Haddoo 10 - Kafa Linguistics Project

Birewoochee Shuuneeti Tireenaꞌo

¹ Doono Yeeri Muusich ishichiye:

² “Birewoon qiciree, gutte tiroon shuunebe. Ebi birewoochee shuuneti tireenaꞌon, iiteenaꞌon ceegonaa kaamboon happiree boonoshi tiyemmoyich tuniyoonoyich gaachebe.

³ Gutte tireenaꞌo hukkegaata, iiteenaꞌo bulli ne waan, danee duukkaanee kellooch kiceebeete.

⁴ Tunebaani ikke tiroo baach hukkegaata, ogoogeenaꞌo, ebi geto Israꞌeelee gumbee ukkireenaꞌo ne waan kiceebeete.

⁵ Tiroon qaaro oogichii ittoshi hugigaata, aabi-keyo waan kaambo geddii kotetinaꞌo qaxiribeete.

⁶ Guttinnoochaa tiroon qaaro oogichii ittoshi hugigaata, deshi-waan kaambo geddii kotetinaꞌo qaxiribeete.

⁷ Iiteenaꞌon kicoyich tiroon hugeete; tunebaani qaaroon oogichi huggaayeete.

⁸ “Qeesheenaꞌo tuneti Harooni bushiisheenaꞌo, tiroon hugeete; ebiyoo gubbi ittoshi shiijjeroo bulliich beddaahaa, bulli yemeenee qociyoon tunebe.

⁹ Ittoshi hajjee showoochaa ittoshin xuqqiti etteenaꞌon koyooch ittoshi keyiyooba, bi qaaroon oogichiree tiroon hugote. Ittoshi Nuggishoo Doono Yeeri ta aafoochaa shalligeyemmo ittoshine; ittoshi etteenaꞌo kishoochee ittoshin wodiyemmo taane.

¹⁰ Wotta ittoshi emiree aabooba, ittoshi baari baarooba, agenee keyi baarooba, micciibeeti deejjoonaa ikkittinee deejjoonon ittoshi giddiihooba tiroon hugote. Eboshiyoo Doono Yeeri ta aafoochaa ittoshi shalligeyemmoyich tuniyemminaꞌone; ta, ittoshi Nuggishoo Doono Yeeri taane” iye.

Israꞌeeleenaꞌo Siini Barahoochee Timo

¹¹ Guttinnee natooba, guttinnee agenee hiyinnee qemooba, qubo miixee duukkaanee toommoochee tiyiye.

¹² Israꞌeeleenaꞌo Siini barahoochee tiyii boonoshi gommon qaxiriyeete. Qubo Faraani barahooch kindii kotehe.

¹³ Doono Yeeri Muusina bi gettitoommon, batti batt tiyii qaxiriyeete.

¹⁴ Yihudi kuxeexi asheenaꞌo shiichiꞌi, boonoshi baanderoona boonoshi kuxi kuxona qaxiriyeete. Boonoshi toommooch ukkiroo Aminadaabi bushoo Nahishoonine.

¹⁵ Yisakoori yoodeenaꞌo toommooch ukkiroo Tsuꞌaari bushoo Netaaneline.

¹⁶ Wotta Zebulooni yoodeenaꞌoo toommooch ukkiroo Helooni bushoo Eliyaabine.

¹⁷ Aroochee yaafee duukkaanoo waachehe. Yaafee duukkaanoon shaaggiti, Gerishoonichi gumbeenaꞌonaa Meraarichi gumbeenaꞌona qaxiriyeete.

¹⁸ Aroochee Roobeeli kuxeexi asheenaꞌo boonoshi baanderoona, boonoshi kuxi kuxona qaxiriyeete. Boonoshi toommooch ukkiroo Sheduuri bushoo Elisuurine.

¹⁹ Simooni yoodeenaꞌo toommooch ukkiroo Tsurishadayi bushoo Shelumeline.

²⁰ Gaadi yoodo toommooch ukkiroo Deweeli bushoo Eliyasaafine.

²¹ Aroochee Qohaateenaꞌo yaafeeti qiicoon shaaggiꞌi qaxiriyeete. Boonoshi shagoyee shiichiꞌi, yaafee duukkaanoo xogee beehe.

²² Aroochee wotta Efreemi kuxeexi asheenaꞌo boonoshi baanderoona, boonoshi kuxi kuxona qaxiriyeete. Boonoshi toommooch ukkiroo Amihuudi bushoo Elishamine.

²³ Minaasi yoodeenaꞌo toommooch ukkiroo Fedatsuuri bushoo Gamaleeline.

²⁴ Biiniyaami yoodeenaꞌo toommooch ukkiroo Gideꞌooni bushoo Abidanine.

²⁵ Ciiroochaa Daani kuxeexi asheenaꞌo boonoshi baanderoona, boonoshi kuxi kuxona, bullich gubbaa deebo tuneꞌi qaxiriyeete. Boonoshi toommooch ukkiroo Amishadaayi bushoo Ahezeerine.

²⁶ Aseeri yoodeenaꞌo toommooch ukkiroo Okiraani bushoo Fageeline.

²⁷ Nifitaali yoodeenaꞌo toommooch ukkiroo Enaani bushoo Ahiirine.

²⁸ Israꞌeeleenaꞌo eechiꞌi, boonoshi kuxi kuxona qaxiriyeete.

²⁹ Muusiyoo Miidiyamee asho tuneti, bi abboo Reweeli bushoo Hobaabich ishichiye: “Doono Yeeri ‘Ittoshich immemmo taane’ bi iti xaaꞌooch hammaabeeto noone. Doono Yeeri Israꞌeeleenaꞌoyich gaawe mooyon tuniyoyich gibenikkitone; noonna tookki hambe. Nowoo gaawe mooyon neech tuniyemmo noone” iye.

³⁰ Tunebaani Hobaabi Muusich, “Ta hamaache; ta hajjee showoonaa ta xibeenaꞌona waaniye wotteree ta hammemmo” iye.

³¹ Muusi wochiꞌi, “Noon dufi ne hamaachemmoyich qollehoye. Barahee daggooch aabiich kaamboon gedi no kotemmo gaata xaaꞌoon ne arii beetoyich, nooch aafo tunemmo neene;

³² noonna tookkii ne hamigaata, Doono Yeeri nooch tuniimmi gaawe mooyo bulliichee, nowoo neech tuniyemmo noone” iye.

³³ Asheenaꞌo Doono Yeeri guudoochee tiyii keejje qemi gommon qaxiriyeete. Doono Yeeri wogee taabooto boonoshi kashemmi xaaꞌoon qaawiibee, ebi keejje qemi gommon boonoshi aafooch shiichiye.

³⁴ Kaambo bulliichee tiyii boonoshi qaxirii beehooba, Doono Yeerichi qubo areddoon boonoshi toommooch beehe.

³⁵ Muusi, taabooto tiyii qaxirimmona “Doono Yeero, tibe; ne etteenaꞌo shacebeete; ne shixechinaꞌo ne aafoochee aallebeete” ii beehe.

³⁶ Taabooto kashemmona, “Doono Yeero, humaa xume Israꞌeeleenaꞌo waan wottebe” ii beehe.