Erimiyaasi 8 - Kafa Linguistics Project

¹ Doono Yeeri ishichiye: “Ebiyooba Yihudee taateenaꞌochi shaawushoonaa iraasheenaꞌochi shaawushoonon, qeesheenaꞌochi shaawushoonaa keemechinaꞌochi shaawushoonon, Yerusaalemi katemee asheenaꞌochi shaawushoonoo boonoshi oppoochee kichemminaꞌone.

² Boonoshi shunnii maddeti, boonoshi qaawii dabbiti, goyinneenoo iti aabeenaa ageneenochi, wotta shimaajji xojjeneenaꞌo aafooch boonoshin yachemminaꞌone; boonoshi shaawusho ikkooch kicaa duukkeyaachemmone; showee toommooch guudoochoommon qixeyemminaꞌone.

³ Ta yookketi showoo bulliich echetinaꞌo, ebi gonde gumbeenaꞌoochee echeti cureenaꞌo bulla kashoona beemoyee qitoon shunnemminaꞌone, iye Beshe Mawe Doono Yeeri.

Axaaxee Naboona Waati Naxo

⁴ “Boonoshich, Doono Yeeri ishichiye, gete! Dihiti asho wochinnoon tiyaanoone? Muriccito wotteyaanoone?

⁵ Ishigaata hini Yerusaalemi asheenaꞌo amoyich gubb wotteꞌi qappooch hammiyeete? Xumme mooyon shunnitinaꞌone; ta waan wottemmonoo qajjitinaꞌone.

⁶ Tawoo manjii ellehoye; ibere mooyon yibbaateyaaneenaꞌone; koniyoona ‘Ebi ta tuniito amooniye?’ iꞌi gondoochee wotteto aalloone. Koyee xaaꞌooch wocciibeeti hareshoochoommon bi ikkikkoona bi gommi gommona hammiye.

⁷ Maannaakkolla bi wottemmi gooroon arii beetone; daabbiche, yegeccoonaa maallinaayona boonoshi goojjemmi aaboon arii beetinaꞌone; tunebaani ta asheenaꞌo Doono Yeerichi doyoon ariyaaneenaꞌone.

⁸ “Ishigaata ‘No ariyecho noone; Doono Yeerichi sheeroo no waan beetone’ geton aabichiree hakkehote? Ebiyoche gibeneyaani sheeree dojjechinaꞌo sheeroon wuuqqitinaꞌone.

⁹ Ariyechinaꞌo Doono Yeeri ta qaaroon qajjitinaꞌone; illa amee ariyoo boonoshich beete? Ebich boonoshiyoo yeelle keqqemminaꞌone; kecaanoo hammemminaꞌone.

¹⁰ Girechoochee tiijjii gaannechooch beddaahaa gijjoyich boonoshi hiriggii beetoyich, keemechoochee tiijjii qeeshooch beddaahaa bulliyona dawushoona boonoshi tunii beetoyich, boonoshi mecheenaꞌon bareenaꞌo shaaggemmonaa boonoshi goyoon bareenaꞌo iristo tuniiree hajjemmonoyich immemmo taane.

¹¹ Ta asheenaꞌochi tiishoon kettii ciinniyeetalli bi wodemmoyich tuniyaaneenaꞌone; diggoo aalloon ‘Diggoo, diggoone’ iyeete.

¹² Ciigiiti mooyon boonoshi tuniitoyich yeelleteete? Ciroona yeelleyaaneenaꞌone; yeello amo gaatoona ariyaaneenaꞌone. Ebich bareenaꞌo dihoommon dihemminaꞌone; boonoshin ta naxehooboo qiti aallemminaꞌone” iye Doono Yeeri.

¹³ Doono Yeeri ishichiye: “Boonoshin aalliyemmo taane; boonoshiyoo aafaalli woyinee qomboomminaꞌone; aafaalli, bi waamoo shuuqqiti balaasee mixoomminaꞌone. Ebich boonoshich ta immeto boonoshi kishoochee muriccemmone” iye.

¹⁴ Yeerichi asheenaꞌoo “Cikkiree no kotemmo amoyichiye? Doono Yeerin no xuqqetoyich no Nuggishoo Doono Yeeri no aallemmoyich tuniitone; xuppattechi aaconoo nooch uchitone; ebich kicee ittoshi getaa manje katemeenaꞌooch gibone; aroochaanoo qitibone.

¹⁵ Diggoon gibeno geddehone; tunebaani gaawe mooyo daneyaanoone; wodee aaboon gibeno geddehone; ebiyoche keqqoo tunehe.

¹⁶ Haresheenaꞌochi qaaro Daani katemoochaa waayeehe; ginee anaaminaꞌochi haresheenaꞌo gashigishoochee tiyitona, showoo bulla qewehe. Waaꞌi showoonaa arooch beeto bullinon, katemoonaa arooch beeto bullinon maaheete” iyeete.

¹⁷ “Qaaxoona wotteyaani dingereenaꞌonaa xekereenaꞌonon ittoshi daggooch deejjemmo taane; boonoshiyoo ittoshin qoppemminaꞌone” iye Doono Yeeri.

Bi Asheenaꞌoyich Erimiyaasi Ayinoo

¹⁸ Ta ayinoo ta haaꞌiyoyee damboone; ta mulloo ta maacaa niretone;

¹⁹ “Doono Yeeri Tsiyoon aalloone? Woyee bi Taatoo bi waan aalloone?” ii beeti ta asheenaꞌochi qaaro, wohi showoochee waayeehe. Doono Yeeriyoo, “Shahalleenaꞌonaa dallaawe nuggisheenaꞌonoyich goyinnoona, amoyich taan ippiiheete?” iye.

²⁰ Asheenaꞌoo, “Maayi qecci gooroo beshetone; qaawoo ciyitone; nowoo wodaano noone” iyeete.

²¹ Ta asheenaꞌochi tiishee naboona ta mulloo tiishetone; eeppehoye; keqqoo taan maatone.

²² Gilaadee showooch huuteyemmi atto aalloone? Woyee aakumo arooch aalloone? Ta asheenaꞌo amoyich wodaacheete?