Haddoo 12 - Kafa Linguistics Project

Miiriyaminaa Haroonina Muusi Toommooch Timo

¹ Muusi Topphiyee asheen bi shaaggitoyich, ebi bi shaaggiti ure naboona Miiriyaminaa Haroonina biin gondii yibbaateheete.

² Ishichiinoo iyeete: “Iberoon Doono Yeeri Muusina baachiye bi gettito? Noonna getaanoone?” iyeete. Doono Yeeriyoo ishin waayehe.

³ Showee toommooch beeti asho bulliyee beshoon Muusi bi qelloon giishiibeeti ashoone.

⁴ Bekkech Doono Yeeri Muusin, Harooninaa Miiriyaminon “Ittoshi keemolla kaate keyiree, danee duukkaanooch wobote” iye. Boonoshiyoo kechii waaheete.

⁵ Doono Yeeriyoo giimboochoommon neexeebeeti quboona kindiꞌi, duukkaanee kellooch neexehe. Harooninaa Miiriyaminon ceeggiye. Boonoshi guttiyona bi waan waaheete.

⁶ Ishichiinoo iye: “Ta gettaa beeton waayebote. Ittoshi daggooch keemecho bi beegaata, Doono Yeeri ta, yaaꞌoona biich bekkaabeeto taane; gumonoo biich gettaabeeto taane.

⁷ Tunebaani ta guuno Muusina ta yibbaateebeeto ebiyoommona toonoone; Bi, ta kexo bulliich gibeneetone.

⁸ Biinna tookkaa ta yibbaateebeeto baroon baroona danaꞌa, xallalli aashoona toonoone. Doono Yeeri ta shaahoonoo beeggii beetone. Ishigaata, aabichaa aafoon kupphaꞌa ta guuno Muusi toommooch yibbaatehote?” iye.

⁹ Doono Yeeri kaaro boonoshi toommooch aaxxehe. Biyoo boonoshiyee bariꞌi hammiye.

¹⁰ Qubo duukkaanee toommoochee tiyiyee, Miiriyami qeddee shaddee biiyoona yexxaꞌa kecho naccoommon naccehan. Harooni Miiriyam waan wottee ciinniꞌi, qeddee shaddee biiyoona bi yexxoon beeggiye.

¹¹ Biyoo Muusich “Ta doonocho, xumme mooyon tuniyoona axaaxoon shuuneto noone. Doogena ebich noon naxeyaahine.

¹² Bi indee maacaa qicceꞌi, qachi bi ashittino ciyiichaa shiijjeebeeti bushoommon tunaayoye” iye.

¹³ Ebich Muusi “Ta Nuggishoocho, biin ne wodiyemmoyich neen qollehoye” iꞌi Doono Yeer waan cookiye.

¹⁴ Doono Yeeriyoo Muusich “Bi nihoo bi aafooch cudon cudi gaatoona, shabaatte qemon yeellaabeeti toone? Kaamboyee maach kichaa shabaatte qemon hicaa kotebuye. Ebiyee gubb kaambooch wottoon hakkemmine” iye.

¹⁵ Ebich Miiriyami kaamboyee maach kichaa shabaatte qemon kotahan. Miiriyami wottaa waammi wottoon, asheenaꞌo qaxiraaneenaꞌone.

¹⁶ Ebiyee gubb asheenaꞌo Hatserootee tiyii qaxiriyeete; Faraani barahooch kaamboon geddii koteheete.