Filipphisiyoosi 2 - Kafa Linguistics Project

Bi Qelloon Giishiiti Kiristoosi Bulliyee Beshe Doono Tuno

¹ Kiristoosina kuppheebeeto ittoshi tunegaata, bi shunoona goggeebeeto ittoshi tunegaata, bi Ayaanoona tookkii ikkittino ittoshich beegaata, ittoshinaa ittoshina shoodeebeeto, ariqqeebeetoo ittoshi tunegaata,

² illa ikke gaboona, ikke shunoona, ikke kashoona, ikke mulloonoo tuneree, ta emiroon ceechibote.

³ Ittoshi qelloon giishiyoona “Ta manoo tayee gaawiye” getiree gabibotalli, beshi bekkeya getiree woyee duube naadoon daneya getiree ikke mooyonona tuniyaahote.

⁴ Asho bi ikkikkoona bi manoyich gaaccemmi mooyonalli bi qellich gaaccemmi mooyon baach gabaaye.

⁵ Kiristoos Yesuusich beeti gaboommi gaboo ittoshi waan wotta tunebe.

⁶ Biyoo bi shuriyoona Nuggishoo tuneebee, Yeerina tookkii tato tuneꞌi echoon shunaanoone;

⁷ tunetaa guuchi malletoon yechiꞌi, ashi shaahoona daneꞌi, bi qelloon shokko tuniihe; ashi shaahoonoo bekkehe.

⁸ Bi qelloon giishiihe; qitooch beddaahaa, ebiyoo masqalee toommooch yooddeꞌi qitooch beddaahaa, Yeerich deꞌa iye.

⁹ Ebich wotta Yeeri biin beshiiꞌi beshaa beshoon oogiihe; shigoyee beshiti beshe shigoon biich immiye;

¹⁰ ebin bi immito, shimaayoonaa showoonooch, showoyee deshoo beeto bulli Yesuusichi shigoyich bi gutenemmonaa

¹¹ heciyoo bulli Nihoo Yeerin oogiyoyich Yesuus Kiristoosi Doono bi tunoon bi miixemmonoyichiye.

Hini Showee Toommooch Beeti Asheenaꞌoyich Ceechoon Shaahiꞌi Bekko

^12-13 Gaawe bi daaggoon ittoshi qaawemmoyich, are bi daaggoonoo ittoshi ceechemmoyich, bulli aaboon ittoshina shuuneebeeto Yeerine. Ebich shucheti ta maneenaꞌote! Bulli aaboon ta ciicoyich ittoshi deꞌa itoommon, ittoshina tookkaa ta beetaa baach tuneyaanoon beshoon and ittoshi waanee ta wohi beetaa, ta ciicoyich deꞌa getote. Ittoshi daneti wodoo ceeno bi tunemmoyich shati qewebee kuppheree shuunebote.

^14-16 Gondoonaa xummoona tuneti shiijjeree daggooch oonaalli, bachaalli xalle Yeerichi bushiishoo ittoshi tunemmoyich, guruuxaanoon, hayeyaanoon bulli mooyon tuniibote. Kashoon immiibeeti Yeerichi qaaroon boonoshi daggooch getibee hini alemooch xojjenoochoommon bekkemmo ittoshine. Ebich ta woconaa ta aayona duubo bi tunee qayo Kiristoosi wotteꞌi bi waahooba taach geecoo tunemmone.

¹⁷ Illa gibenoona ittoshi giddiibeeti deejjoonaa maddoonochi toommooch uyee deejjoon tunaꞌa ta deejjeeto gaatoona emiriyoye; ittoshina tookkaa emirito taane.

¹⁸ Ittoshiyoo wotta ebiyoommon emiribote; taanna tookkishoo emiribote.

Ximootiyoosinaa Ephafroditoosinon Filipphisiyoosi Daachiiya Phawuloosi Gaboo

¹⁹ Ittoshi beemo amoommo gaata waayeree ta emiremmoyich, Doono Yesuusichi daaggoo tunegaata, Ximootiyoosin ittoshi waan kaate woche ta daachiyemmoyich gibenaabeeto taane.

²⁰ Ittoshi diggoyich mulloochee tiijjiꞌi gabiibeeto, biinoommi bare asho koniyoona taach aalloone.

²¹ Bareenaꞌo bulli boonoshi qelli qellichon gabiyeetalli, Yesuus Kiristoosichon aaxxiyaacheete.

²² Tunebaani bi, gibeneeto bi tuno manjitone. Bushoo bi nihoyich aajjii bi shuunoommon taanna tookkii mishiraachee qaaree shuunoon aabichiꞌi bi shuuneto gaata ariibeeto ittoshine.

²³ Illa ta mooyo ikke badd wottetoyee gubb, biin bekkech ittoshi waan ta daachiyemmoyich gibenaabeeto taane.

²⁴ Ta qelloona ta, ittoshi waan kaate ta woyemmoyich Doono Yesuusina gibeneeto taane.

²⁵ Taach manoo, taanna tookkii Kiristoosichi shuunoon shuunoona ginee naayoommo tuneti, ittoshi waanee wocheeꞌi waa taan gaacheebeeti Ephafroditoosin ittoshi waan daachiyoo taach qaaweebeeto bi tunoon gabito taane.

²⁶ Ebiyoo ittoshin oogichii bi sharaatee beetoyichiye; wotta bi biiyoon ittoshi waayetoyich keqqii ayinii bi beetoyichiye.

²⁷ Iberoone, biiyeꞌi qitooch bedditone; tunebaani Yeeri biin ariqqee gaachetone. Ebin bi tuniito, ta ayinee toommooch ayinoo daakkeyaachemmoyich taachoonalli bi ikkeetoyich toonoone.

²⁸ Illa wochinnoon biin beegiree ittoshi emiremmoyich, taachoo ta ayinoo kettemmoyich, biin ittoshi waan daachiyoyich kuppiiꞌa qaawito taane.

^29-30 Taan gaachoon ittoshi hakkaani aabooch taach shappiti mooyon ceechoona bi kashoonolla aaxxiyaanoon Kiristoosichi shuunoyich qitoyich beddaahaa yaadii kuxxitone. Ebich ceeni emiroona Doono Yesuusicha getiree biin iibbiibote; biinoommi asheenaꞌo bullinoo oogiibote.