Haddoo 22 - Kafa Linguistics Project

Balaaqi Balaamin Wochiyoo

¹ Ebiyee gubb, Israꞌeeleenaꞌo tiyii qaxiriyeete. Yaariki katemee ciinooch, Yoordaanoosi aachee beqach beeti Moꞌabi gaddooch kaamboon geddii koteheete.

² Tsifoori bushoo Balaaqi Israꞌeeleenaꞌo Amooree asheenaꞌo toommooch boonoshi tuniito bullin waayehe.

³ Israꞌeeleenaꞌo dofee asheenaꞌo boonoshi tunetoyich, Moꞌabeenaꞌo oogichii shattiyeete; boonoshi naboona oogichii keqqiyeete.

⁴ Moꞌabee asheenaꞌo Miidiyamee geeneenaꞌoyich ishichiyeete: “Ebi dofee asheenaꞌo gattoo gaddeexi came mocoon hidii mamoommon, no guudoona beeto bullin hidi aalliyemminaꞌone” iyeete. Ebiyooba Moꞌabee showooch taateꞌi beeti, Tsifoori bushoo Balaaqi,

⁵ Amawee showooch, Efiraaxisi aachi gashooch, Fetoori katemooch beeti Beꞌoori bushoo Balaamich ishichi boonoshi gettemmoyich, wocheyechinaꞌon daachiihe. Biyoo ishichiye: “Ebiyoche boonoshi meetoochee tiyitona showee aafoon guuppiti asheenaꞌo Gibitsee kechii waaꞌi, ta katinooch kotetinaꞌone.

⁶ Ebi asheenaꞌo ta asheenaꞌoyee beshe giidechinaꞌo boonoshi tunetoyich, waaree taach ne uppemmoyich neen qollehoye. Diqqich boonoshin koyiree ta showoochee yoohon hakkemmo taane; ne diirito diireeto, ne uppetoo uppeto bi tunoon ariibeeto taane” iye.

⁷ Ebich Moꞌabee showee geeneenaꞌonaa Miidiyamee showee geeneenaꞌona ufoyich qocceyemmi gijjoon boonoshi kishooch yechiꞌi hammiyeete. Balaam waan waaꞌi Balaaqi wocheton gettiyeete.

⁸ Biyoo boonoshich ishichiye: “Hanaach hiniich ittoshi qeyee, Doono Yeeri taach gettimmon yaach ittoshich gettemmo taane” iye. Ebich Moꞌabee iraasheenaꞌo bi waan qeyiyeete.

⁹ Yeeriyoo Balaam waan waaꞌi, “Ebi neenna tookkii beeti asheenaꞌo, koni konine?” iye.

^10-11 Balaamiyoo Yeerich ishichiye: “Moꞌabee taatoo, Tsifoori bushoo Balaaqi ta waan wochee deejjiti asheenaꞌone. Biyoo ‘Ebiyoche, boonoshi meetoochee tiyitona showee aafoon guuppiti asheenaꞌo Gibitsee kechii waatinaꞌone. Eke waaree taach ufe. Diqqich boonoshin koyiree ta showoochee yoohon hakkemmo taane’ iꞌi wochetone” iye.

¹² Yeeriyoo Balaamin “Boonoshina tookki hammaahine. Diireeti asheenaꞌo boonoshi tunetoyich, ebi asheenaꞌon uppaahine” iye.

¹³ Balaamiyoo harooch tiyiꞌi, Balaaqi wocheti iraasheenaꞌoyich ishichiye: “Ittoshi showooch wottebote. Ittoshina tookki ta hammemmoyich, Doono Yeeri daaggaanoone” iye.

¹⁴ Ebich Moꞌabee iraasheenaꞌo Balaaq waan tiyii hammiꞌi, “Balaami noonna tookkii woyemmon qajjitone” iyeete.

¹⁵ Balaaqiyoo wochinnoon aafichinaꞌoyee beshe woddeenaꞌonaa arichetinaꞌona tuneti iraasheenaꞌon daachiihe.

¹⁶ Boonoshiyoo Balaam waan hammiꞌi, biich ishichiyeete: “Tsifoori bushoo Balaaqi ishichiꞌi noon wochetone: ‘Amolla tunetaa echeyaanoon, ta waan ne woyemmoyich neen qollehoye.

¹⁷ Gaawichiree neech gaaccemmo taane; taan ne echemmi mooyo amoonolla neech tuniyemmo taane. Waaree taach hini asheenaꞌon ufe’ itone” iꞌi gettiyeete.

¹⁸ Tunebaani Balaami boonoshich ishichiꞌi wochiye: “Balaaqi bi kexooch ceenniti aachoonaa birewoonon taach bi immitaanona, giishonoo tuneba oogoona ta Nuggishoo Doono Yeerichi qaaroon shaaddo taach hakkeyaache.

¹⁹ Andoo tunetaa, Doono Yeeri taach gettemmi bare mooyo beegaata ta ariyemmoyich, ittoshiyoo hanaachi xum hiniich ittoshi qeyemmoyich qollehoye” iye.

²⁰ Yeeriyoo Balaam waan xumoona waaꞌi ishichiye: “Asheenaꞌo waato neen ceegga bi tunegaata, tiyiree boonoshina tookki hambe. Tunebaani ne tuniyemmo neech ta gettemmi mooyon baachiye” iye.

Balaaminaa Bi Kureenochi Mooyo

²¹ Ebich Balaami maaddoona tiyii, bi kureech koroon haxxiꞌi Moꞌabee iraasheenaꞌona tookkii hammiye.

²² Tunebaani bi hammitoyich, Yeeri oogichiꞌi kaarehe. Doono Yeerichi maraakoo gommooch neexeꞌi bi gommon hicciye. Areegaata, Balaami kureen yebbeꞌiniye bi beeto. Gutte bi naayinaꞌoo biinna tookkii beetinaꞌone.

²³ Kureyoo Doono Yeerichi maraakoo goraadoon kaaccii bi kishooch yechiꞌi gommooch beeton beeggahan. Aroochee gommoyee bara wottaꞌa goyee daggooch giyahan. Balaamiyoo gommo waan wochoyich kureen yexxiye.

²⁴ Doono Yeerichi maraakoo woyinee goyee daggooch okkinaa hachinon xaqqee uxeroo uxereeti xebbe gommooch neexehe.

²⁵ Kureyoo Doono Yeerichi maraakoon beeggaa uxeroo waan xuuphaꞌa Balaami baatoon uxeroona xaaqqiyan. Ebich biyoo wochinnoon kureen yexxiye.

²⁶ Aroochee Doono Yeerichi maraakoo aaf hammiꞌi qanna woyee yoocha besheyemmi xaaꞌoo aalli kaattooch neexehe.

²⁷ Kureyoo Doono Yeerichi maraakoon beeggaꞌa, bekkech miqqahan. Balaamiyoo oogichii ippehe. Kureenoo bi gumboona mutehe.

²⁸ Aroochee Doono Yeeri kureechi noonoon biichiye. Biyoo Balaamich “Keejje wottoon taan ne yexxeto, neen amoon ta halleenane?” iyan.

²⁹ Balaamiyoo kureyich ishichiye: “Taan ne kaachetoyichiye; ta kishooch goraado beemmo gaata, and neen wuxesho taane” iye.

³⁰ Kureyoo Balaamich ishichiyan: “Meeti yemeenoochee tiijjaꞌa hanaach beddaahaa ne yebbeebeeti ne kuree toone taane? Iberoochaa ebin tuniyoo ta doyoone?” iyan. Balaamiyoo “Ebiyoommon tunii ariyaanee neene” iye.

³¹ Doono Yeeriyoo Balaami aafoon qechaa, goraadoon kaaccii yechiꞌi gommooch neexeebeeti maraakoon beeggiye. Ebi maraakoyichoo yittii, baroona showooch guufehe.

³² Doono Yeerichi maraakoo biich ishichiye: “Ne kureen keejje wottoon ne yexxeto, amoyichiye? Ne gommo ta aafooch kaamoo tuno bi qajjitoyich, gommon hici bajja kecheto taane.

³³ Kureyoo taan beeggaꞌa, ta aafoochee keejje wottoon badd wottehane. Ta aafoochee badd bi wotteyaan gaata, neen wuxiichi biin wodiyesho taane” iye.

³⁴ Balaamiyoo Doono Yeerichi maraakoyich ishichiye: “Axaaxoon shuuneto taane; ta gommon hicoyich gommooch ne neexoon ariyaano taane. And illa ta gommo ne aafoochaa gondo bi tunegaata, ta kexooch wottebona” iye.

³⁵ Doono Yeerichi maraakoo biich ishichiye: “Hamon boonoshina tookki hambe. Tunebaani ne gettemmo, ta gettemmi qaaroon baachiye” iye. Ebina Balaami asheenaꞌona tookkii hammiye.

Balaaqinaa Balaamina Dano

³⁶ Balaaqi Balaami womon waayeꞌi bi showee daarooch, Arinooni aachi gashooch beeti Moꞌabee katemooch biinna daneya hammiye.

³⁷ Balaaqiyoo Balaamich ishichiye: “Ta waan ne woyemmoyich ta wochiitaa amoyich kaataꞌa woyemmon qajjenne? Iberoochaa neech gaacon mawiyehote?” iye.

³⁸ Balaamiyoo Balaaqich “Ebiyoche ne waan waato taane. Tunebaani amee mooyonona getoyich ta qelloona hakkoo taach aalloone. Yeeri taach gettimmon baachiye ta gettemmo” iye.

³⁹ Aroochee Balaami Balaaqina tookkii hammiye. Gutteꞌi Qiriyaat Huzooti katemooch hammiyeete.

⁴⁰ Balaaqiyoo miimonaa bagoonon deejjiye; are meenoochee Balaaminaa biinna tookkii beeti iraasheenaꞌonoyich daachiihe.

⁴¹ Bi dechara Balaaqi Balaamin yechiꞌi, damba Baamoot Baꞌaal kechiye. Balaamiyoo aroochaa Israꞌeeleenaꞌoochee giishecheenaꞌon beeggiye.