Haddoo 23 - Kafa Linguistics Project

Balaamichi Batti Batti Yibbaatoo

¹ Balaamiyoo Balaaqich ishichiye: “Shabaatte deejjee gudoon taach hiniich shuunebe. Shabaatte wuronaa shabaatte bagee baaddoonon taach hiniich qanniibe” iye.

² Balaaqiyoo Balaami biich gettitoommon qanniihe. Balaaminaa Balaaqina deejjee gudo bi ikkikkooch ikke wuronaa ikke bagee baaddoonon deejjiyeete.

³ Aroochee Balaami Balaaqich ishichiye: “Ta okk ebiich hammemmo taane; ne hini ne deejjee gaꞌooch neexebe. Diqqich Doono Yeeri taanna daneya woyemmone. Taach bi bekkiimmi mooyo amoonolla neech gettemmo taane” iye. Aroochee ikke xoobooch hammiye.

⁴ Yeeriyoo Balaamina danehe. Balaamiyoo biich ishichiye: “Shabaatte deejjee gudoon shuuneto taane. Are deejjee gudo bi ikkikkooch ikke wuronaa ikke bagee baaddoonon deejjito taane” iye.

⁵ Doono Yeeriyoo Balaamich bi wochoon gettiꞌi, “Balaaq waan wotteree ebin biich gete” iye.

⁶ Balaami wottee waaꞌi, Balaaqinaa Moꞌabee iraasheenaꞌo bullina micciibeeti deejjee gaꞌooch neexee beetinaꞌon beeggiye.

⁷ Balaamiyoo ishichiꞌi yibbaatooch giyiye: “ ‘Waaree taach Yaaqobin ufe. Waaree taach Israꞌeelin giishiibe’ iꞌi, Araamee showoochee, aabi-keyo waani guudoochee, Moꞌabee taatoo Balaaqi taan deebiye.

⁸ Yeeri ufaanoon, aabichi ufote? Doono Yeeri ufaanoon, aabichi ufote?

⁹ Guudinaꞌo toommoochaa boonoshin ciinnaabeeto taane; geppeenaꞌo toommoochaa boonoshin beeggaabeeto taane. Aageteenaꞌona tookkii bacceyaanoon bariꞌi boonoshi qelloona koteebeeti asheenaꞌone.

¹⁰ Mattiqutte Yaaqobichi shiijjeroon hakki haddemmo, kone? Israꞌeelichi shiijjeree heecoon hakki haddemmo, kone? Tawoo cadiqo qitoommon qitibone; ta ciiroo wotta bi ciiroon shaahibe” iye.

¹¹ Aroochee Balaaqi Balaamich ishichiye: “Aabichaa ebin taach shuunenne? Ta etteenaꞌon ne uppemmoyich neen deeboye. Tunebaani boonoshin diirihinani, amoonolla taach tuniyaano neene” iye.

¹² Balaamiyoo wochiꞌi, “Doono Yeeri taach gettiton baachiye ta gettemmo” iye.

Balaamichi Guttinnee Yibbaatoo

¹³ Balaaqi Balaamich “Eke ne waataa bare xaaꞌooch hambone; aroochaa bullin tuneyaanoon goceexinaꞌon beeggemmo neene; ebi aroochaa boonoshin taach ufe” iye.

¹⁴ Ebina Fisigi guudi toommooch beeti Yofiimi gaddooch biin daammiye. Arooch shabaatte deejjee gudoon shuunehe. Deejjee gudo bi ikkikkooch ikke wuronaa ikke bagee baaddoonon deejjiye.

¹⁵ Balaamiyoo Balaaqich “Doono Yeerina daneya okk ebiich hammemmo taane; ne hini ne deejjee gaꞌooch neexebe” iye.

¹⁶ Doono Yeeri Balaamina danee bi wochoon biich gettiꞌi, “Balaaq waan wotteree ebin biich gete” iye.

¹⁷ Balaami wottee waaꞌi; Balaaqi Moꞌabee iraasheenaꞌo bullina tookkii micciibeeti bi deejjee gaꞌooch neexee beeton beeggiye. Balaaqiyoo “Doono Yeeri ama iye?” ii echehe.

¹⁸ Balaamiyoo ishichiꞌi yibbaatooch giyiye: “Balaaqo, tibe; waayebe! Tsifoori bushoocho, ta waanee ellebe!

¹⁹ Kootoon bi koottemmoyich, Yeeri asho toonoone. ‘Amoyich ebin tuniitote’ bi gettemmoyich, ashi bushoo toonoone. Bi gettiton, aroon tuniihe; bi gibenikkiton, aroon ceechiye.

²⁰ ‘Diiribe’ getteeto taane; bi diiriton ta shaddoo hakkaache.

²¹ Gubbich, Yaaqobi toommooch shaggemmi gonde mooyo bekkeyaanoone; Israꞌeel waanoo shaggemmi duꞌo aalloone. Boonoshi Nuggishoo Doono Yeeri boonoshina tookkii beetone; taatoyich ilileebeeti ililoo boonoshi daggoochiye.

²² Boonoshin Gibitsee kichito, Yeerine. Boonoshi giidoo gaahee giidoommone.

²³ Yaaqobi toommooch iicoo shuuneyaache; Israꞌeeli toommoochoo qaaxo shuuneyaache. Illa and, ‘Yaaqobich, Israꞌeelichoo Yeeri tuniiton beegote’ getteyemmone.

²⁴ Ebiyoche asheenaꞌo maache daaherechoommon tiyemminaꞌone. Bi yechiton bi maammi wottoon, bi wuxitochi damoon bi uchimmi wottoon, tokketetaani daaheroochoommon tiyemminaꞌone” iye.

²⁵ Balaaqiyoo Balaamin “Ufon ne qayi gaatoona boonoshin diiriyaahine” iye.

²⁶ Tunebaani Balaami biich wochiꞌi, “Doono Yeeri taach gettimmon baach tuniyemmo ta tunoon neech getaano taane?” iye.

Balaamichi Keejjinnee Yibbaatoo

²⁷ Balaaqi Balaamin “Eke ne waataa wotta neen bare xaaꞌooch daambona. Diqqich aroochaa boonoshin taach ne uppemmoyich Yeeri daaggemmone” iye.

²⁸ Ebich Balaaqi Balaamin aroochaa barahoo dugilla ciicheebeeti Feꞌoori guudi cullullooch daammiye.

²⁹ Balaamiyoo Balaaqin “Shabaatte deejjee gudoon taach shuunebe. Shabaatte wuronaa shabaatte bagee baaddoonon taach qanniibe” iye.

³⁰ Balaaqiyoo Balaami gettitoommon tuniihe. Deejjee gudo bi ikkikkooch ikke wuronaa ikke bagee baaddoonon deejjiye.