Haddoo 20 - Kafa Linguistics Project

Xaqqoochee Aaco Xuupho

¹ Israꞌeelee iitoo bulli batti batti agenooch Tsiini barahooch waaꞌi, Qadeesh kotehe. Miiriyamiyoo aroochaa qitiyan; aroochoo duukkehan.

² Ebiyooba asheenaꞌo uchemmi aaco aallehe. Boonoshiyoo Muusinaa Harooninochi toommooch tiyiꞌi,

³ Muusina kaareheete; ishichiinoo iyeete: “Doono Yeeri aafoochaa no maneenaꞌo qitiyooba nowoo abo arooba qitibona!

⁴ Noonnaa no gijjeenaꞌona hini barahoochaa qitemmoyich Doono Yeerichi iitoon hini barahooch amoyich deebiyote?

⁵ Hini gonde showooch deeboyich Gibitsee amoyich noon kichiyote? Maayo woyee balaaso woyee woyino woyee romaano shagaani xaaꞌoone; ucheyemmi aacona aalli xaaꞌoone” iyeete.

⁶ Muusinaa Haroonina iiteenaꞌo beetoochee danee duukkaanee kellooch hammiꞌi baroona guufeheete. Doono Yeerichi oogee yiiroo boonoshich bekkehe.

⁷ Doono Yeeriyoo Muusich ishichiye:

⁸ “Gumboon yeshe. Neennaa ne manoo Haroonina iiteenaꞌon ikkooch kicibote. Xaqqo aacon bi kichemmoyich boonoshi ciini beetaa getote. Xaqqoochee aacon boonoshich kichemmo neene; boonoshinaa boonoshi gijjeenaꞌona aacon uchemminaꞌone” iye.

⁹ Ebich Muusi Doono Yeeri aafoochee gumboon daammiye.

¹⁰ Muusinaa Haroonina iiteenaꞌon xaqqee aafooch ikkooch kiciyeete. Muusiyoo boonoshich ishichiye: “Hini hukkechinaꞌote, and waayebote. Hini xaqqoochee aacon ittoshich kichibona?” iye.

¹¹ Muusiyoo bi gumboon kaama tiijjiꞌi, xaqqoon gutte wottoon mutehe. Ooge aaco xuupphiꞌi kechiye. Iiteenaꞌonaa boonoshi gijjeenaꞌona uchiyeete.

¹² Doono Yeeri Muusinaa Harooninoyich ishichiye: “Ta yaafittinoon bekkiyoona Israꞌeeleenaꞌo aafooch taan gibeneyaano ittoshi tunetoyich, boonoshich ta immeti showooch hini iitoon yeshi giyaachemmo ittoshine” iye.

¹³ Israꞌeeleenaꞌo Doono Yeerina kaareti, biyoo yaafoo bi tunoon boonoshich bi bekkiiti Meriibi aaco ebine.

Israꞌeeleenaꞌo Besheyaachemmoyich Edoomeenaꞌo Bayo

¹⁴ Muusi Qadeeshee ishichiꞌi wocheyechinaꞌon Edoomee taatoo waan daachiihe: “Ne manoo Israꞌeeli ishichii beetone: ‘No toommooch shaggiti iritoo bullin ariibeeto neene.

¹⁵ No qaabbechinaꞌo Gibits hammiyeete. Nowoo meeti yemeenoon Gibits kotehone. Gibitsee asheenaꞌo no qaabbechinaꞌonaa noonnon duꞌiiheete.

¹⁶ Tunebaani Doono Yeer waan no cookaa, no cookoon waayehe; maraakoonoo wocheꞌi, Gibitsee noon kichiye. “ ‘Ebiyoche and ne showee daarooch beeti Qadeesh koteto noone.

¹⁷ Ne showoona kuxi no beshemmoyich nooch daaggibe. Goyee daggooch tuneba woyinee budooch giyaachemmo noone; oppeexi ne aacoocheenoo uyaachemmo noone. Taatoochi gamini gommona baach hammemmo noone. Ne showoon no beshemmi wottoon qanna yoocha getaachemmo noone’ itone” iye.

¹⁸ Tunebaani Edoomee asheenaꞌo boonoshich ishichiyeete: “No showoona besheyaachemmo ittoshine; ‘Beshemmo noone’ ittoshi getigaata, waaree ittoshin kochemmo noone” iyeete.

¹⁹ Israꞌeeleenaꞌo ishichii wochiyeete: “Qaxxee gommoochee keyaachemmo noone. No woyee no gijjeenaꞌo ne aacoochee uyigaata, gatiyoon qoccemmo noone. Baatoona kuxxii beshoyee besh baroo amoonolla tuniyaachemmo noone” iyeete.

²⁰ Tunebaani Edoomeenaꞌo, “Hinina besheyaachemmo ittoshine” iyeete. Aroochee dofee ginee naayinaꞌo tuneꞌi, Israꞌeeleenaꞌon kocha waaheete.

²¹ Ebina Edoomee taatoo bi showoona boonoshi besheyaachemmoyich bi bajjitoyich, Israꞌeeleenaꞌo bi waanee qajjii wotteheete.

Harooni Qitoo

²² Israꞌeelee iitoo bulli Qadeeshee tiyii, Hoori guudooch waahe.

²³ Doono Yeeriyoo Edoomee showee gashooch beeti Hoori guudoochaa Muusinaa Harooninoyich ishichiye:

²⁴ “Harooni bi qaabbechinaꞌo waan xaꞌeyemmone. Meriibi aacoochaa ta getee toommooch hukkoon ittoshi tiijjitoyich, Israꞌeeleenaꞌoyich ta immeti showooch giyaachemmone.

²⁵ Harooninaa bi bushoo Elazaarinon Hoori guudooch yeshi keye.

²⁶ Haroonichi tahoon shootiree, bi bushoo Elazaarich tajjibe. Harooni aroochaa qitemmone. Bi qaabbechinaꞌo waan xaꞌeyemmone” iye.

²⁷ Muusiyoo Doono Yeeri gettitoommon tuniihe. Israꞌeeleenaꞌo bulli ciinnii beetaa, Hoori guudooch kechiyeete.

²⁸ Aroochaa Muusi Haroonichi tahoon shoottiꞌi bi bushoo Elazaarich tajjiye. Harooniyoo are guudi toommoochaa qitiye. Muusinaa Elazaarina guudoochee kindiyeete.

²⁹ Asheenaꞌo bulli Harooni qitoon ariiꞌi, shaashe qemon biich goppii eeppiyeete.