Haagi 2 - Kafa Linguistics Project

Andire Yaafee Kexoyich Beeyemmi Oogee Yiiroo

^1-2 Are natooba, shabaattinnee agenee hiyaa ikkinnee qemooba, Doono Yeeri bi wochoon keemechi Haagina, Shelateeli bushoo, Yihudee iraashoo Zerubabeelich, Yehotsedeeqichi bushoo, qeeshee guudo Yaasinaa echeti curo bullinoyich wochinnoon gettiye.

³ Haagiyoo “Doono Yeeri ishichiye: ‘Hini kexo ebiyee aaf am shaahe oogee yiirecho gaata beeggiti ashoochee echeto ittoshi daggoochee konine? And amoon tuneꞌi ittoshich bekkeebeete? Ebi and ittoshi ciinnich am bedaano toone?

⁴ Illa and Zerubabeelo, kupphebe. Yehotsedeeqichi bushoo, qeeshee guudo Yaaso, kupphebe. Hini showeexi asheenaꞌote, kuppheree shuunebote. Beshe Mawe Doono Yeeri ta, ittoshina tookkaa taane.

⁵ Gibitsee ittoshi keyiyooba, ittoshich ta gibenikkito ebiniye. Ta Ayaano ittoshina tookkii beetone; shattaahote’ iye.

⁶ “Wotta Beshe Mawe Doono Yeeri ishichiye: ‘Katinoon showoonaa shimaayoonon, baharoonaa shuuꞌi showoonon ikke wottoon wochinnoon shuurikkemmo taane.

⁷ Aageteenaꞌo bullin ta shuurikkaa, boonoshi gaanno hiniich woyemmone. Hini kexonoo oogee yiiroona ceechemmo taane.

⁸ Birewoo taachone; aachoo taachone.

⁹ Hini yaafee kechi oogee yiiroo aafichoyee beshoon tunemmone. Hini xaaꞌoochaa ta asheenaꞌoyich mashaamiti beemonaa diggoonon immemmo taane’ itone Beshe Mawe Doono Yeeri” iye.

Keemecho Ciicciti Ciico

¹⁰ Daariyoosi taateti guttinnee natooba, yiixiyinnee agenee hiyaa awuddinnee qemooba, keemechi Haagina Doono Yeeri gettiti qaaro ebine:

¹¹ Beshe Mawe Doono Yeeri ishichiye: “Qeesheenaꞌo ebi echoon boonoshi wochemmoyich echebe!

¹² ‘Ikke asho yaafeeti meenon bi qoreddoona qoddii yechiichii, koshooch woyee woxooch woyee woyinee uyooch woyee zayitooch woyee maayo amoochona, are qoreddoon bi bechigaata, eboshi yaafoo tuneheete?’ getiree echebe” iye. Haagi echemmona, qeesheenaꞌo “Yaafoo tuneyaacheete” iꞌi wochiyeete.

¹³ Aroochee Haagi daakkiꞌi ishichiye: “Ikke asho dubenoon bi kishoona yeshona eeꞌeechii, eboshiichee ikke mooyon bi yeshigaata, are bi yechiti mooyo eeꞌoon tunehe?” iꞌi echehe. Boonoshiyoo “Eeha, eeꞌoon tunehe” iyeete.

¹⁴ Aroochee Haagi boonoshich “Doono Yeeri ishichiye: ‘Hini asheenaꞌonaa hini aagetoona ta aafoochaa ebiyoommone; boonoshi kishoona boonoshi shuuneebeeti mooyo bulli ebiyoommone. Deejjee gudooch giddiiꞌi taach boonoshi deejjiibeeto, ebiyoommon eeꞌetone’ iye.

Doono Yeeri Maccoon Diiremmo Bi Tunoon Bi Gibenikkoo

¹⁵ “Wotta Doono Yeeri ishichiye: ‘Eke illa and, xaqqoon xaqqee toommooch keddeꞌi, Doono Yeeri ta yaafee kexon hagooch ittoshi gimoyee aaf tuneti mooyon shalligibote.

¹⁶ Ikke asho “Gutte kuntaal bede maayoon danemmo taane” ii gabiibee, maayi gutooch hammiꞌi, ikke kuntaaloon baach danehe. “Balle neetiroon danemmo taane” ii gabiibee, woyino koteti sharooch hammiꞌi, aabboon baach danehe.

¹⁷ Wooqoon, cindoonaa baderoonon deejjaꞌa aajjii ittoshi gochiti maayoon aalliihoye. Tunebaani ta waan wotteyaano ittoshine.

¹⁸ Hanaachi aabo yiixiyinnee agenee hiyaa awuddinnee qemone. Ebiyoo Doono Yeeri ta yaafee kechi xaqqee heco hecaa ciireti aaboone. Illa ebiyee damba tunemmi mooyon gaawichi ciinote.

¹⁹ And gotooch echeti maayo aalloone; woyinee qomboo, balaasee mixo, romaanee mixonaa zayitee mixona batt aafeyaaneenaꞌone. Tunebaani ta ebiyee damba ittoshin diiremmo taane’ itone” iye.

Zerubabeelich Yeeri Gibenikkiti Gibeno

²⁰ Arooba, ebiyoo are agenee hiyaa awuddinnee qemooba Doono Yeeri wochinnoon keemechi Haagich ishichiye:

²¹ “Yihudee iraashoo Zerubabeelich, ‘Showoonaa shimaayoonon shuurikkiya ii beeto taane;

²² showee toommooch beeti, taatittinee qeenon guuppa ii beeto taane; aagetee showee taatittinee giidoon aalliiya ii beeto taane; boonoshi gaarinaa gaarin yebbee beetinaꞌonon guuppa ii beeto taane. Boonoshi haresheenaꞌo qitemminaꞌone; yebbee beetinaꞌoo boonoshinaa boonoshina goraadoona qecceeree qitemminaꞌone.

²³ “ ‘Shelateeli bushoo, ta guuno Zerubabeelo, ebi aabooba ta neen daamiree, dukkeebeeti, ta kisheexi axxaamittee maatemoommon tuniyemmo taane. Ebiyoo, neen ta kaaccetoyichiye itone Beshe Mawe Doono Yeeri’ gete” iye.