Haddoo 2 - Kafa Linguistics Project

Asheenaꞌo Boonoshi Yoodi Yood Kaamboon Geddii Koto

¹ Doono Yeeri Muusinaa Harooninoyich ishichiye:

² “Israꞌeeleenaꞌo boonoshi ikkikkoona boonoshi baanderi baanderoona, boonoshi qaabbechinaꞌo yari yaree malletoona, danee duukkaanee guudo bullina, boonoshi kaamboon gedi hododiree kotebeete.

³ “Aabi-keyo waan kaamboon gedi boonoshi kuxi kuxona, boonoshi baanderoona kotemminaꞌo Yihudi kuxooch beeti yoodeenaꞌone. Yihudi yoodee iraashoo, Aminadaabi bushoo Nahishoonine.

⁴ Bi asheenaꞌo haddoo shabaa awudde humaa shiritte balloone.

⁵ “Boonoshi gaꞌooch kaamboon gedi kotemmo Yisakoori yoodoone. Yisakoori yoodee iraashoo, Tsuꞌaari bushoo Netaaneline.

⁶ Bi asheenaꞌo haddoo aachaa awudde humaa awudde balloone.

⁷ “Boonoshi gaꞌooch kaamboon gedi kotemmo Zebulooni yoodoone. Zebulooni yoodee iraashoo, Helooni bushoo Eliyaabine.

⁸ Bi asheenaꞌo haddoo aachaa shabaatte humaa awudde balloone.

⁹ “Yihudichi kuxooch beeti, boonoshi yoodi yoodoona haddeeti asheenaꞌo bulla, balli shinnaa shiritte humaa awudde balleenaꞌone. Aaf shiichi qaxiremminaꞌo eboshine.

¹⁰ “Deshi-waan kaamboon gedi boonoshi kuxi kuxona boonoshi baanderoona kotemminaꞌo Roobeelichi kuxooch beeti yoodeenaꞌone. Roobeeli yoodee iraashoo, Sheduuri bushoo Elisuurine.

¹¹ Bi asheenaꞌo haddoo aabbaa shiritte humaa uuche balloone.

¹² “Boonoshi gaꞌooch kaamboon gedi kotemmo Simooni yoodoone. Simooni yoodee iraashoo, Tsurishadayi bushoo Shelumeline.

¹³ Bi asheenaꞌo haddoo aachaa yiixiye humaa keejje balloone.

¹⁴ “Boonoshi gaꞌooch kaamboon gedi kotemmo Gaadi yoodoone. Gaadi yoodee iraashoo, Reweeli bushoo Eliyasaafine.

¹⁵ Bi asheenaꞌo haddoo aabbaa uuche humaa shiritte ballaa aachoone.

¹⁶ “Roobeelichi kuxooch beeti, boonoshi yoodi yoodoona haddeeti asheenaꞌo bulla, balli aachaa ikke humaa awudde ballaa aacheenaꞌone. Boonoshiyoo tiyi, Yihudi yoodeenaꞌon dabbi qaxiremminaꞌone.

¹⁷ “Ebiyee gubb, Leweenaꞌo danee duukkaanoon shaagiree, kaambo bullichi gutte daggooch tuneree qaxiremminaꞌone. Asheenaꞌo bulli boonoshi kuxi kuxona kaamboon geddiꞌi boonoshi kotetoommona boonoshi xaaꞌoon yeshiree, boonoshi baanderi baanderoona qaxiremminaꞌone.

¹⁸ “Aabi-gimo waan kaamboon gedi boonoshi kuxi kuxona, boonoshi baanderoona kotemminaꞌo Efreemi kuxooch beeti yoodeenaꞌone. Efreemi yoodee iraashoo, Amihuudi bushoo Elishamine.

¹⁹ Bi asheenaꞌo haddoo aabbe humaa uuche balloone.

²⁰ “Boonoshi gaꞌooch kaamboon gedi kotemmo Minaasi yoodoone. Minaasi yoodee iraashoo, Fedatsuuri bushoo Gamaleeline.

²¹ Bi asheenaꞌo haddoo shaashaa gutte humaa gutte balloone.

²² “Boonoshi gaꞌooch kaamboon gedi kotemmo Biiniyaami yoodoone. Biiniyaami yoodee iraashoo, Gideꞌooni bushoo Abidanine.

²³ Bi asheenaꞌo haddoo shaashaa uuche humaa awudde balloone.

²⁴ “Efreemi kuxooch beeti, boonoshi yoodi yoodoona haddeeti asheenaꞌo bulla, balli shimitte humaa ikke balleenaꞌone. Boonoshiyoo keejjinnee yaaroon yeshiree qaxiremminaꞌone.

²⁵ “Dambi-waan kaamboon gedi boonoshi kuxi kuxona, boonoshi baanderoona kotemminaꞌo Daanichi kuxooch beeti yoodeenaꞌone. Daani yoodee iraashoo, Amishadaayi bushoo Ahezeerine.

²⁶ Bi asheenaꞌo haddoo shichaa gutte humaa shabaatte balloone.

²⁷ “Boonoshi gaꞌooch kaamboon gedi kotemmo Aseeri yoodoone. Aseeri yoodee iraashoo, Okiraani bushoo Fageeline.

²⁸ Bi asheenaꞌo haddoo aabbaa ikke humaa uuche balloone.

²⁹ “Boonoshi gaꞌooch kaamboon gedi kotemmo Nifitaali yoodoone. Nifitaali yoodee iraashoo, Enaani bushoo Ahiirine.

³⁰ Bi asheenaꞌo haddoo aachaa keejje humaa awudde balloone.

³¹ “Daanichi kuxooch beeti boonoshi yoodi yoodoona haddeeti asheenaꞌo bulla, balli aachaa shabaatte humaa shiritte balleenaꞌone. Boonoshiyoo tiyi boonoshi baanderi baanderoona ciiroochaa qaxiremminaꞌone” iye.

³² Israꞌeeleenaꞌoochee boonoshi qaabbechinaꞌo yari yaroona haddeetinaꞌo eboshine. Boonoshi kaambi kaamboona, boonoshi kuxi kuxona haddeetinaꞌo bulla, shiritte ballaa keejje humaa uuche ballaa aacheenaꞌone.

³³ Tunebaani Doono Yeeri Muusich bi gettitoommon, Leweenaꞌo Israꞌeeleenaꞌona tookkii haddeyaaneenaꞌone.

³⁴ Israꞌeeleenaꞌo Doono Yeeri Muusich gettiti mooyo bullin tuniiheete. Boonoshi baanderi baanderoona kaamboon geddiꞌi koteheete; ebiyoommon wotta boonoshi gumbi gumboona boonoshi qaabbechinaꞌo yari yaroona tiyii qaxiriyeete.