Haddoo 17 - Kafa Linguistics Project

Haroonichi Gumbe Ato

¹ Doono Yeeri Muusich ishichiye:

² “Israꞌeeleenaꞌo boonoshi ikkikkoona boonoshi qaabbechinaꞌochi yari yaroochee ikkikke gumboon, boonoshi qaabbechinaꞌochi yari yaree ukkireenaꞌo waanee bulli aaraa gutte gumboon neech boonoshi deebemmoyich gete. Bi ikkikkoochi shigoon bi gumbi gumbee toommooch kooribe.

³ Lewichi gumbee toommooch Haroonichi shigoon kooribe. Qaabbechinaꞌochi yari yaree ukkireenaꞌoyich boonoshi qelli qelloona ikkikke gumbo beemo qaawiihe.

⁴ Ebi gumbeenaꞌon ittoshina tookkaa ta daneebeeti danee duukkaanee daggooch, taabootee aafooch gede.

⁵ Ta kaacceti ashi gumbe atemmine. Ittoshi toommooch boonoshi guruuxiibeeti Israꞌeeleenaꞌochi guruuxoon ta waanee ebina kuxxemmo taane” iye.

⁶ Muusiyoo Israꞌeeleenaꞌoyich gettiye. Boonoshi ukkireenaꞌo bulli aaraa gutte gumbeenaꞌon boonoshi qaabbechinaꞌochi yari yaroona ikkikke gumboon Muusich immiyeete. Haroonichi gumbo boonoshi gumbee daggooch beetone.

⁷ Muusiyoo gumbeenaꞌon Doono Yeeri aafooch, taabooto beeti duukkaanee daggooch geddiye.

⁸ Bi dechara, Muusi taabooto beeti duukkaanee maac giyiꞌi Lewi yoodoochee tuneti Haroonichi gumbo ateton beeggiye; wottoo nollii bungiꞌi kachiti luuzoon aafetone.

⁹ Aroochee Muusi gumbeenaꞌo bullin Doono Yeeri aafoochee deebiꞌi Israꞌeeleenaꞌo bullich bekkiihe. Boonoshiyoo beeggiyeete; asho bi ikkikkoona bi gumbi gumboon daammiye.

¹⁰ Doono Yeeriyoo Muusich ishichiye: “Haroonichi gumboon wogee taabootee aafooch wochiree kotiibe. Ta toommooch boonoshi guruuxiibeeti guruuxoo echemmoyich, boonoshiyoo qitaachemmoyich, ta toommooch tiyiibeeti asheenaꞌoyich malletoo tuneree quyeebe” iye.

¹¹ Muusiyoo Doono Yeeri biich gettitoommon tuniihe.

¹² Aroochee Israꞌeeleenaꞌo Muusich ishichiyeete: “Ebiyoche qitaaniye no beeto; aallaaniye no beeto; no bulliyona aallaaniye no beeto.

¹³ Doono Yeerichi yaafee duukkaanooch katinnimmo koniyoona qitii beetone. Ishigaata, no bulliyona qitemmo noone getone?” iyeete.