Haddoo 15 - Kafa Linguistics Project

Buuroon Giddiyoyich Icheti Bare Sheeroo

¹ Doono Yeeri Muusich ishichiye:

² “Israꞌeeleenaꞌoyich ishichi gete: ‘Ittoshi beeyemmoyich ta immemmi showooch ittoshi giyiyooba,

³ ittoshi tiikkeshoon woyee mullee daaggee wojjoon woyee baaroobee wojjoon Doono Yeeri taach gaawe cinnecho tunii giddiyoyich miimoochee woyee bageenaꞌoochee qaaqqoona micciibeeti deejjoon woyee bare deejjoon ittoshi giddii beegaata,

⁴ deejjoon giddiibeeti asho ikke neetiree zayitoona xirikketi gutte kobbaye qacini buddinee buuroon taach giddiibe.

⁵ Micciibeeti woyee bare deejjoyich giddeebeeti bagee baaddoo bi ikkikkoona tookki ikke neetiree woyinee uyoon uyee deejjoyich giddiibote.

⁶ “ ‘Ooge bagee baaddoona tookki ikke neetiraa qach bede zayitoona xirikketi awudde kobbaye qacini buddinoon qanniibote.

⁷ Ebiyoommon wotta uyee deejjoyich tunemmi, ikke neetiraa qach bede woyinee uyoon qanniibote. Ebinoo Doono Yeeri taach gaawe cinnecho tuniiree deejjibote.

⁸ “ ‘Wuron micciibeeti deejjoyich woyee bare deejjoyich woyee tiikkeshoyich woyee ikkittinee deejjoyich, Doono Yeeri taach giddiyoyich ittoshi qannii beegaata,

⁹ wurona tookki gutte neetiree zayitoona xirikketi shiritte kobbaye qacini buddinoon giddiibote.

¹⁰ Doono Yeeri taach gaawe cinnechi, qaaqqoona micciibeeti deejjoo bi tunemmoyich, gutte neetiree woyinee uyee deejjoon deejjibote.

¹¹ Wuro woyee ooge bagee baaddoo woyee giishi bagee baaddoo woyee emmishee baaddoo bi ikkikkoyich ebiyoommona qannibe.

¹² Ittoshi qanniiti haddoommona boonoshi ikkikkoyich ebiyoommon boonoshi haddi haddoommona tuniibote.

¹³ “ ‘Israꞌeelee shiijjeroo tuneto bulli qaaqqooch micciibeeti, Doono Yeeri taach gaawe cinnechi deejjoon bi giddii beegaata, ebi mooyinaꞌon ebiyoommon tuniibe.

¹⁴ Gubbi ittoshi shiijjeroo bulliich beddaahaa, shiqqoo woyee asho koniyoona ittoshi daggooch bi kotegaata, qaaqqoona micciibeeti, Doono Yeeri taach gaawe cinnechi deejjoon giddiiya bi qaawigaata, ittoshi tunii beetoommon, biyoo tuniibe.

¹⁵ Iitoo ittoshinaa ittoshi daggooch beeti shiqqoonoyich qociyoo ikkoone. Ebi qociyoo gubbi ittoshi shiijjeroo bulliich beddaahaa, bulli yemeenee qociyoone. Ittoshiyoo tunebot shiqqeenaꞌo Doono Yeeri ta aafoochaa tato ittoshine.

¹⁶ Ittoshinaa ittoshina tookkii koteti shiqqeenaꞌonoyich sheeroonaa doyoona ikkoo tunemmone’ gete” iye.

¹⁷ Doono Yeeri Muusich ishichiye:

¹⁸ “Israꞌeeleenaꞌoyich ishichi gete: ‘Ittoshin ta daammaabeeti showooch ittoshi giyiyoobinaa

¹⁹ are showoochee daneebeeti maayoon ittoshi maahoobina, Doono Yeeri taach deejjoon giddiibote.

²⁰ Batti batti ittoshi kochi bukoochee kachii buuroon giddiibote. Maayo buchee beeteexi buuroon ittoshi giddiyoommon giddiibote.

²¹ Batti batti ittoshi maayoochee kochi deejjoon Doono Yeeri taach gubbi ittoshi shiijjeroo bulliich beddaahaa, giddiyemmo ittoshine.

Diqqoona Shuuneeti Axaaxoyich Giddemmi Deejjoo

²² “ ‘Doono Yeeri Muusich gettiti ebi geteenaꞌo bullin shaaddeꞌi diqqoona ittoshi muricigaata,

²³ aaf Doono Yeeri gettiti aaboochee tiijjii, gubbi ittoshi shiijjerooch beddaahaa, Doono Yeeri Muusina gettito bullin shaaddeꞌi ittoshi muricigaata,

²⁴ iiteenaꞌo ariyaanoon diqqoona muricciꞌi ebin boonoshi tuniigaata, iitoo bulli micciibeeti deejjoyich, ikke wuron maayi buuroonaa uyee deejjoona tookki dojjeetoommon, Doono Yeerich gaawe cinnoon bi cinnemmoyich deejjibeete; wotta axaaxee deejjoyich ikke emmishee baaddoon giddiibeete.

²⁵ Qeeshoo Israꞌeelee iitoo bullin maariyemmone; boonoshiyoo maareyemminaꞌone. Ebiyoo diqqoona boonoshi muriccitoyich, boonoshi muricoyich qaaqqoona micciibeeti deejjoonaa axaaxee deejjoonon boonoshi giddiitoyichiye.

²⁶ Asheenaꞌo bulliyona muricona ebin boonoshi tuniitoyich, Israꞌeeleenaꞌo bullinaa boonoshi daggooch beeti shiqqeenaꞌona maareyemminaꞌone.

²⁷ “ ‘Tunebaani ikke asho diqqoona axaaxoon bi shuunegaata, ikke nati emmishee gidereen bi axaaxee deejjoyich giddiibe.

²⁸ Qeeshoo diqqoona axaaxoon shuuneti ebi ashi axaaxoon Doono Yeeri aafoochaa maariyemmone; bi axaaxoo maareyemmone.

²⁹ Diqqoona axaaxoon shuunemmi ashich, Israꞌeelee shiijjereenaꞌoyich tuneba boonoshi daggooch koteti shiqqeenaꞌonoyich sheeroo ikkoo baach tunebe.

³⁰ “ ‘Tunebaani Israꞌeelee shiijjeroo tuneba shiqqoo bi qelloon oogiyoona axaaxoon bi shuunegaata, ebi asho Doono Yeerin qallayito bi tunetoyich, bi asheenaꞌo daggoochee kichaa yookkebe.

³¹ Doono Yeerichi qaaroon bi hoxetoyich, bi getoonoo bi shaaddetoyich, ebi asho ciroona aallebe; bi axaaxoo bi toommooch tunebe’ gete” iye.

Shambetoon Oogiyaani Uro Xaqqoona Yexaa Qitoo

³² Israꞌeeleenaꞌo barahooch beebee, ikke uro shambetee aaboon mixon mittii bi beetaa, daneheete.

³³ Mixon mittii bi beetaa daneti asheenaꞌo Muus waan, Harooninaa Israꞌeelee iitoo bullina waan uroon deebiyeete.

³⁴ Uro toommooch boonoshi tuniyemmi mooyo batt aricheyaano bi tunetoyich, uroon cuchiyeete.

³⁵ Doono Yeeri Muusich ishichiye: “Uro qitibe. Israꞌeelee iitoo bulli kaamboyee maach kichi xaqqoona yexi wuxibe” iye.

³⁶ Iitoo bulli kaamboyee maach biin kichiye; Doono Yeeri Muusich gettitoommon, xaqqoona yexxii wuxiyeete.

Qoreddee Caappoon Ciinnii Beetona Icheti Doyoo

³⁷ Doono Yeeri Muusich ishichiye:

³⁸ “Israꞌeeleenaꞌoyich ishichibe: ‘Ittoshiyoo, ittoshi shiijjereenaꞌoo ittoshi tahee gocooch caappoon gedote. Wotta ebi caappooch shimaayite yokkoon gedote.

³⁹ Ebi caappeenaꞌo shalligicheenaꞌo boonoshi tunetoyich, boonoshin ittoshi beegiyooba Doono Yeeri ta getoon shalligi quyemmo ittoshine. Ittoshi mullo qaatitonaa ittoshi aafo beeggitonon dabbi hamaachemmo ittoshine.

⁴⁰ Ebin ittoshi tuniigaata, ta geto bullin shalligi tuniyemmo ittoshine; ittoshi Nuggishoo taachoo yaafoo tunemmo ittoshine.

⁴¹ Ta, ittoshi Nuggishoo Doono Yeeri taane. Ittoshi Nuggishoo tunoyich, Gibitsee ittoshin kichaa deebeto taane. Ta Nuggishoo Doono Yeeri taane’ gete” iye.