Galaati 3 - Kafa Linguistics Project

Wodoo Kiristoosi Toommooch Mullee Tooꞌiyoona Baach Bi Tuno

¹ Hini mullaalli Galaatee asheenaꞌote! Yesuus Kiristoosi masqalee toommooch bi yooddeyoo ittoshi aafooch xalla bekketone. Ishigaata ittoshin qaaxeꞌi moomito konine?

² Ebin baach ittoshi waanee ariyoyich qaawiyoye: Yaafe Ayaanoon ittoshi daneto, sheeroon ceechii ittoshi quyoonanee mishiraachee qaaroon waayee Yesuus Kiristoosi toommooch mulloon ittoshi tooꞌiyoonane?

³ Aabichiꞌi mullaalloon tunehote? Yaafe Ayaanee giidoona tiyiꞌi and meechi giidoona ciichiyote?

⁴ Ebi shaahe duꞌoon beeggiibee ittoshi echeto duubooniye? Halla iberoon duubooniye?

⁵ Yeeri bi Yaafe Ayaanoon bi immii beetonaa ittoshi daggooch gaakkechi mooyon bi shuunee beetona, sheeroon ceechii ittoshi quyoonanee mishiraachee qaaroon waayeꞌi Yesuus Kiristoosi toommooch mulloon ittoshi tooꞌiyoonane?

⁶ Ebiyoo Yaafe Macaafooch bi kooreetoommone: Abrahami mulloon Yeeri toommooch tooꞌiihe; ebi bi mullee tooꞌiyoo Yeeri aafoochaa biin cadiqiihe.

⁷ Illa mulloon Yeeri toommooch toꞌiitinaꞌo Abrahamichi bushiisheenaꞌo boonoshi tunoon ariibote.

⁸ Yaafe Macaafooch bi kooreetoommon, Yeeri Aageteenaꞌo boonoshi mulloon bi toommooch boonoshi tooꞌiitaa cadiqiyemmo bi tunoon shiichii Abrahamich “Neenna aageteenaꞌo bulli diireyemminaꞌone” iꞌi mishiraachee qaaroon gettiye.

⁹ Eboshi mulloon Yeeri toommooch tooꞌiitinaꞌo, mulloon tooꞌiiti Abrahamina tookkii diireetinaꞌone.

¹⁰ “Sheeroon ceechii no quyoona wodemmo noone” iꞌi gibenee beetinaꞌo uppeꞌiniye boonoshi beeto. Ebiyoo, “Muusichi Sheeree macaafooch kooreeti sheereenaꞌo bullin ceechii quyeyaano bulli uppetone” getaa bi kooreetoyichiye.

¹¹ “Yeeri toommooch mulloon tooꞌiyoona cadiqito kashecho tuneree beeyemmone” getaa Yaafe Macaafooch kooreetone; ebich asho koniyoona sheeroon quyoona Yeeri aafooch cadiqaachemmo bi tuno arichetone.

¹² Sheeroon quyo Yeeri toommooch mullee tooꞌiyoona daneebeeto toonoone. “Asho sheerooch kooreeto bullin ceechii bi quyegaata kashecho tuneree beeyemmone” getaa kooreetone.

¹³ “Mixooch yooddeebeeto bulli uppetone” getaa kooreetone; ebich Kiristoosi noocha iꞌi uppeton tuneꞌi sheeroo no toommooch deebemmi ufoochee noon biishehe.

¹⁴ Bi biisheto, Yeeri Abrahamich immiti diiroo Kiristoos Yesuusina Aageteenaꞌoyich bi shaggemmoyichiye; nowoo bi toommooch no mulloon tooꞌiyoona Yeeri gibenikkiti Yaafe Ayaanoon no deqqemmoyichiye.

Yeeri Gibenikkiti Gibenoon Sheeroo Shaddaachemmo Bi Tuno

¹⁵ Ta maneenaꞌote! Ashi doyee yibbaatoommon ishichiyoye; ashi wogolla bi tunetaa manjito bi tunegaata, koniyoona bayon woyee bare qaaroon daakkoon hakkaache.

¹⁶ Ebiyoommon wotta Yeeri Abrahaminaa bi yaroonoyich gibenee qaaroon gettiye; bi gettii beegaata, “Ne yaroyich” iꞌi ikke Abrahami yaroochon gettiyani, “Ne yareenaꞌoyich” iꞌi meetinaꞌochon getaanoone; ebi yaroo getoo Kiristoosine.

¹⁷ Ebinoo gettoye: Shiichiꞌi Yeeri Abrahamina tookkii wogoon giyiye; awudde ballaa shaashe natoyee gubb icheti sheeroo, shiichiꞌi Yeeri manjiiti wogoon happiꞌi are gibenee qaaroon shaddaache.

¹⁸ Iristoon woraashoo sheeroona bi tunegaata, illa gibenee qaaroona daneyaache; Yeeri gibenee qaaree naboona are wojjoon Abrahamich immitone.

¹⁹ Illa sheeroo icheto, amoyichiye? Gibenee qaaro ichetoyee gubb wotta sheeroo icheto, axaaxoo amo gaata bi bekkemmoyichiye. Are sheeroo icheto Yeeri gibenikkiti gibenee yaroo waammi wottooniye. Bi ichetoo maraakeenaꞌochi gommona, shoobbecho kishoonane.

²⁰ Shoobbecho guttoochi qoodoyichalli, ikkoochi qoodoyich baach neexeyaache; tunebaani Yeeri ikkoone.

²¹ Illa sheeroonaa Yeeri gibenikkiti qaaroona kaaree beetone? Toonoone! Kashoon imon hakkemmi sheeroo icheto gaata, iberoon asho cadiqemmo sheeroon bi quyoona tuneshone.

²² Tunebaani Yaafe Macaafo asho bulli axaaxoyich hajjeeꞌi axaaxoona cucheto bi tunoon xallayiꞌi gettitone. Ebich Yesuus Kiristoosi toommooch mullee tooꞌiyoona daneebeeti, Yeeri gibenikkiti wojjoon boonoshi mulloon bi toommooch tooꞌii beetinaꞌoyich immii beetone.

²³ Tunebaani Kiristoosi toommooch mullee tooꞌiyee yemeeno waataan beetaa, are mullee tooꞌiyoo gaxxeemmi wottoon, sheeroona cuchaa quyeeꞌa beehone.

²⁴ Ebich no mulloon Kiristoosi toommooch tooꞌiiree no cadiqemmoyich, are sheeroo Kiristoos waan shakkiibeeti quyecho tunetone.

²⁵ Tunebaani and are mullee tooꞌiyee yemeeno waatoyich, ebiyee bekk are sheeroo noon yechii quyeyaache.

Yeerichi Bushiishoo Tuno

²⁶ Ittoshi mulloon Kiristoos Yesuusi toommooch ittoshi tooꞌiyee naboona ittoshi bulli Yeerichi bushiishoo ittoshine.

²⁷ Kiristoosina tookkii ikkotteꞌi afaalleeti ittoshi bulli Kiristoosin taheto ittoshine.

²⁸ Ittoshi bulli Kiristoos Yesuusina, ikkoo tuneto ittoshine. Ebich Ayihudee asho geto woyee Giriikee asho geto aalloone; guuchi yaroo geto woyee doonji yaroo geto aalloone; anaamo geto woyee maachee geto aalloone.

²⁹ Ittoshiyoo Kiristoosicho ittoshi tunegaata, illa Abrahamichi yaroo ittoshine; Yeeriyoo bi gibenikkitoommon, woraashecho ittoshine.