Galaati 5 - Kafa Linguistics Project

Sheeroyich Hajjeyoochee Kiristoosina No Keyo

¹ Sheeroyich guunon tunee hajjeeꞌi beemoochee Kiristoosi noon biishee kichitone. Illa manjiree neexebote; wochinnoon guuchittinee waanjoona xandeyaahote.

² Ebiyoche, ta Phawuloosi ishichiyoye: Ittoshi dokireegaata, Kiristoosi ittoshich bi tuniiti mooyo bulli amoonolla ittoshich gaacaache.

³ Dokireyoon qaawii beetinaꞌo bulli, sheeroo bullin ceechoo boonoshich qaawii beeto bi tunoon boonoshi ikkikkoyich daakkaa manjiiꞌa gettoye.

⁴ Sheeroon ceechoona cadiqiya ii beeti ittoshi Kiristoosiyee bariꞌi, bi wojjoochee kechiꞌi dihito ittoshine.

⁵ No, Yaafe Ayaano immiibeeti giidoona no mulloon Yesuus Kiristoosi toommooch tooꞌiibee Yeeri nooch gibenikkiti cadiqoon quyaabeeto noone.

⁶ Ebiyoo Kiristoos Yesuusina tunetoyich, dokireyoo woyee dokireyee qayo bi gaaccemmi gaaco amolla aallo bi tunetoyichiye; gaaccemmo shunoona shuuneebeeti, Kiristoosi toommooch mullee tooꞌiyoo baachiye.

⁷ Gaawe wocon wocciibee echeto ittoshine; ishigaata and, iberoyich deꞌa ittoshi getaachemmoyich ittoshin bajjito konine?

⁸ Ebiyoommi maanjoo ittoshin ceeggito waanee waato toonoone.

⁹ “Giisheche shittoo dofee bukoon koofiihe” gettee beetoommoniye.

¹⁰ Ebiyee bariti mooyon gabaachemmo ittoshi tunoon Doono Yesuusina ittoshin gibenaabeeto taane; ittoshin shuurikkiibeeti asho koniyoona Yeeri nallemmi nalloo bi toommooch shaggemmone.

¹¹ Ta maneenaꞌote! Batt dokireebote iyaꞌa gettaabeeto ta tunegaata, ishigaata and beddaahaa asheenaꞌo taan duꞌii beeto amoyichiye? Ebin ta gettemmo gaata, Kiristoosichi masqalo ashich xugo tuneyaacheshone.

¹² Dokireebote iꞌi ittoshin shuurikkii beetinaꞌo dokireyoo qayaa nasheesholla geteete.

¹³ Ta maneenaꞌote! Guuchittinoochee ittoshi kechemmoyich Yeeri ittoshin ceeggitone; tunetaa ebi guuchittinoochee ittoshi keyon meechi qaatoyich deꞌa ittoshi gettemmi gommon tuniyaahote. Tunebaani ittoshinaa ittoshina ikkoo baroyich shunoona maddebe.

¹⁴ Ebiyoo, sheeroo bulli ikke qaaroona tacceto bi tunetoyichiye; ebiyoo “Neenoommi ne manoon neenna tachiree shune” ii beetonane.

¹⁵ Tunebaani ittoshinaa ittoshina ittoshi geccee beegaata, ittoshi dafee beegaata, ikkooch ittoshi aalleyaachemmoyich ittoshi qelloon ariibote!

Yeerichi Ayaanoona Yaabeeꞌi Beemo

¹⁶ Andoo ishichiyoye: Yaafe Ayaanoona yaabeeree beebote; meechi qaatoonoo ciroona ceechiyaahote.

¹⁷ Yaafe Ayaano qaatii beeton meeno shixxii beetone; wotta meeno qaatii beeton Yaafe Ayaano shixxii beetone. Eboshi boonoshinaa boonoshina qiiccee toommooch boonoshi beetoyich, ittoshi shunnii beeton tuniyoon hakkaachote.

¹⁸ Yaafe Ayaanoona ittoshi yaabeegaata, sheeroyich hajjeyaachote.

¹⁹ Meechi shuunoo arichetone; ebiyoo yahoo, eeꞌe shuunoo, yeelliibeeti kaayo,

²⁰ shahalloyich goyinno, iicoo (qaaxo), shixo, hayo, qanaato, kaaro, beshi bekkiya geto, barbaroo, iberoochee muricciꞌi bare guuphon halloo,

²¹ ashi wodoon shixo, masho, qelloon battiibeeti duubo, eboshinoo shaahiibeeti mooyone. Shiichaꞌa ittoshich ta gettetoommon, ebiyoommi mooyon tunii beetinaꞌo Yeerichi shimaajji taatittineen woraashaachemminaꞌone.

²² Tunebaani Yaafe Ayaanee aafo, shuno, emiroo, diggoo, haaꞌiyoo, ariqqo, deꞌittino, gibeneyoo,

²³ shiimecho tuno, bi qellee ariyoo, eboshine. Eboshiyoomminaꞌon bajjemmi sheeroo aalloone.

²⁴ Kiristoos Yesuusicho tunetinaꞌo meenon gonde bi gaboonaa bi qaatoona tookkii yoodditinaꞌone.

²⁵ Yaafe Ayaanoona beeto no tunegaata, Yaafe Ayaano wotta noon yaabibe.

²⁶ Noonnaa noonna qemeteyoonaa qanaatoona beebee duuboon geecaayone.