaano taane?

¹⁴ Andoo ebiyoche ta asheenaꞌo waan hammaabeeto taane. Eke ne waatee, hini asheenaꞌo woyemmi yemeenooch ne asheenaꞌo toommooch boonoshi tuniyemmon neech getone” iye.

Balaamichi Awuddinnee Yibbaatoo

¹⁵ Aroochee ishichiꞌi yibbaatooch giyiye: “Beꞌoori bushoo Balaamichi keemo, bi aafo gaxxeeti ashi qaaro, ebine:

¹⁶ Yeerichi qaaroon waayeebeeto, Beshoo Yeer waanee ariyoon daneto, Beshe Hakkechi Yeerichi yaaꞌoon beeggiibeeto, showooch guufeto, bi aafoo gaxxeeto, ishichiye:

¹⁷ “Biin beeggaabeete; tunebaani and toonoone; biin ciinnaabeete; tunebaani katinoon toonoone; Yaaqob waanee xojjeno kechemmone; Israꞌeeleenaꞌo daggoochee taatittinee gumbo kechemmone; Moꞌabeenaꞌochi qelloon gaakkemmone; Seeti bushiisheenaꞌochi qelli koofon kophemmone;

¹⁸ Edoomin koyi wochemmone; bi etto Seyirinoo koyi yechemmone; Israꞌeeli kupphe kupphe hammemmone.

¹⁹ Yaaqobichi shiijjeroochee neexi hajjemmo woyemmone; katemoochee muriccii echetinaꞌon aalliyemmone” iye.

Balaamichi Ciireexi Yibbaatoo

²⁰ Balaami yaaꞌoona Amaleeqeenaꞌon beeggiꞌi, ishichii yibbaatooch giyiye: “Amaleeqi aageteenaꞌo daggoochee ikkinnoone; tunebaani ciiroochaa aallemmone” iye.

²¹ Qeeneenaꞌon beeggiꞌi, ishichii yibbaatooch giyiye: “Ne beeyi xaaꞌoo manjoone; ne kexo xaqqee daggooch hakketone;

²² tunebaani Qeenee ashoocho, Ashuuri neen keccii daamiyooba, hidaa aallemmo neene” iye.

²³ Aroochee ishichiꞌi yibbaatooch giyiye: “Yeeri ebin tuniihooba, woowo, kashoona beeyemmo, konine?

²⁴ Ginechinaꞌo markabeenaꞌona Kitiimee showee daaroochee woyemminaꞌone; Ashuuree showoonaa Ebeeree showoonon koyi wochemminaꞌone. Ciiroochaa boonoshiyoo aallemminaꞌone” iye.

²⁵ Aroochee Balaami bi showooch wottee hammiye; Balaaqiyoo bi gommon yechiye.