Haddoo 13 - Kafa Linguistics Project

Kanaanee Showoon Qiido

¹ Doono Yeeri Muusich ishichiye:

² “Israꞌeeleenaꞌoyich ta immaabeeti showoon boonoshi qiiddemmoyich asheenaꞌon daachiibe. Qaabbechinaꞌochi yoodoochee boonoshi ikkikkoo daggooch ukkiroo tuneti ashoon daachiyemmo ittoshine” iye.

³ Ebich Muusi Doono Yeeri gettitoommon, Faraani barahoochee asheenaꞌon daachiihe. Boonoshi bulliyona Israꞌeeleenaꞌochi ukkireenaꞌone.

⁴ Boonoshi shigoo ebine: Roobeeli yoodoochee Zakuuri bushoo Shamuꞌi;

⁵ Simooni yoodoochee Hooriyi bushoo Shafaaxi;

⁶ Yihudi yoodoochee Yefuuni bushoo Kaaleebi;

⁷ Yisakoori yoodoochee Yooseefi bushoo Igaali;

⁸ Efreemi yoodoochee Nuuni bushoo Hosheehi;

⁹ Biiniyaami yoodoochee Raafi bushoo Feliixi;

¹⁰ Zebulooni yoodoochee Soodi bushoo Gaddeeli;

¹¹ Yooseefi yoodoochee, ebiyoo Minaasi yoodoochee tuneti, Susi bushoo Gaddi;

¹² Daani yoodoochee Gemaali bushoo Ameli;

¹³ Aseeri yoodoochee Mikaꞌeeli bushoo Setuuri;

¹⁴ Nifitaali yoodoochee Bofiisi bushoo Nahibinaa

¹⁵ Gaadi yoodoochee Maki bushoo Geweelinane.

¹⁶ Showoon boonoshi qiiddemmoyich Muusi daachiiti asheenaꞌochi shigo ebine. Muusi Nuuni bushoo Hosheehin Yaasi iꞌi shigiihe.

¹⁷ Kanaanee showoon boonoshi qiiddemmoyich Muusi boonoshin wochee daachiihe. Biyoo boonoshich ishichiye: “Negeebi barahoon kuxi besheree geppe showooch hambote.

¹⁸ Showoo amoommo gaata, arooch beeti asheenaꞌo kuppheenaꞌo woyee waateyeenaꞌo boonoshi tunoon, giishecheenaꞌo woyee meetinaꞌo boonoshi tunoonoo, beegote.

¹⁹ Boonoshi beeti showoo gaaweto woyee gondo bi tunoon, boonoshi beetoo, gafooch woyee xaqqoona uxereeti katemooch bi tunoon,

²⁰ showoo qeemo woyee bukoo bi tunoon, mixo arooch beemonaa aalloononoo beegote. Kuppheree are showeexi manjeebeeti michi aafoochee yeshiree wobote” iye. Gooroo woyino batt gaangiibeeti gooroone.

²¹ Ebich kechii hammiꞌi, showoon Tsiini barahoochee tiijjii, Hamaat beshe kaattooch beeti Rehoob beddaahaa qiiddiyeete.

²² Negeebi barahoona beshee hammiꞌi, Kebiroon shaggiyeete. Anaaqee yareenaꞌo tuneti Ahimaani, Sheshaayinaa Talimayina arooch beetinaꞌone. Kebirooni katemoo shuuneeto, Gibits beeti Tsoꞌaani katemoo shuuneyoyee shabaatte naton shiichiꞌiniye.

²³ Aroochee Eshikooli bambooch waaheete; woyinee aafo shushiti ikke yuunjoon kuxxiyeete. Gutte asheenaꞌo yaroona shaaggiyeete; wotta daakkiꞌi romaanee michi aafoonaa balaasee aafoonon deebiyeete.

²⁴ Israꞌeeleenaꞌo aroochee woyinee yuunjoon boonoshi kuxxitoyich, are xaaꞌoo Eshikooli Bamboo getaa ceekkehe.

²⁵ Aabbinnee qemooba showoon qiidoochee wotteheete.

Qiiddechinaꞌo Yechii Waati Woroo

²⁶ Qiiddechinaꞌo Muusi, Harooninaa Israꞌeeleenaꞌochi iitoo bullina beeti Faraani barahooch, Qadeesh waaheete. Woroonoo boonoshinaa iitoo bullinoyich gettiyeete. Are showeexi manjeebeeti michi aafoon boonoshich bekkiiheete.

²⁷ Muusichoo “Noon ne daachiiti showooch hammeto noone; aroo ejjoonaa eeyona xuupphiibeeti showoone. Bi immiibeeti aafo ebine.

²⁸ Tunebaani are showooch beeti asheenaꞌo giidechinaꞌone. Katemeenaꞌoo xaqqoona uxereeti, ogooge katemeenaꞌone. Wotta Anaaqee yareenaꞌon arooch beeggeto noone.

²⁹ Amaleeqeenaꞌo Negeebi kotetinaꞌone; Hiteenaꞌo, Yebuseenaꞌonaa Amooreenaꞌona geppe showooch kotetinaꞌone; Kanaaneenaꞌoo baharee gashoonaa Yoordaanoosi aachi gashoonooch kotetinaꞌone” iyeete.

³⁰ Kaaleebi, asheenaꞌo Muusi aafoochaa cikki ellemmoyich tuniiꞌi, “Ikke wottoona tiyi keyone. Showoon woraashoyich kochaa yeshon hakkemmo noone” iye.

³¹ Tunebaani biinna tookkii hammiti asheenaꞌo ishichiyeete: “Asheenaꞌo noyee beshe kuppheenaꞌo boonoshi tunetoyich, boonoshina koyoyich hamon hakkaachone” iyeete.

³² Ebich hammii qiiddii boonoshi beeggiti showeechi gonde woroon Israꞌeeleenaꞌoyich deebiꞌi, “Qiidooch no hammeti showoo bi daggooch beeti ashoon maa beetone. Arooch no beeggeti asheenaꞌo hakkechinaꞌone.

³³ Nefiliimeenaꞌonoo arooch beeggeto noone. (Anaaqeenaꞌo shiijjeto Nefiliimeenaꞌo waaneeniye.) Boonoshi aafoochaa noon no ciinigaata, gechooniye no shaahaa beeto; ebin shaahaaniye no ciichaabeeto” iyeete.