Haddoo 16 - Kafa Linguistics Project

Qoraahi, Daataaninaa Abiraamina Hukkee Shuuno

¹ Lewi yoodeexi Qohaati yaroochee tuneti Yitsaari bushoo Qoraahi, Roobeeli yoodoochee tuneti Eliyaabi bushiisheenaꞌo Daataaninaa Abiraamina, wotta Feleeti bushoo Oni,

² Muusi toommooch tiyiyeete. Israꞌeeleenaꞌoochee gutte ballaa aache asheenaꞌon boonoshi waan wochiyeete. Eboshiyoo iiteenaꞌo kaacciti ukkireenaꞌone; wottoo aricheti asheenaꞌone.

³ Boonoshiyoo Muusinaa Harooninochi toommooch kicee tiyiꞌi, boonoshich ishichiyeete: “Halla beshiito ittoshine. Iitoo bulli yaafoone. Doono Yeeriyoo no bullina tookkii beetone. Ishigaata, Doono Yeerichi iiteenaꞌo toommooch ittoshi geeciibeeto, amoyichiye?” iyeete.

⁴ Muusi ishin waayeꞌi, baroona guufehe.

⁵ Qoraahinaa bi guuphinaꞌo bullinoyich ishichiye: “Doono Yeeri yaach maaddoona biicho tunetonaa yaafoonon bekkiyemmone; bi waanoo katichemmone; bi kaaccimmi ashoon bi waan bi katinnemmoyich tuniyemmone.

⁶ Qoraahinaa bi guupho bullinote; ebin tuniibote. Ixaano shookkeebeeti qiicoon yeshote.

⁷ Yaach maaddoona Doono Yeeri aafoochaa qaaqqoon arooch boodote. Ixaanoonoo arooch gedote. Doono Yeeri kaaccimmi asho yaafoo tunemmone. Leweenaꞌote, ittoshiyoo halla beshiito ittoshine” iye.

⁸ Daakkiꞌi Muusi Qoraahich ishichiye: “Leweenaꞌote, waayebote.

⁹ Israꞌeelee Nuggishoo Israꞌeelee iiteenaꞌo daggoochee ittoshin bariiꞌi, Doono Yeerichi yaafee duukkaanee daggooch ittoshi shuunemmonaa iiteenaꞌo aafooch neexeree boonoshich ittoshi maddemmonoyich, bi waan ittoshin bi katichoo, ittoshich bedaache?

¹⁰ Neennaa Lewi bushiisheenaꞌo tuneti ne maneenaꞌo bullinon bi waan katichitone. Tunebaani ittoshi wotta qeeshittinee ukkirittinoon qaawiibeeto ittoshine?

¹¹ Neennaa ne guuphinaꞌo bullina ikkooch kiceeꞌi ittoshi tiyito, Doono Yeeri toommoochiye. Halla ittoshi guruuxemmoyich, Harooni konine?” iye.

¹² Aroochee Muusi Eliyaabi bushiisheenaꞌo tuneti Daataaninaa Abiraaminon wochiihe; tunebaani boonoshi ishichiyeete: “No hamaachone.

¹³ Barahoochaa noon wuxoyich, ejjoonaa eeyona xuupphiibeeti showoochee noon ne kichito, neech giishetaa no toommooch doono tunoyich qaawaa beetine?

¹⁴ Ebiyee wotta, ejjoonaa eeyona xuupphiibeeti showooch noon giijjaano neene; goyoonaa woyinee budononoo nooch woraashiyaano neene. Andoo noon dachiya qaawiibeeto neene. No hamaachone” iyeete.

¹⁵ Muusiyoo oogichii ippehe; Doono Yeerichoo ishichiye: “Boonoshi deejjoon deqqaahine. Ikke kuroonona, boonoshi waanee deꞌaano taane; boonoshi daggoochee ikkoonolla xuꞌaano taane” iye.

¹⁶ Muusi Qoraahich ishichiye: “Yaach neennaa ne guuphinaꞌona Doono Yeeri aafooch giddebote. Harooniyoo arooch danemmone.

¹⁷ Ittoshi ikkikkoona ixaano shookkeebeeti gutte ballaa aache ittoshi qiicoon deebote; ixaanoon arooch gediree, Doono Yeeri aafooch giddiibote. Neennaa Harooninoo wotta ixaano shookkeebeeti ittoshi qiicoon deebote” iye.

¹⁸ Asho bi ikkikkoona ixaano shookkeebeeti bi qiicoon yechiye. Qaaqqoon arooch booddii, ixaanoon arooch geddiꞌi, Muusinaa Haroonina tookkii danee duukkaanee kellooch neexeheete.

¹⁹ Aroochee Qoraahi iiteenaꞌo bullin boonoshi toommooch tiijjoyich, danee duukkaanee kellooch kiciye. Doono Yeerichi oogee yiiroo iiteenaꞌo bullich bekkehe.

²⁰ Doono Yeeri Muusinaa Harooninoyich ishichiye:

²¹ “Boonoshi bullin ikke wottoona ta aalliyemmoyich, hini iiteenaꞌo daggoochee wohote” iye.

²² Muusinaa Haroonina baroona showooch guufeechii, “Nuggishoo Yeero, asho kasho bulli Nuggishoocho, ikke uro shuuneti axaaxoona iiteenaꞌo bullin kaarenne?” iyeete.

²³ Doono Yeeriyoo Muusich ishichiye:

²⁴ “Iiteenaꞌoyich ishichibe: ‘Qoraahi, Daataaninaa Abiraaminochi duukkaanoochee wohote’ gete” iye.

²⁵ Muusiyoo Daataaninaa Abiraamina waan tiyii hammiye. Israꞌeelee geeneenaꞌoo biin dabbiyeete.

²⁶ Biyoo iiteenaꞌoyich “Ebi gonde asheenaꞌochi duukkaanoochee ittoshi wokkemmoyich, ittoshin qollehoye. Boonoshi axaaxoo bullina ittoshi aalleyaachemmoyich, boonoshicho tuneto bullin yechaahote” iye.

²⁷ Ebich Qoraahi, Daataaninaa Abiraaminochi duukkaanoochee wokkiyeete. Daataaninaa Abiraamina kechii hammiꞌi, boonoshi mecheenaꞌo, boonoshi bushiisheenaꞌonaa gaggereenaꞌona tookkii tuneꞌi boonoshi duukkaanee kellooch neexeheete.

²⁸ Aroochee Muusi ishichiye: “Ebi shuunoo bullin ta shuunemmoyich taan wocheto, Doono Yeeri tunoon, ta qelloona tunee bi qayon ebina ariyemmo ittoshine.

²⁹ Ebi asheenaꞌo asho qitii beetoommon taree qitoon boonoshi qitigaata woyee ashi toommooch shaggiibeeti mooyo baach boonoshi toommooch bi shagigaata, Doono Yeeri taan wochetaanoone.

³⁰ Tunebaani Doono Yeeri dallaawe mooyon tuniitaa, showoo haawutteꞌi, boonoshinaa boonoshicho tuneto bullinon bi qooxigaata, kashoona maash boonoshi hamigaata, arooba ebi asheenaꞌo Doono Yeerin hoxetinaꞌo boonoshi tunoon ariyemmo ittoshine” iye.

³¹ Ebi qaaroon gettii bi ciichimmona, showoo boonoshiyee dechaa gaahehe.

³² Showoo haawutteꞌi, boonoshin, boonoshi kechi asheenaꞌon, Qoraahichi asheenaꞌo bullinaa boonoshi qiico bullinon qooxxiye.

³³ Boonoshinaa boonoshich beeto bullina kashoona oppooch giyiyeete. Showoo boonoshi toommooch hiripphimiye; iiteenaꞌo daggoocheenoo aalleheete.

³⁴ Boonoshi guudoona beeti Israꞌeeleenaꞌo bulli ebi asheenaꞌochi bunnoochee tiyitona, “Showoo noonoo qooxxemmone” iꞌi wocee aalleheete.

³⁵ Qaaqqoo Doono Yeer waanee kindiꞌi, ixaanoon shookkiibeeti gutte ballaa aache asheenaꞌon maahe.

³⁶ Aroochee Doono Yeeri Muusich ishichiye:

³⁷ “Ixaano shookkeebeeti qiiceenaꞌo yaafeetinaꞌo boonoshi tunetoyich, micciti asheenaꞌo waanee tiijjiree arooch beeti qaaqqoon wokkiiree bi duppemmoyich, qeeshoo Harooni bushoo Elazaarich gete.

³⁸ Eboshiyoo boonoshi kashoon aalliyoyich axaaxoon shuuneti asheenaꞌochi ixaano shookkeebeeti qiiceenaꞌone. Ebi qiiceenaꞌo, Doono Yeeri ta aafooch giddetinaꞌonaa yaafeetinaꞌona boonoshi tunetoyich, deejjee gudee qeroon boonoshi tunemmoyich qici shishiibe. Ebiyoo Israꞌeeleenaꞌoyich cuuꞌiyoo tunebe” iye.

³⁹ Qeeshoo Elazaari micciti asheenaꞌo ixaanoon shookkiibee echeti gooshee qiiceenaꞌon deebii, deejjee gudee qeroon boonoshi tunemmoyich qicciye.

⁴⁰ Ebin bi tuniito, qeeshoo woyee Haroonichi shiijjeroo tunetaano, Doono Yeeri aafooch ixaanoon shookka bi giddeyaachemmoyich, gidderee, Qoraahinaa bi guuphinaꞌonochi daannoon bi deꞌaachemmoyich, Israꞌeeleenaꞌoyich shalligichoo bi tunemmoyichiye. Ebi bullin bi tuniito, Doono Yeeri Muusina biich bi gettitoommoniye.

Harooni Asheenaꞌon Wodiyoo

⁴¹ Bi dechara Israꞌeeleenaꞌochi iiteenaꞌo bulli Muusinaa Harooninochi toommooch guruuxii tiyiꞌi, “Doono Yeerichi asheenaꞌon wuxito ittoshine” iyeete.

⁴² Iiteenaꞌo Muusinaa Harooninochi toommooch tiyiꞌi ikkooch boonoshi kiceehooba, danee duukkaanoo waan guuddiꞌi qubo danee duukkaanoon qeriton beeggiyeete. Doono Yeerichi oogee yiiroo bekkehe.

⁴³ Aroochee Muusinaa Haroonina danee duukkaanee kellooch hammiyeete.

⁴⁴ Doono Yeeri Muusich ishichiye:

⁴⁵ “Boonoshi bullin ikke wottoona ta aalliyemmoyich, hini iiteenaꞌo daggoochee ikibote” iye. Boonoshiyoo baroona guufeheete.

⁴⁶ Muusi Haroonich ishichiye: “Ixaano shookkeebeeti ne qiicoon yeshe. Deejjee gudoochee qaaqqoon arooch boode. Ixaanoonoo arooch gede. Kaate iiteenaꞌo waan hami boonoshi axaaxoon maariibe. Doono Yeer waanee kaaree shiixxoo kinditone; naxoo wonnitone” iye.

⁴⁷ Ebich Harooni Muusi gettitoommon yechiꞌi iiteenaꞌo daggooch wocciye. Naxo asheenaꞌo daggooch bi gimon beeggiꞌi, ixaanoon shookkii boonoshi axaaxoon maariihe.

⁴⁸ Aroochee qititinaꞌonaa wodeenaꞌonochi daggooch neexehe; naxoo tooqqiye.

⁴⁹ Qoraahichi naboona qititinaꞌoyee baroo, naxoona qititinaꞌo aaraa awudde humaa shabaatte balleenaꞌone.

⁵⁰ Aroochee naxo tooqqimmona Harooni Muus waan, danee duukkaanee kellooch wottehe.