Erimiyaasi 9 - Kafa Linguistics Project

¹ Wuxeeti ta asheenaꞌoyich, xumoonaa areddoonon ta eeppemmoyich, ta qello aacon, ta aafo acimee tunoon tuneshoo geta!

² Boonoshi bulliyona shunimaayeenaꞌo, dawushechinaꞌochi guupho boonoshi tunetoyich, ta asheenaꞌon qayi wohi ta hammemmoyich, gommechinaꞌo kasheebeeti baraheexi xaaꞌoon, koni taach imba?

³ “Kootoon kootoyich boonoshi heciyoon maꞌoochoommon ciixxiyeete; iberoo tuneyaanoon kooto showee toommooch taatehe; gondee gondee qeyiyeete; taanoo ariyaaneenaꞌone iye” Doono Yeeri.

⁴ “Manoo bulli marecho bi tunetoyich, xiboo bulli oonecho bi tunetoyich, ittoshi bulli ittoshi xibeenaꞌon diqqeyaahote; ittoshi maneenaꞌonoo gibeneyaahote.

⁵ Asho bulli bi xiboon dawushiye; iberoon yibbaateebeeto koniyoona aalle; kootee yibbaatoon boonoshi heciyooch dojjitinaꞌone; gonde mooyon tuniyoona aajjiyeete.

⁶ Xuꞌee toommooch xuꞌoon, maree toommooch maroon, daakkiyeete; taan ariyemmonoo qajjiyeete” iye Doono Yeeri.

⁷ Illa ebich, Beshe Mawe Doono Yeeri ishichiye: “Xuuroo wociyoommon boonoshin wociyemmo taane; boonoshin phiremmo taane; ta asheenaꞌochi xuꞌoyich, ebiyee besh amoon tuniibote?

⁸ Boonoshi heciyoo acheeti shangoommone; maroona yibbaatehe; bulliyona bi xiboona tookki diggoona yibbaatehe; tunebaani bi mulloona bi toommooch ottiye.

⁹ Ebi mooyoyich boonoshin nax bedaachote? Ebiyoommi asheenaꞌo toommooch ta, ta qelloona nichoon kichiya bedaachote?” iye Doono Yeeri.

¹⁰ Guudinaꞌoyich eeppemmo taane; baraheexi gaddeenaꞌoyichoo shooshemmo taane; aroona asho besheyaani shokkaachoo tunetinaꞌone; miinji qaadoo waayeyaanoone; cooxinaꞌonaa shimaajji kafeenaꞌona goojjii hammitinaꞌone.

¹¹ Doono Yeeri ishichiye: “Yerusaalemi katemoon buricee gutoo, boqqelleenaꞌo gofo tuniyemmo taane; Yihudee katemeenaꞌonoo asho goojjiti xaaꞌoon tuniyemmo taane” iye.

¹² Ebin shalligoyich ariyechi asho konine? Ebin bi awaajjemmoyich, Doono Yeeri gettito konichiye? Asho besheyaachemmoyich showoo amoyich duubehe? Shuuꞌi showoochoommon amoyich shuuqqiye?

¹³ Doono Yeeri ishichiye: “Boonoshich ta immeti sheeroon boonoshi qajjitoyich, ta qaaroon waayo woyee ta getteton tuniyoo boonoshi qajjitoyichiye.

¹⁴ Boonoshiyoo babbereꞌi boonoshi gaboo waan wotteheete; boonoshi qaabbechinaꞌo boonoshich dojjitoommon Baꞌaaloyich goyinneheete.

¹⁵ Ebich Israꞌeelee Nuggishoo Beshe Mawe Doono Yeeri ta, hini asheenaꞌo caame maayoon boonoshi maayemmonaa xuppattee aacon boonoshi uchemmonoyich tuniyemmo taane;

¹⁶ boonoshinaa boonoshi qaabbechinaꞌona ariyaani aageteenaꞌo daggooch boonoshin shaccemmo taane; boonoshin ta aalliimmi wottoon boonoshi hillooch goraadoon daachiyemmo taane” iye.

Yerusaalemaa Eeppeyemmi Eefo

¹⁷ Beshe Mawe Doono Yeeri ishichiye: “Eke ebi mooyon shalligibote; eeppechi maacheenaꞌo woyemmoyich ceegote; shoosho ariyechi maacheenaꞌo waanoo wochiibote” iye.

¹⁸ No aafoo acimoon bi qapphillemmoyich, no aafee qeexxoo acimoon bi shekillemmoyich, kaateree nooch shooshebeete.

¹⁹ “Aabichii aallehone! Ciroona cooneeto noone! No kexinaꞌo happeetoyich showoon duppeto noone” ii beeti eeppi qaaro Tsiyoonee waayeehe.

²⁰ Genneenaꞌote! Doono Yeerichi qaaroon waayebote! Ittoshi waamo bi noonoochee kechiibeeti qaaroon waayebe: Ittoshi maache bushiishoyich eefon, ittoshi xibeenaꞌoyich shooshoon dojjibote.

²¹ Gaggereenaꞌon gommoochee, gurimaasheenaꞌon addibaaboochee aalliyoyich qitoo no mallee kellooch shaggitone; no taatee kexinaꞌoochoo giyitone.

²² Ishichishoo getote: “Doono Yeeri ishichiye: ‘Ashi dubeno, guudoochoommon gaddooch, koniyoona macaani, qeccechochi hillooch oojjiti, maayi ooyoochoommon dihemmone’ itone” getote.

²³ Doono Yeeri ishichiye: “Ariyecho bi ariyoona yebenaaye; hakkecho bi hakkoona yebenaaye; gaannecho bi gaannoona yebenaaye;

²⁴ tunebaani degeyemmo, shoodoon, dayinnetoonaa cadiqoonon showee toommooch tuniyaabeeto ta tunoon bi ariyoonaa bi digenoona, ebina degeebe; ebiyoo ebi mooyinaꞌo taan boonoshi emirikkii beetoyichiye” iye.

²⁵ Doono Yeeri ishichiye: “Shigoyich baach dokireetinaꞌo bullin ta sheeremmi aabo woyemmone;

²⁶ Gibitseenaꞌo, Yihudee asheenaꞌo, Edoomeenaꞌo, Amooneenaꞌo, Moꞌabeenaꞌonaa boonoshi qelloon qebbii beeti, barahooch kotetinaꞌo bullina, ebi aageteenaꞌo bulli ta qaawitoommon dokireyaaneenaꞌone; ebiyoommon wotta Israꞌeelee kechi asheenaꞌo bullichi mulloo dokireyaanoone” iye.