Filipphisiyoosi 1 - Kafa Linguistics Project

Diggiyoo

¹ Kiristoos Yesuusichi guuninaꞌo tuneti Phawuloosinaa Ximootiyoosina waanee, Filipphisiyoos beeti, kittinnee guuphon yaabii qeejjiibeeti geeneenaꞌonaa daaquuneenaꞌona tookkii, Kiristoos Yesuusina yaafeenaꞌo tunetinaꞌo bullich:

² No Nihoo Yeerinaa Doono Yesuus Kiristoosina waanee wojjoonaa diggoona ittoshich tunebe.

Wochoon Bi Kooriti Asheenaꞌoyich Phawuloosi Corootoo

^3-5 Ta corootaabeeti aabo bullin ittoshi bullichon emiroona corootaabee, shiichiꞌi ittoshi mulloon Yesuus Kiristoosi toommooch ittoshi tooꞌiiti aaboochee tiijjiꞌi hanaach beddaahaa, Yeerichi mishiraachee qaaree shuunoona taanna tookkii ittoshi ikkottetoyich, ittoshin ta shalligimmi aabo bullina ta Nuggishoon galletehoye.

⁶ Ebi gaawe shuunoon ittoshina shuunooch giyiti Yeeri, Yesuus Kiristoosi wotteree bi woyemmi aabooch beddaahaa are shuunoon shuune ciichemmo bi tunoon manjiiꞌa ariito taane.

⁷ And cuyee kexooch cuchaꞌa ta beetaa, wotta mishiraachee qaaree iberoyich taggaa, aroonoo manjii ta beetaa, ittoshi bulli ebi shuunoyich taanna tookkii Yeerichi wojjee qoodeyecho ittoshi tunetoyich ta mulloochee batteyaachote. Ebichoo ebi ittoshi bullichon ta gaboo tatoone.

⁸ Kiristoos Yesuusi ittoshin bi shunniibeeti shunoona ittoshi bullin aabichaꞌa ta sharaataabeeto gaata Yeeri ta miixoone.

^9-11 Yeeri oogemmonaa galleteyemmonoyich Yesuus Kiristoos waanee daneebeeti cadiqee aafo ittoshi kashooch ceenee, Kiristoosi woyemmi aaboobich qanniree xalloonaa bachaalloona ittoshi tunemmoyich, beshe gaaweti mooyon ciini beegiree ittoshi ariyemmoyich, ittoshi shuno, ariyoonaa shalligoo bullina aafichoyee beshoon dici bi woddemmoyich, corootaabeeto taane.

Kiristoosichi Mishiraachee Qaaro Getteetoyich Phawuloosi Emiroo

¹² Ta maneenaꞌote! Ebi ta toommooch shaggiti mooyo iberoon mishiraachee qaaroon bi gamichoon ittoshi ariyemmoyich shunnoye.

¹³ Ebich cuyee kexooch ta cucheyoo Kiristoosichi naboyich bi tunoon taatoochi kellee quyechinaꞌo bullinaa bare asheenaꞌo bullina arii beetinaꞌone.

¹⁴ Kittinnoo tuneti maneenaꞌo daggoochee meetinaꞌo ta cucheyee naboona beshoon Doono Yeerin gibenetinaꞌone; shataanoonoo Yeerichi qaaroon getoyich aafichoyee beshoon aafoon kupphee beetinaꞌone.

¹⁵ Ikkikkeenaꞌo ta toommooch qanaatoonaa taan shixonoochee tiyitona gettii beetinaꞌone; bareenaꞌoo wotta shunniꞌi gaawe gaboona Kiristoosichi mishiraachee qaaroon gettii beetinaꞌone.

¹⁶ Eboshi taan boonoshi shunnii beetoyich, Yeerichi mishiraachee qaaree iberittinoon xiishi ta bekkiyemmoyich ebi shuunoo taach icheyoon ariiꞌi shunoona gettii beetinaꞌone.

¹⁷ Tunebaani ohoshi cuyee kexooch cuchaꞌa ta beetaa xuuxoon ta toommooch deebi daakkemmo boonoshich bi shaahaa, beshe bekkeya iꞌi xalloo tuneyaani gaboona Kiristoosichi mishiraachee qaaroon gettii beetinaꞌone.

¹⁸ Tunebaani aakke! Bulli gommona boonoshi gaboo tato bi tunetaa woyee tuno bi qajjitaa, Kiristoosichi mishiraachee qaaro gettee beetone. Ebichoo oogichaa emiriyoye; gubbichoo wotta emiremmo taane.

¹⁹ Ebiyoo taach Yeerin ittoshi qolletaa, Yesuus Kiristoosichi Ayaanoo taan gaachetaa, taach wodoo bi tunemmon ta ariitoyichiye.

^20-21 Kashoona ta beemo Kiristoosichiye; ta qitenoo gaacechi mooyone. Ebich kashoona ta beetaa woyee ta qititaa, ikke mooyonona yeelleyaanoon aafoon kupphaꞌa gettaabee ebiyee aafichoommon andoo wotta ta tuniyaabeeti mooyo bullina Kiristoosin oogiyoo ta qaatoonaa ta gibenoonane.

²² Tunebaani meenona ta beegaata, aafechi shuunoon daakkiree shuunoon ta hakkemmoyichiye; tunetaa aabi gaaweto gaata taach bekkeyaanoone.

²³ Ebi gutte mooyona shaammehoye; hamma Kiristoosina tookkiree beeya sharaatehoye; ebiyoo bulliyee beshaa beshe gaawetone.

²⁴ Tunebaani meenona ta beemo ittoshich oogeton gaaccemmone.

²⁵ Ebinoo iberiiꞌa meenona ta beeyemmonaa ittoshi bullina tookki ta yagemmonon ariibeeto taane. Arooba Kiristoosi toommooch mulloon tooꞌiyoona diccemmo ittoshine; emirishoo gettemmo ittoshine.

²⁶ Wochinnoonoo ittoshin beegga ittoshi waan ta waahooba ta naboona Kiristoos Yesuusina ittoshich beeti geecoo woddemmone.

²⁷ Illa Kiristoosichi mishiraachee qaaroyich baach bedditon tuneree beebote. Ebi tunegaata, waa ittoshin ta beeggetaa woyee ittoshiyee ta wokketaa, ikke mulloona mishiraachee qaaree gibenoyich qiicceebee ikke ayaanoona manjiꞌi ittoshi neexoon waayemmo taane.

^28-29 Ittoshi mulloon Kiristoosi toommooch tooꞌiyoyich baach tuneyaanoon, biicha getiree duꞌoon wotta ittoshi beeggemmoyich ittoshich ichetone; ebich ittoshin shixxiꞌi duꞌii beetinaꞌoyich ikke mooyonona keqqiyaahote. Ebi ittoshi keqqee qayo boonoshich aallee malletoo, ittoshich wotta wodee malletoone. Ebi ittoshi wodoo bi daneto Yeer waaneeniye.

³⁰ Ittoshinaa taanna ikke shaahe qiiccee toommoochiye no beeto. Ebiyoo ebiyee aaf taanna ittoshi beeggitoommon, andoo taanna bi beemon ittoshi waayee beetoommone.