Galaati 1 - Kafa Linguistics Project

¹ Ashi waanee woyee asho koninolla tuneyaanoon Yesuus Kiristoosinaa qitoochee biin tiijjiti Nihoo Yeerina kaacheti Phawuloosi waanee,

² wotta taanna tookkii beeti maneenaꞌo bulli waanee, Galaatee showooch beeti kittinnee guuphinaꞌoyich:

³ No Nihoo Yeerinaa Doono Yesuus Kiristoosinochi wojjoonaa diggoona ittoshich tunebe.

⁴ Gondo meettiti hini yemeenooch beeti asheenaꞌon shaahiree no beetaachemmoyich, Kiristoosi noon wodiyoyich no Nuggishoonaa no Nihoona tuneti Yeerich deꞌa iꞌi no axaaxoyich deejjoon tunehe.

⁵ Nihoo Yeerich bulli yemeenoon oogee yiiroo tunebe. Ameena.

Ibere Mishiraachee Qaaro

⁶ Kiristoosichi wojjoona ittoshin ceeggiti Yeerin qajjiichii bare mishiraachee qaarooch aabichiꞌi afaafinee shokiyote? Ebi ittoshi tuniiti mooyon iberiyoo taach maggehe.

⁷ Ebi are qaaro mishiraachee qaaro toonoone. Tunetaa ittoshin shuurikkoonaa Kiristoosichi mishiraachee qaaroon xummiyoonoyich shunniibeeti ikkikkeenaꞌo beetinaꞌone.

⁸ Tunebaani no tunetaa woyee shimaajji maraakolla, hini no getteti mishiraachee qaaroyee bariti qaaroon bi getigaata, uppeton tunebe!

⁹ Ebiyee aaf ta gettetoommon andoo wochinnoon gettoye: Shiichiꞌi ittoshi iberiiti mishiraachee qaaroyee bariti qaaroon koniyoona ittoshich bi getigaata, uppeton tunebe!

¹⁰ Illa and naadoon danoon ta qaawaabeeto, ashi waaneeniyee Yeer waaneeniye? Woyee ashoon emirikkoon qaawaa beetote? Ashoon emirikkoon qaawaabeeto ta tunemmogaata, Kiristoosichi maddecho tuneyaachesho taane.

Mishiraachecho Bi Tunemmoyich Phawuloosin Ceeggito Yeeri Tuno

¹¹ Ta maneenaꞌote! Ta gettaabeeti mishiraachee qaaro ashi gaboochee kechito bi tunee qayon ittoshi ariyemmoyich shunnoye.

¹² Yesuus Kiristoosi taach bekkiitoani, ashi waanee ta daneto toonoone; asho koniyoona taach dojjaanoone.

¹³ Ebiyee aaf Ayihudeenaꞌochi maddee doyoommon aabichaꞌa ta beeto gaata waayeto ittoshine; bulliyee beshiiꞌa Yeerichi kittinnee guuphon duꞌiyoonaa aalliyoonoyich qiiccoona beehoye.

¹⁴ Ta qaabbechinaꞌochi doyoyich bulliyee beshoon qanaataabee Ayihudeenaꞌo tuneti meeti ta goomeenaꞌoyee Ayihudeenaꞌochi maddee doyoon ceechoona beshaa beehoye.

¹⁵ Tunebaani ta indee maacooch ta beetaa taan biich bariiꞌi bi wojjoona taan ceeggito Yeerine.

¹⁶ Aageteenaꞌo daggooch bi Bushoochi mishiraachee qaaroon ta gettemmoyich, bi Bushoon taanna bekkiiya bi qaawiyooba, arooba asho koninolla boyeyaano taane.

¹⁷ Tayee shiichiꞌi beeti mishiraachechinaꞌo waan Yerusaalemolla hamaano taane; tunebaani Arabee showooch hammeho; aroochee Damaasiqi katemooch wotteho.

¹⁸ Aroochee keejje natoyee gubb Pheexiroosin beegga Yerusaalem hammaꞌa biinna tookkaa aaraa uuche qemon arooch koteho.

¹⁹ Tunebaani no Doonochi manoo Yaaqobiyee damba mishiraachechinaꞌo daggoochee koninolla beegaano taane.

²⁰ Ebi ta kooraa beeti mooyo iberoone; iberoon Yeeri aafooch kootoon yibbaateyaache.

²¹ Aroyee gubb Sooriyee showoonaa Kiliqee showoonooch hammoye.

²² Arooba boonoshi mulloon Kiristoosi toommooch tooꞌiiti, Yihudee showeexi kittinnee guuphinaꞌo taan beeggii ariyaaneenaꞌone.

²³ Tunebaani “Ebiyee aaf noon duꞌiiti uro, aalliiya bi iiti Yesuusichi mishiraachoon and ashich gettii beete” getaa bi getteyoon waayeheete;

²⁴ ta nabonoo Yeerin galleteheete.