Filipphisiyoosi 3 - Kafa Linguistics Project

Ibere Cadiqee Gommo

¹ Illa ta maneenaꞌote! Doono Yesuusina emiribote. Ikke mooyon wochinnoon wochii ta koorigaata taan taahiyaache; ittoshichoo wotta gaaccemmone.

² Kunaaneenaꞌo waanee ittoshi qelloon quyebote; gondoon shuunee beetinaꞌo waanee, dokireebote iꞌi ittoshin xuqqii beetinaꞌo waaneenoo ittoshi qelloon quyebote.

³ Iberoon dokireeto, Ayaanoona Yeerich goyinneebeeti, Kiristoos Yesuusina geeciibeeti, meechi doyoona geecaani, noani boonoshi tooneenaꞌone.

⁴ Tunebaani meechi doyoona geecoon wotta hakkesho taane. Bare asho koniyoona bi tunetaa meechi doyoona bi geecemmi mooyo biich beeto bi shaahigaata, ta ishichiꞌi gaboyich beshe mooyo taach beete.

⁵ Ta shiijjeti shimitte qemona dokireeto, Israꞌeelee shiijjeroochee tuneto, Biiniyaami yoodo, Hibireenaꞌo daggeexi Hibiroo taane. Ayihudee sheeree doyeechon ittoshi echegaata, Farisoo taane.

⁶ Qanaateechon ittoshi echegaata, kittinnee guuphon duꞌiibee echeti asho taane. Sheeroon ceechoona daneebeeti cadiqeechon ittoshi echegaata, ikkeenolla shappayaanoon bullin ceechaa quyaabee echeti asho taane.

⁷ Tunebaani taach gaaccemmone iyaꞌa ta gabiti mooyo bullin and Kiristoosicha iyaꞌa ciroona gaacaachemmo tuniiꞌa haddito taane.

^8-9 Ebi ikkeeto tuneyaanoon, bulliyee beshiton danoyich, ebiyoo Kiristoos Yesuusi ta Doonon ariyoyicha iyaꞌa ebi mooyinaꞌon ciroona gaacaachemminaꞌon tuniiꞌa haddito taane. Biicha iyaꞌa eboshi bullin qajjeto taane. Kiristoos Yesuusi toommooch mullee tooꞌiyoona daneebeeti cadiqoo, ebiyoo sheeroon ceechii ta quyoona daneti cadiqoo tuneyaanoon, mullee tooꞌiyoona Yeer waanee daneebeeti cadiqoo taach bi beeyemmoyich, Kiristoosin danoyicha iyaꞌa bullin guudoon shaahiiꞌa duppeto taane.

^10-11 Qitoochee tiyemmo ta tunoon gibenaꞌa Kiristoosinaa qitoochee biin tiijjiti giidoonon ta ariyemmoyich, bi xuuxoon ta qoodeyemmoyich, bi qitoonoo biin ta shaahemmoyich qaataabeeto taane.

Tuggooch Bedoyich Phawuloosi Woco

¹² “And yecheto taane” woyee “And shappaalli asho taane” getaache; tunebaani Kiristoos Yesuusi taan bi yeshiyooba bi gabiti gaboon aroon wotta “Ceechemmo taane” iyaꞌa woccaabeeto taane.

¹³ Ta maneenaꞌote! Batt “Yecheto taane” iyaꞌa haddaache. Tunebaani ikke mooyon baach tuniyaabeete. Ta gubb beeton battaabee, ta aaf beeton yeshoyich yafiyoye.

¹⁴ Yeeri Kiristoos Yesuusina, damba beeti kashoyich taan bi ceeggiti naadee wojjoon ta danemmoyich, tuggooch shagga woccaabeeto taane.

¹⁵ Illa manjii kuppheti kittinnoo no bulli ebin gabibone; ittoshin barbarii beeti gaboo ittoshi daggooch bi beegaata, ebi gaboon Yeeri ittoshich gaxxi bekkiyemmone.

¹⁶ Tunetaa ebiich beddaahaa noon bechiti are gommona hambone.

¹⁷ Ta maneenaꞌote! Taan shaahii beeton tunebote. No tuniyaabeeti gaawe shaahiyoon dabbii beetinaꞌon ciinote.

¹⁸ Ebiyee aaf meeti aaboon ebin ittoshich getteto taane. Andoo eeppaabee daakkaa gettoye: Meetinaꞌo boonoshi beemi qocoona Kiristoosichi masqaloyich etto tunetinaꞌone.

¹⁹ Boonoshi ciiro aallooch hamone; boonoshi meechi qaatoo boonoshich nuggishoone; yeelliibeeti mooyo boonoshich oogoone; boonoshi gaboo showee toommeexi mooyoyich baachiye.

²⁰ Tunebaani no beeyemmi xaaꞌoo shimaayoochiye. Aroochee woyemmi Wodiyecho, biyoo Doono Yesuus Kiristoosin quyaabeeto noone.

²¹ Biyoo hini yiingaalli, qitemmi no ashittinoon shaddiree, worganikkiti oogee yiirechi bi ashittinoon shaahiyemmone. Ebin bi tuniyemmo bullin bi oogee dechiich tuniyoon bi hakkemmi giidoonane.