Galaati 6 - Kafa Linguistics Project

Ikkoo Baroochi Shaagoon Shaaggii Gaacho

¹ Ta maneenaꞌote! Ittoshi daggoochee ikkoo toommooch amee xuꞌolla bi danegaata, Yaafe Ayaanoona yaabeebeeti ittoshi ebiyoommi ashoon shiimoona kaachibote. Newoo wotta ebiyoommi mooyona geecheeree ne dihaachemmoyich ne qelloon ariibe.

² Ittoshi daggoochee ikkoo baroochi shaagoon shaagi gaachebe; ebiyoommona Kiristoosi dojjiti sheeroon ceechiibeeto ittoshine.

³ Ikke asho bareenaꞌoyee beshaanoon beebee bi qelloon beshoon shaahiꞌi bi ciinigaata, bi qellooniye bi dawushii beeto.

⁴ Tunebaani asho bi ikkikkoona bi shuuneti shuunoo amoommo gaata gabi ariibe; aroyee gubb bi shuunoo gaaweto tunoon bareenaꞌochi shuunoona tachaanoon bi shuuneebeeti shuunoona baach emiremmone.

⁵ Ebiyoo, asho bulli bi qelli qellee shaagoon shaago echeyaani mooyo bi tunetoyichiye.

⁶ Yeerichi qaaroon waayeebeeto waayii beetona tookki gaawe mooyo bullin qoodeebe.

⁷ Ittoshin wochi dawushiyaahote; Yeeri toommooch cooqqiroo hakkeyaache; asho bi shookkii beeton aroon qeccemmone.

⁸ Bi hajjee meenon emirikkiya shookkiibeeto, meenoochee oꞌon qeccemmone; tunebaani Yaafe Ayaanoon emirikkiya shookkiibeeto, Yaafe Ayaanoochee bulli yemeenee kashoon qeccemmone.

⁹ Ebich gaawe shuunoon shuunoyich beenaayone. Taahoo no qayigaata, qecci goorooba qeccemmo noone.

¹⁰ Illa no hakkimmi aabo bullin asho bullich, ebiyeenoo boonoshi mulloon Yesuus Kiristoosi toommooch tooꞌiiꞌi ikke kechi ashoon tunetinaꞌoyich, gaawe mooyon tuniibone.

Ciireexi Shalligichoo

¹¹ Am shaahe ogooge biroona ta hajjee kishoona ta koorito gaata ciinote!

¹² Boonoshi meenona gaaweton tuneree bekkeya qaawii beetinaꞌo dokireebote iꞌi ittoshin yullii beetinaꞌone. Ebin boonoshi tuniibeeto, Kiristoosichi masqalee naboona duꞌo boonoshi toommooch bi shagaachemmoyichiye.

¹³ Ebi meechi doyoyich deꞌa ito ittoshi tunoona boonoshi geecemmoyich, ittoshi dokireyoon shunniyeetani, ebi are dokireetinaꞌolla boonoshi qelloona sheeroon ceechii quyeyaaneenaꞌone.

¹⁴ Tunebaani no Doono Yesuus Kiristoosi yooddeti masqaloyee beshetaa bare geecoo ta waanee wohe; are masqalee naboona hini alemeexi mooyo taach yoodaa qititone; tawoo wotta hini alemeexi mooyoyich yooddaa qitito taane.

¹⁵ Kiristoos Yesuusina andire halloon tunoani, dokireyoo woyee dokireyee qayo gaaccemmo toonoone.

¹⁶ Ebi ta gettaabeeti doyoommona beetinaꞌo bullich, Yeerichi asheenaꞌo tuneti Israꞌeeleenaꞌoyich, diggoonaa ariqqoona tunebe.

¹⁷ Yesuusichi malletoo tuneti banoo ta ashittinooch beetone. Ebich ebiyee bekk koniyoona taan iritiyaaye.

¹⁸ Ta maneenaꞌote! No Doono Yesuus Kiristoosichi wojjoo ittoshina tookki tunebe. Ameena.