Galaati 2 - Kafa Linguistics Project

Bare Mishiraachechinaꞌona Tookkii Phawuloosi Dano

¹ Aroochee aaraa awudde natoyee gubb Barnabaasina tookkaa Titoosin yechaꞌa Yerusaalem guttinnoon hammeho.

² Yeeri taach bi bekkiitoommon arooch hammeho; tuniiya ta gabaabeeto woyee ta tuniito aafaallo tuneree bi echeyaachemmoyich, Aageteenaꞌo daggooch ta gettaabeeti mishiraachee qaaroon kittinnee guuphinaꞌon yaabii beetinaꞌoyich badd arichiihoye.

³ Taanna tookkii beeti Titoosi Giriikee asho bi tunetaanoona, dokireebe getaaneenaꞌone.

⁴ Ebi mooyo bi tiyito, “Kittinnee manoo noone” ii beeti koote asheenaꞌo Kiristoos Yesuusina no daneti, guuchittinoochee keyon qiidoyich aashoona no daggooch boonoshi giyitoyichiye; boonoshiyoo guuchittinooch noon wochiya qaawiyeete.

⁵ Tunetaa mishiraachee qaaree iberoo ittoshi waan manjiree bi beeyemmoyich, ciroona boonoshich deꞌa iyaꞌa hajjeyaano noone.

⁶ Ebi are kittinnee guuphinaꞌon yaabii qeejjii beeton shaahiꞌi bekkee beetinaꞌo, koni boonoshi tunetaanoona aaxxiyaano taane; Yeeri ashoon heppaache; eboshi taach boonoshi giddiiti dallaawe mooyo aalloone.

⁷ Ebiyeenolla Yeeri bi mishiraachee qaaroon Pheexiroosi Ayihudeenaꞌoyich bi gettemmoyich bi imon, ebiyoommon Aageteenaꞌoyich ta gettemmoyich taach bi imon beeggiyeete.

⁸ Ebiyoo, Yeeri Pheexiroosin Ayihudeenaꞌoyich mishiraachecho tuniiꞌi biinna bi shuunoommon, ebiyoommon taan wotta Aageteenaꞌoyich mishiraachechon tuniiꞌi taanna bi shuunooniye.

⁹ Wotta Yeeri taach bi immiti wojjoon ariiꞌi giimboon shaahiꞌi bekkeebeeti Yaaqobi, Pheexiroosinaa Yowannisina boonoshi qanne kishoon imona noonna tookkii boonoshi tunoon bekkiiheete; taannaa Barnabaasina Aageteenaꞌo waan hammemmoyich, boonoshiyoo Ayihudeenaꞌo waan boonoshi hammemmoyich tuniiheete.

¹⁰ Boonoshiyoo girechinaꞌon baach no batteyaachemmoyich aderaheete. Ebinoo tuniyoyich qaawaa beehoye.

Pheexiroosin Phawuloosi Ittibato

¹¹ Aroochee Pheexiroosi Antsooka bi waahooba, bi tuniiti mooyo tato tuno bi qajjitoyich, xalla biin ittibatehoye.

¹² Yaaqob waanee wocheeti asheenaꞌo bi waan womoyee shiichiꞌi Aageteenaꞌona tookkii maa beehe; tunetaa ebi wocheeti asheenaꞌo waahooba “Dokireyoo qaawiihe” ii beeti asheenaꞌon shattii gubb shokiꞌi, Aageteenaꞌo waanee bariye.

¹³ Echeti Ayihudee kittinneenaꞌo, bi shuuneti mooyo tato tunee qayon ariibee biinna tookkii ikkotteheete; wotta Barnabaasinolla boonoshi waan wochii gaꞌiiheete.

¹⁴ Tunebaani mishiraachee qaaree iberee kaame gommona boonoshi hammi qayon ta ciinnehooba, kittinneenaꞌo bulli aafooch Pheexiroosin “Ne Ayihudee asho tunaachaa, Ayihudoommon tuneyaanoon Aagetoommon beeto neene; illa Aageteenaꞌo Ayihudeenaꞌochi doyoommon boonoshi beeyemmoyich aabichaꞌa xuqqenne?

¹⁵ “No, Ayihudee shiijjeroo noone; ‘Axaaxechinaꞌo’ getteebeeti, Aagetoo toono noone.

¹⁶ Tunebaani asho Yesuus Kiristoosi toommooch mulloon tooꞌiyoonalli, sheeroon ceechoona cadiqaachemmo bi tunoon ariito noone. Ebich sheeroon ceechoona tuneyaanoon, Kiristoosi toommooch mullee tooꞌiyoona no cadiqemmoyich, no mulloon Kiristoos Yesuusi toommooch tooꞌiito noone. Meenon taheti asho koniyoona sheeroon ceechoona cadiqaache.

¹⁷ “Tunebaani Kiristoosina cadiqiya qaawaabeeto tunaachaa no qelloona axaaxecho tunaꞌa no danegaata, illa Kiristoosi axaaxoon no shuunemmoyich noon xuqqii beete getoani am? Ciroona tuneyaache!

¹⁸ Ta happiti doyoon ebin wochinnoon haggaabeeto ta tunegaata, ta qelloona sheeroon ta shaaddoon bekkiibeeto taane getone.

¹⁹ Kashechon tuneree Yeerich ta beeyemmoyich, sheeroo waanaa sheeroyich qitito taane. Kiristoosina tookkaa yooddeto taane.

²⁰ Ebich tawoo ebiyee bekk kashechon tunaꞌa beetaache; tunebaani Kiristoosi ta mullooch giyiꞌi beetone. Andoo meenona ta beeti beemo, taan shunnii taacha iꞌi qitoyich bi qelloon beshii immiti, Yeeri Bushoo toommooch mullee tooꞌiyoona ta beemone.

²¹ Tawoo Yeerichi wojjoon dufaache; cadiqoo sheeroon ceechii quyoona danemmo bi tunegaata, illa Kiristoosi qitito duuboone” iyoye.