Filimooni 1 - Kafa Linguistics Project

¹ Kiristoos Yesuusichi qaaroon ta getti naboona cucheti ta Phawuloosinaa no manoo Ximootiyoosina waanee, No shunnaa beetonaa noonna tookkii Kiristoosich maddeebeeti Filimoonich,

² ne kexooch kiceebeeti kittinnee guuphoyich, no manee Afibiyich, noonna tookkii Kiristoosichi shuunoona ginee naayoommo tuneti Arikiphaasich:

³ No Nihoo Yeerinaa Doono Yesuus Kiristoosinochi wojjoonaa diggoona ittoshich tunebe.

Filimoonichi Ibere Mullee Tooꞌiyoonaa Shunoona

^4-5 Shucheti ta manoo Filimoono, yaafeenaꞌo bullin ne shunonaa Doono Yesuusi toommooch mullee tooꞌiyoona ne manjoonon waayaꞌa corootoona neen gabaabee ta Nuggishoon galletaabeeto taane.

⁶ Kiristoosina nooch beeti gaawe mooyo bullin gaawichii shalligoona Yesuus Kiristoosi toommooch beeti ne mullee tooꞌiyoon bareenaꞌoyich qoodoyich ne kupphemmoyich corootaabeeto taane.

⁷ Ta manoocho, yaafeenaꞌo mulloon ne kashiitoyich, ebi ne shunoona oogichaa emirito taane; oogetonoo goggeto taane.

Filimoonin Phawuloosi Qolleti Mooyo

⁸ Ebich, ne tuniya bede mooyon ne tuniyemmoyich neech getoyich Kiristoosina amoommon wodde aafee kuppho taach bi beetaanolla,

⁹ geeno tuneti ta Phawuloosi, andoo wotta Kiristoos Yesuusichi qaaroon ta getti naboona cucheto, neen ta shunnaa beetoyich neen qollehoye.

¹⁰ Hini cuyee kexooch beechaa ta shiyeti ta bushoo Anaasimoosichon neen qollaabeeto taane.

¹¹ Ebiyee aaf neech gaacaanoone; tunebaani and ne ikkeetoyich baach tuneyaanoon, taachoo wotta gaaccemmone.

¹² And biin ne waan daachiibeeto taane. Ta kashoona tachaꞌaaniye biin ta shunnaabeeto.

¹³ Tawoo mishiraachee qaaroon ta getti naboona cuchaꞌa ta beetaa, ne qoodoon taan bi gaachemmoyich ta waan biin echiyoon ta shunnetaanolla,

¹⁴ ne deꞌittino ne daaggoonalli bi tunemmo, giidoona bi tuneyaachemmoyich ne daaggaanoon amoonolla tuniyoon qaawaano taane.

¹⁵ Anaasimoosi giisheche aaboyich ne waanee bi barito, diqqich bulli yemeenoon neenna tookki bi beeyemmoyich tunemmone.

¹⁶ Illa ebiyee damba neenna tookki bi beeyemmo guunoommon tuneyaanoon, guunoyee beshiti shucheti manoommoniye; taach shucheti manoone; neechoo wotta meenona tunebe Doonona beshoon shucheti manoone.

¹⁷ Illa taan nuuchoommon tuniiꞌa ne ciinigaata, taan tuniiree ne kexooch biin giijjibe.

¹⁸ Neen bi xuqqiti amee mooyolla bi beegaata woyee bi toommooch hiishoo beegaata, ebin ta toommooch dufe.

¹⁹ “Ta Phawuloosi, ta neech qoccemmo taane” iyaꞌa ta kishoona koorito taane. Ebiyee damba taach Kiristoosin ne daneti kashee hiishoo ne toommooch beetone getaache.

²⁰ Ebich ta manoocho, Doono Yesuusicha getiree taach ne gaaccemmoyich tunebe; Kiristoosicha getiree ta mulloon kashiibe.

²¹ Ta gettetoyee beshoon tuniyemmo ne tunoon ariiꞌa deꞌa ne gettemmonoo gibenaꞌa kooraabeeto taane.

²² Ebichi toommooch ta daakkemmo wotta ta kashemmi kexonoo taach qanniibe; Yeeri ittoshi qolleti qolloon waayeree ittoshi waan taan wochi daachiyemmo bi tunoon gibenaabeeto taane.

Ciireexi Diggiyoo

²³ Kiristoos Yesuusichi naboona cuyee kexooch taanna tookkii cucheeꞌi beeti Epphaafiri neen diggiitone.

²⁴ Ebiyoommon wotta taanna tookkii shuuneebeeti Maariqoosi, Arsixirokoosi, Deemaasinaa Luqaasina neen diggiitinaꞌone.

²⁵ No Doono Yesuus Kiristoosichi wojjoo ittoshina tookki tunebe.