Filipphisiyoosi 4 - Kafa Linguistics Project

Phawuloosi Ciicciti Ciico

¹ Oogichii shunnaa ta sharaataabeeti ta maneenaꞌote! Ta emiroonaa ta naadee gubbichoona ittoshine. Shucheti ta maneenaꞌote! Ittoshich ta gettetoommon ebiyoommon no Doono Yesuusina manjiree neexebote.

² Doono Yesuusina ikkoon tuneree ikke gaboona boonoshi shunemmoyich Ewoodinaa Sinxeekinon qollehoye.

³ Ne wotta Yeerichi shuunoona taanna tookkaa xaaqqeeti ibere ta addaaroocho, ebi genneenaꞌon ne gaachemmoyich neen qollehoye; boonoshiyoo taanna tookkii, kashee macaafooch boonoshi shigo kooreeti Qelimixoosinaa wotta taanna tookkii shuuneti bareenaꞌona tookkii mishiraachee qaaroon gamichoyich aajjitinaꞌone.

⁴ Bulli aaboon Doono Yesuusina emiribote; daakkaꞌa gettoye, emiribote!

⁵ Ittoshi deꞌittino asho bullich arichebe. Doono Yesuusi kaateree woyemmone.

⁶ Mooyo bullich corootibee, maaggebee, galletebeeshoo, Yeeri aafooch ittoshi qolloon arichiibotalli, ikke mooyoyichona xuuxeyaahote.

⁷ Ittoshi shalligoo bulliyee beshiti Yeerichi diggoo Kiristoos Yesuusina ittoshi mulloonaa ittoshi gaboonon quyemmone.

⁸ Illa ta maneenaꞌote! Gaawe mooyon woyee galleteya bede mooyon baach gabibote. Eboshiyoo ibere mooyo bullin, gaawe mooyo bullin, kaame mooyo bullin, xalle gaboo beeti mooyo bullin, emirikkiibeeti mooyo bullinaa naadoo beeti mooyo bullinon gabibote.

⁹ Ittoshich ta dojjitonaa ittoshich beshii ta immetonon, ittoshi waayeti ta qaaroon, ittoshi beeggiti ta shuunoon, eboshi bullin shuunee toommooch heechiibote. Arooboo diggee Nuggishoo ittoshina tookki tunemmone.

Filipphisiyoosi Kittinneenaꞌon Phawuloosi Galleto

¹⁰ And meeti aaboyee gubb ta mooyon wochinnoon gabooch ittoshi giyitoyich, Doono Yesuusina oogeton emirito taane. Taach ittoshi shakkiyemmi gommon muccehotalli taan iberoon gabiibeeto ittoshine.

¹¹ Ishichaa ta ii beegaata, “Iritecho taane” geto toonoone. “Ta beeti beemo taach beddiye” geton doyito taane.

¹² Mucceꞌi beemonoo doyito taane; beshaa beshoon daneꞌi beemonoo doyito taane; amee moochi daggoocholla ta tunetaa, mooyo bullina, miyonaa shaacoonon, beshaa beshiiꞌi danoonaa mucceꞌi beemonon doyito taane.

¹³ Giidoon taach immiibeeti Kiristoosina bulli mooyon tuniyoon hakkaabeeto taane.

¹⁴ Tunetaa ta iritoon qoodeyoona taan ittoshi gaachetoyich gaawichito ittoshine.

¹⁵ Filipphisiyoosi kittinneenaꞌote! Shiichaꞌa mishiraachee qaaroon ittoshich ta gettetoyee gubb Makidoonee showoochee ta keyiyooba, gijjee wojjoon imona taan gaacheto ittoshi baachalli, bare kittinnee guupho koniyoona tunee qayon ariibeeto ittoshine.

¹⁶ Tasaloonqi katemooch beebee ta iriteetaa, taach tunemmi gijjee wojjoon wochii wochii deejjito ittoshine.

¹⁷ Ta ishichaabeeto, ittoshi deꞌittinoyich gaacoon ittoshi danemmoyich qaawoonalli, ittoshi gijjee wojjoon qaawoona toonoone.

¹⁸ Ittoshi deejjiti gijjee wojjoon Ephafroditoos waanee deqqeto taane; illa and bulli mooyo taach beetone; beshaa beshoonoo woddetone. Ebi ittoshi immiti gijjee wojjoo Yeerich giddeebeeti cinnechonaa biin emirikkii beetona tuneti deejjoone.

¹⁹ Ta Nuggishoo ceeni bi gaannoochee ittoshich shappimmi mooyo bullin Kiristoos Yesuusina ceechemmone.

²⁰ No Nuggishoo tuneti Nihoo Yeerich bulli yemeenoon oogee yiiroo tunebe. Ameena.

Ciireexi Diggiyoo

²¹ Yaafeenaꞌo bullich Kiristoos Yesuusina ta diggiyoon bechibote. Taanna tookkii beeti kittinnee maneenaꞌo ittoshin diggiitinaꞌone.

²² Hiniich beeti yaafeenaꞌo bulli, beshoonoo Qesaari kechi asheenaꞌo ittoshin diggiitinaꞌone.

²³ Doono Yesuus Kiristoosichi wojjoo ittoshi bullina tookki tunebe. [Ameena.]