Erimiyaasi 7 - Kafa Linguistics Project

Yaafee Kexoochaa Erimiyaasi Gettiti Wocho

¹ Doono Yeeri taach gettiti qaaro ebine:

² “Doono Yeerichi yaafee kechi kellooch neexebe; ebi qaaroonoo aroochaa ishichi gete: ‘Doono Yeerich goyinnoyich hini kelleenaꞌona giyiibeeti Yihudee asheenaꞌo bulloshite! Doono Yeerichi qaaroon waayebote.

³ Israꞌeelee Nuggishoo Beshe Mawe Doono Yeeri ishichiye: Ittoshi gommonaa ittoshi shuunoonon gaawichibote; hini xaaꞌooch ittoshin kotiyemmo taane.

⁴ “Hini Doono Yeerichi yaafee kexone; Doono Yeerichi yaafee kexone; Doono Yeerichi yaafee kexone” getibee koote qaaree toommooch gibeno geddaahote.

⁵ “ ‘Iberoon ittoshi gommonaa ittoshi shuunoonon ittoshi kaachigaata, ikkoonaa ikkoonochi daggooch dayinnetoona ittoshi nalligaata,

⁶ dallaawoon, nihaalloonaa xuumeenon xuꞌo ittoshi qayigaata, hini xaaꞌoochaa xalle damoon ukkoo ittoshi qayigaata, ittoshich aalloon deebemmi bare nuggishoon dabboo ittoshi qayigaata,

⁷ ittoshi qaabbechinaꞌoyich bulli yemeenoyich ta immeti xaaꞌoo hini showooch ittoshin kotiyemmo taane.

⁸ “ ‘Ebiyoche gaacaalli duube qaaroon gibeneto ittoshine.

⁹ Gaajjiyote; wuxiyote; shaddiyote; kootoon wogehote; Baꞌaaloyich ixaanoon shookkiyote; ittoshi ariyaani bare nuggisheenaꞌon dabbiyote;

¹⁰ ta shigoona ceekketi hini kexooch waanoo ta aafooch neexeechii “Wodito noone” iibee ebi ciigiiti mooyo bullin tuniihote.

¹¹ Ebi ta shigoona ceekketi kexo ittoshi aafoochaa bokkeenaꞌochi gofoon ittoshich shaahii beete? Ittoshi tunii beeton beeggeto taane, iye Doono Yeeri.

¹² “ ‘Ta shigo arooch beeyemmoyich batti batt ta kaacceti, Shiloohi katemooch beeti xaaꞌooch hambote; ta asheenaꞌo tuneti Israꞌeeleenaꞌo gondoochee tiyitona ta tuniiton beegote!

¹³ And ebin ittoshi tuniitoyich, ta gettehooba waayoon ittoshi qajjitoyich, ta ceeggehooboo eekkoon ittoshi qajjitoyich,

¹⁴ Shiloohi katemooch ta tuniitoommon ta shigo ceekketi, ittoshiyoo gibeneebeeti kexooch ittoshinaa ittoshi qaabbechinaꞌonoyich ta immeti xaaꞌooch tuniyemmo taane.

¹⁵ Ittoshi maneenaꞌo tuneti Efreemichi asheenaꞌo bullin ta dufoommon ta aafoochee ittoshin duppemmo taane’ gete.

Asheenaꞌo Deꞌa Getti Qayo

¹⁶ “Erimiyaaso, boonoshich ne corootiibeeti corootoon waayeyaachemmo ta tunetoyich, hini asheenaꞌoyich ta waan corootiyaahine; ne qaaroon oogichi cookiree boonoshich qolleyaahine; boonoshin shoobba giyaahine.

¹⁷ Yihudee katemeenaꞌonaa Yerusaalemi katemee addibaaboonoochaa boonoshi tunii beeton beegaano neene?

¹⁸ Shimaajji taateyich koshon kachiyoyich, boonoshi bushiisheenaꞌo mixon mittiyeete; niheenaꞌo qaaqqoon shookkiyeete; maacheenaꞌo buddinoon xiriqqiyeete. Taan ippiyoyich bare nuggisheenaꞌoyich uyee buuroon ukkiyeete.

¹⁹ Ebi ta ippemmoyich tuniyoyichiye? Boonoshi gondiibeeto, boonoshi toommooch yeelloon boonoshi deebiibeeto, boonoshi qellichiye, iye Nuggishoo Doono Yeeri.

²⁰ Ebich Nuggishoo Doono Yeeri ishichiye: Ebiyoche ta kaaroonaa ta neboona hini xaaꞌooch, ashoonaa kubbeexi cooxonochi toommooch, mixinaꞌonaa showee toommeexi maayi aafeenaꞌonochi toommooch wonemmone; aaxxemmone; tahishoo getaachemmone” iye.

²¹ Israꞌeelee Nuggishoo Beshe Mawe Doono Yeeri ishichiye: “Micciibeeti ittoshi deejjoon bare ittoshi deejjee toommooch daakkibote; meenonoo mamote.

²² Gibitsee boonoshin ta kichiyooba ittoshi qaabbechinaꞌoyich micciibeeti deejjeechonaa bare deejjeechonon getaano taane.

²³ Tunebaani ‘Ta qaaroon waayebote; ta, ittoshi Nuggishoon tunemmo taane; ittoshiyoo ta maccoon tunemmo ittoshine; ittoshich bi kaamemmoyich, ta gommona hambote’ iyaꞌa boonoshich getteto taane.

²⁴ Tunebaani boonoshi mullee gonde gaboonaa babberittinoona hammiyeete; aaf tuneyaanoon gubb hammiyeetani waayeyaaneenaꞌone; boonoshi waamon ta waan gaꞌiyaaneenaꞌone.

²⁵ Ittoshi qaabbechinaꞌo Gibitsee boonoshi kechitoochee tiijjii hanaach beddaahaa, qemi qemona ta maddechinaꞌo tuneti keemechinaꞌon ittoshich deejjii beehoye.

²⁶ Tunebaani boonoshi mulloon muumiiheetani taachon waayeyaaneenaꞌone; boonoshi waamon gaꞌiyaaneenaꞌone; halla boonoshi qaabbechinaꞌo tuniitoyee beshe gonde mooyon tuniiheete.

²⁷ “Ebi qaaro bullin boonoshich gettemmo neene, tunebaani waayeyaachemminaꞌone; ceeggemmo neene, tunebaani neech eekkeyaachemminaꞌone.

²⁸ Newoo boonoshich: ‘Boonoshi Nuggishoo Doono Yeerich deꞌa getaani, sheerenoo deꞌaani asheenaꞌo hinoshine; iberoo aalletone; boonoshi noonoocheenoo kuxetone.

Hinoomi Bamboochaa Tuneti Ciigiiti Mooyo

²⁹ “ ‘Doono Yeeri bi kaaroon boonoshi toommooch bi kinditi shiijjeroon bi duppitoyich, bi qajjitoyichoo, ittoshi qelloon cakkeree qelli eexon kaawi dufote; hulloo tuneti geppeenaꞌoochaa shooshe eefote’ gettemmo neene.

³⁰ “Yihudee asheenaꞌo ta aafooch gonde mooyon tuniitinaꞌone, iye Doono Yeeri. Ta shigo ceekketi kexon eeꞌiyoyich boonoshi ciigiiti mooyon arooch kotiitinaꞌone.

³¹ Ta getaanoon, ta mulloonoo ta gabaanoon, boonoshi anaami bushiisheenaꞌonaa maache bushiisheenaꞌonon qaaqqoona michoyich, Hinoomi bushoo bambooch beeti Tofeeti goyinnee xaaꞌoon shuunetinaꞌone.

³² Ebiyoche illa ebi xaaꞌoo Guuree bamboani guttinnoon Tofeeti woyee Hinoomi bushoo bamboo bi getteyaachemmi yemeeno woyemmone; ebiyoo xaaꞌee muccoochee tiyitona Tofeet duukkemminaꞌo boonoshi tunetoyichiye, iye Doono Yeeri.

³³ Hini asheenaꞌochi dubeno shimaajji gaceenaꞌonaa kubbi cooxinaꞌonoyich maayoon tunemmone; boonoshin shatii yookkemmo aalloone.

³⁴ Showoo shokkoon echemmo bi tunetoyich, Yihudee katemeenaꞌonaa Yerusaalemi addibaaboonoochee ililee qaaroon, emiree qaaroon, woꞌeechi qaaroonaa woꞌee kenoochi qaaroonon aalliyemmo taane” iye.