Galaati 4 - Kafa Linguistics Project

¹ Tunebaani ishichiyoye: Bi nihoo hajjito bullin deqqemmi bushoo, bushee bi beemmi yemeeno bullin amoommon bullichi doono bi tunetaanoona, guunoyee baraanoone.

² Nihoo “Ebiyooba ne qelloon hakkemmo neene” iꞌi bi taajjeti yemeenee wottoon kexon qeejjii beetinaꞌonaa gijje yesheenaꞌonoyee deshoone.

³ Ebiyoommon no wotta gaggere bushiishoommon tunaꞌa no beehooba, hini showee toommeexi shiiche doyoyich hajjee, guunon tunaꞌa beehone.

^4-5 Tunebaani Yeeri noon bi bushiishoon tuniiya iꞌi sheeroyich hajjeeꞌi beetinaꞌon biishe bi kichemmoyich, yemeeno shagiyooba bi Bushoon wochehe; wochee waa maachee waanee shiijjeꞌi sheeroyich deꞌa iibee beehe.

⁶ Ittoshiyoo Yeerichi bushiishoo ittoshi tunetoyich, “Taabbo, ta Nihoocho!” getiree ittoshi ceeggemmi bi Bushoochi Ayaanoon ittoshi mullooch deejjitone.

⁷ Ebich ebiyee bekk bushoo neyalli guuno toono neene; bushoo ne tunetoyich Yeeri bi bushiishoyich imma bi gibenikkito bullin woraashecho neene.

Galaatee Asheenaꞌoyich Phawuloosi Ayinoo

⁸ Wonna Yeerin ariyaan beebee, nuggishoo tuneyaani halleenaꞌoyich guunon tuneꞌi beehote.

⁹ Tunebaani and Yeerin ariichii, beshoonoo Yeeri ittoshin ariichaa, giidaalli hoxeeti shiichee doyooch wochinnoon aabichiꞌi wottehote? Guunon tuneꞌi eboshich wochinnoon hajjeyoon shunniyote?

¹⁰ Aaboon, agenoon, yarimmoon, natonoo haddiꞌi baariibeeto ittoshine.

¹¹ “Ittoshich ta aajjeti aayo bulli duubo tuno qayaache” iyaꞌa shattaabeeto taane.

¹² Ta maneenaꞌote! “Ta ittoshin shaahito taane; ittoshiyoo wotta taan shaahibote” iyaꞌa ittoshin qollehoye. Amee mooyonona taan xuꞌaano ittoshine.

¹³ Ittoshi arii beetoommon, shiichaꞌa mishiraachee qaaroon ittoshich ta getteto ta biiyee naboonane.

¹⁴ Ta biiyo ittoshin oogeton iritiito bi tunetaanoona, taan hoxee tiyaareyaano ittoshine; tunebaani Yeerichi maraakoon iibbiyoommon, ebiyeenolla Kiristoos Yesuusin iibbiyoommoniye ittoshi iibbiito.

¹⁵ Arooba oogeton emirito ittoshine; illa are ittoshi emiroo and aaye? Ittoshich bi hakkeemmo gaata, ittoshi aafee aachoonolla taach kichi immemmo ittoshi tunoon miixehoye.

¹⁶ Illa and iberoon ittoshich ta gettetoyich ittoshich etto tunehote?

¹⁷ Mishiraachee qaaroon xummiyoyich qaawiibeeti ebi asheenaꞌo boonoshi waan ittoshin wochiya qiiccee beetinaꞌone; ebin boonoshi tuniibeeto gaawe gaboona toonoone; boonoshich ittoshi qanaatemmoyich noonnaa ittoshinon kaariiree barbariiya shunnii beetinaꞌone.

¹⁸ Gaawe gaboona bi tunegaata ebi qanaato gaawetone; tunebaani ebi bi tunemmo, bulli aaboonalli, ittoshina tookkaa ta beehooba baach toonoone.

¹⁹ Ta shuni bushiisheenaꞌote! Ibere Kiristoosichi dabboon ittoshi tunemmi wottoon wochinnoon ittoshich maaxoo manjaabeeti ureyoommon tuneto taane.

²⁰ And ittoshina tookkii daneꞌi kupphe qaaroona yibbaatee ta qayon shunnoye. Ebich ta hallemmo taach tuusheetaa xuuxeto taane.

Haggaarinaa Saarinochi Shaahiyoo

²¹ Hini Muusichi Sheeroyich hajjeeꞌi beemoyich shunnii beetinaꞌote, eke taach getote: Are sheeroo gettii beeton waayeyaachehote?

²² Yaafe Macaafooch bi kooreetoommon ikkoo gonnee waanee, ikkoo gennee waanee shiijjeti gutte bushiisheenaꞌo Abrahamich beeheete.

²³ Tunebaani gonnee waanee shiijjeto meechi doyoommoniye bi shiijjeto; gennee waanee shiijjeto Yeeri gettiti gibenee qaaroommonane bi shiijjeto.

²⁴ Ebi mooyo shaahiyoone; ebi gutte maacheenaꞌo gutte wogee shaahiyeenaꞌone. Siini guudoochaa icheti wogoon shaahaabeeti ikkee Haggaarine. Areyoo bushiishoon guuchittinoyich shiyaa beetine.

²⁵ Ebi Haggaari Arabee showooch beeti Siini guudi shaahiyeene. Andoo showooch beeti hanaachi Yerusaalemichi shaahiyeene. Bi bushiishoona tookkaa guuchittinooch beetine.

²⁶ Tunebaani shimaajji Yerusaalemi guuchittinoona beetaaneene; areyoo no indeene.

²⁷ “Hini shiyaani xaafeene, emiribe! Haane maaxoo manjaa ariyaaneene, ne qaaroon oogichiree ililibe! Kenechi ureechi bushiishoyee beshoon, kenaallechi bushiishoo meettitone” getaa kooreetone.

²⁸ Ebich ta maneenaꞌote! Yisaaqi Yeeri gibenikkiti gibenee qaaroona Abrahami shiyiti bushoo bi tunoommon, ittoshiyoo wotta Yeeri gibenikkiti gibenee qaaroona Yeerichi bushiishoo tuneto ittoshine.

²⁹ Tunetaa arooba meechi doyoommon shiijjeto Yeerichi Ayaanoona shiijjeton duꞌiitone; andoo tuneebeeto ebiyoommone.

³⁰ Tunebaani Yaafe Macaafoochaa ama getteete? “Gonneechi bushoo genneechi bushoona tookki bi nihoo iristoon woraashaachemmone; ebich gonneen bi bushoona tookki kichi yoohe” getteetone.

³¹ Ebich ta maneenaꞌote! Genneechi bushiishoo noani gonneechi bushiishoo toono noone.