Haddoo 21 - Kafa Linguistics Project

Israꞌeeleenaꞌo Kanaaneenaꞌon Horimaa Kochii Wochoo

¹ Negeebi barahooch koteti Kanaanee asho, Araadi katemee taatoo Israꞌeeleenaꞌo Ataariimi gommona boonoshi womon waayehe; biyoo Israꞌeeleenaꞌon kochiꞌi boonoshi daggoochee giisheche asheenaꞌon kecciye.

² Israꞌeeleenaꞌoo Doono Yeer waan ishichiꞌi mookkeheete: “Ebi asheenaꞌon no kishooch beshii ne imigaata, boonoshi katemoon timoo tuniiree ciroona aalliyemmo noone” iyeete.

³ Doono Yeeriyoo boonoshi qolloon waayehe. Kanaaneenaꞌon boonoshich beshii bi imaa, boonoshinaa boonoshi katemoonon ciroona aalliiheete. Ebich are xaaꞌoon Horimi ii shigiiheete.

Gooshoochee Shuuneeti Dingero

⁴ Israꞌeeleenaꞌo Edoomee showee guudoona hamma, Hoori guudoochee tiyii Ceelle baharo waani gommona qaxiriyeete. Gommi naboona asheenaꞌochi kasho duꞌehe.

⁵ Asheenaꞌoo Yeerinaa Muusinochi toommooch tiyiꞌi ishichiyeete: “Maayo, aaco aalli hini barahoochaa no qitemmoyich Gibitsee amoyich noon kichiyote? Hini gaacaalli maayo noon beelletiitone” iyeete.

⁶ Aroochee Doono Yeeri qoppiibeeti dingereenaꞌon boonoshi daggooch bi deejjaa, meeti Israꞌeeleenaꞌon qoppii wuxiyeete.

⁷ Asheenaꞌo Muus waan waaꞌi ishichiyeete: “Neennaa Doono Yeerinochi toommooch gonde mooyon yibbaatoona xuqqeto noone. Dingeroon no waanee bi wokkiyemmoyich Doono Yeer waan nooch corootibe” iyeete. Muusiyoo asheenaꞌoyich corootiye.

⁸ Doono Yeeriyoo Muusich ishichiye: “Dingeroon gooshoochee shuuneree mixooch yoode. Qoppeto bulli aroon bi ciinigaata wodemmone” iye.

⁹ Muusiyoo dingeroon gooshoochee shuuneꞌi mixooch yooddiye. Dingero qoppiti asho bulli ebi gooshoochee shuuneeti dingeroon ciinniꞌi wodii beehe.

Israꞌeeleenaꞌo Moꞌabee Showooch Qaxiroo

¹⁰ Aroochee Israꞌeeleenaꞌo tiyii qaxiriyeete. Oboot kaamboon geddii koteheete.

¹¹ Obootee tiyii qaxiriꞌi, Moꞌabee showee ciinooch beeti barahooch, aabi-keyo waan Iye Abaariim kaamboon geddii koteheete.

¹² Aroochee tiyii qaxiriꞌi, Zereedi bambooch kaamboon geddii koteheete.

¹³ Wotta aroochee tiyii qaxiriꞌi, Amooree asheenaꞌo showooch beddaahaa shaggiibeeti barahooch, Arinooni aachee beqach beeti xaaꞌooch kaamboon geddii koteheete. Arinooni aaco beeto Moꞌabeenaꞌonaa Amooreenaꞌonochi showee danoochiye.

¹⁴ Doono Yeerichi Ginee Macaafoochaa, “Sufaaha beeti Waheebi, Arinooni bamboo,

¹⁵ Ari katemooch beddaahaa beeti, Moꞌabee showooch shaggiibeeti bambeenaꞌo” getaa bi kooreeto ebichiye.

¹⁶ Aroochee aachi oppo beeti Beeri qaxiriyeete. Ebi aroochaa Doono Yeeri Muusich, “Asheenaꞌon kicibe; ucheyemmi aacon boonoshich immemmo taane” itone.

¹⁷ Arooba Israꞌeeleenaꞌo ebi shoddoon shoddeheete: “Hini aachi oppoocho, aacon kichibe! Eke biich shoddoon shoddebote.

¹⁸ Taatee gumboonaa boonoshi gumboona, woraaferasheenaꞌonaa iraasheenaꞌona iijjiti, aachi oppeenaꞌoyich shoddebote” iyeete. Ebiyee gubb, barahoochee Matanaah hammiyeete.

¹⁹ Wotta Matanaahee Nahaleel, Nahaleelee Baamoot,

²⁰ Baamootee Fisigi guudi cilloochaa barahoo dugilla ciicheebeeti Moꞌabi barahooch beeti bambooch qaxiriyeete.

Israꞌeeleenaꞌo Taatoo Sihooninaa Taatoo Ooginon Kochii Wochoo

²¹ Israꞌeeleenaꞌo Amooree taatoo Sihoon waan ishichiꞌi wocheyechinaꞌon daachiiheete:

²² “Ne showoona kuxi no beshemmoyich nooch daaggibe. Goyooch tuneba woyinee budooch shagaachemmo noone; oppeexi ne aacoocheenoo uyaachemmo noone. Ne showoon no beshemmi wottoon taatoochi gamini gommona baach hammemmo noone” iyeete.

²³ Tunebaani Sihooni bi showoona boonoshi beshemmoyich daaggaanoone. Bi asheenaꞌon bulli ikkooch kiciye; boonoshiyoo Israꞌeeleenaꞌon kocha kechiyeete. Barahooch beeti Yahaatsi katemooch waaꞌi, Israꞌeeleenaꞌona koyeheete.

²⁴ Tunebaani Israꞌeeleenaꞌo boonoshin kochii wochiyeete. Arinooni aacoochee tiijjiꞌi Yaabooqi aacooch beddaahaa beeti boonoshi showoon deqqiyeete. Amooneenaꞌo showee daaro manjoo bi tunetoyich, arooch besheyaaneenaꞌone.

²⁵ Israꞌeeleenaꞌo Amooreenaꞌo katemoo bullin deqqiyeete. Heshiboninaa bi guudoona beeti gishiishi katemoo bullinon deqqii arooch koteheete.

²⁶ Heshiboniyoo Amooreenaꞌo taatoo Sihoonichi katemoone. Biyoo aaf Moꞌabee taatoon kochiꞌi Arinooni aacooch beddaahaa beeti bi showoo bullin deqqitone.

²⁷ Ebich shoddoona ishicheehe: “Heshibon wobote; biyoo wochi shuuneebe. Sihooni katemoo wochinnoon neexebe.

²⁸ Qaaqqoo Heshibonee kechiye; qaaqqee aaxxo Sihooni katemoochee waahe; Moꞌabi beeti Ari katemoon aalliihe, Arinooni beeti qaalle xaaꞌeenaꞌon maahe.

²⁹ Moꞌabo, neech woowo! Kemooshich goyinneebeeti ashoocho, aalleto neene. Bi anaami bushiishoon aashooch, bi maache bushiishoon kecooch, Amooreenaꞌo taatoo Sihoonich beshii immitone.

³⁰ Tunebaani and, boonoshi shiijjeroo, Heshibonee Diiboon beddaahaa aalletone. Nofaaha beddaahaa, Medeeb beddaahaanoo boonoshin happiyone” getteehe.

³¹ Ebina Israꞌeeleenaꞌo Amooreenaꞌo showooch koteheete.

³² Muusi qiiddechinaꞌon Yazeeri katemooch daachiihe. Israꞌeeleenaꞌo are katemoonaa bi guudoona beeti gishiishi katemeenaꞌonon yechiyeete. Arooch beeti Amooreenaꞌon yookkiyeete.

³³ Aroochee wotteꞌi Bashaanee showoo waan daammiibeeti gommona hammiyeete. Bashaanee taatoo Oogi bi asheenaꞌo bullina tookkii boonoshin kocha Edireyi katemooch waahe.

³⁴ Doono Yeeriyoo Muusich ishichiye: “Biin shattaahine. Biin, bi asho bullinaa bi showoonon ne kishooch beshiyaꞌa immeto taane. Heshibon beechii qeejjiibee echeti Amooreenaꞌo taatoo Sihooni toommooch ne tuniitoommon boonoshi toommooch tuniyemmo neene” iye.

³⁵ Ebina Israꞌeeleenaꞌo ikke ashoonolla echiyaanoon, Oogin, bi bushiishoonaa bi asheenaꞌo bullinon wuxiyeete. Bi showoonoo woraashiyeete.