Erimiyaasi 6 - Kafa Linguistics Project

Yerusaalemi Ettoona Giicheyoo

¹ Biiniyaami asheenaꞌote, ittoshi kashoyich Yerusaalemee keyi wocote. Gonde mooyonaa oogeti aalloona dambi-waanee woyemmo bi tunetoyich, Teqoꞌi katemoochaa shametoon hugote; Beet Hakereemi katemoochaanoo malletoon kaama tiijjibote.

² Shuchiitonaa gaawetona tuneti Tsiyooni katemoo aallemmone.

³ Qiddeenaꞌo boonoshi gijjeenaꞌon yeshi arooch woyemminaꞌone; bi guudoona boonoshi duukkaanoon xogemminaꞌone; boonoshi qelli qelloona gijjeenaꞌon boonoshi xaaꞌi xaaꞌoochaa qiddemminaꞌone.

⁴ Boonoshiyoo, “Yerusaalemin koyoyich qannibote; tibote; aabee qellayooch koyone. Ye, showoo xumetoche; womikkee yiiritto wottetone.

⁵ Ishigaata, tibote; xumoona koyone; bi mishigeenaꞌon happibone” gettemminaꞌone.

⁶ Ebich Beshe Mawe Doono Yeeri ishichiye: “Bi mixinaꞌon qecce dichibote; Yerusaalemi guudoona showoon gutibote; bi maacooch beeto xuꞌo baach bi tunetoyich ebi katemee naxeya bedeene.

⁷ Oppo aacon bi xuuphiyoommon gondoon xuuphiihane; xuꞌoonaa aallee cookoona bi waanee waayeehe; biiyoonaa mayona bulli aabooch ta aafoochiye.

⁸ Yerusaaleme, neyee ta baraachemmoyich, neen shokkaache onoon ta tuniyaachemmoyich, ta gettaa beeton manjii waayebe” iye.

Israꞌeeleenaꞌo Hukkechinaꞌo Tuno

⁹ Beshe Mawe Doono Yeeri ishichiye: “Asho bi woyinoon bi buttoommon Israꞌeelee cureenaꞌon ciiroona buttemminaꞌone; woyinee buttechochoommon ne kishoon bi qaakko qanna wochinnoon yaggibe” iye.

¹⁰ Ta getaa waayemmo koni beete? Konich kupphii getote? Boonoshi waamo hichetone; elloon hakkaaneenaꞌone; ebiyoche Doono Yeerichi qaaro cooqqireetone; boonoshinoo emirikkaanoone.

¹¹ Ebich Doono Yeeri ippoommon ippeto taane; haaꞌii maac yeshon womiito taane. Aroochee Doono Yeeri taach ishichiye “Gommooch beeti bushiisheenaꞌo toommooch, wottoo kiceeꞌi beeti gurimaasheenaꞌo toommooch, ebi kaaroon kindiibe; kenoonaa mecheena, geenetinaꞌonaa baayetinaꞌona yeshaa hammemminaꞌone.

¹² Showooch beetinaꞌo toommooch ta kishoon yaggemmo ta tunetoyich, boonoshi kexinaꞌo, boonoshi goyeenaꞌonaa boonoshi mecheenaꞌona ikkittinoona bareenaꞌoyich tunemminaꞌone” iye Doono Yeeri.

¹³ “Girechoochee tiijjii gaannechooch beddaahaa gijjoyich hiriggii beetinaꞌone; keemechoochee tiijjii qeeshooch beddaahaa bulliyona dawushechinaꞌone.

¹⁴ Ta asheenaꞌochi mayon kettii ciiniyeetalli bi wodemmoyich tuniyaaneenaꞌone; diggoo aalloon ‘Diggoo, diggoone’ iyeete.

¹⁵ Ciigiiti mooyon boonoshi tuniitoyich yeelleteete? Ciroona yeelleyaaneenaꞌone; yeello amo gaatoona ariyaaneenaꞌone; ebich bareenaꞌo dihoommon dihemminaꞌone; boonoshin ta naxehooba qiti aallemminaꞌone” iye Doono Yeeri.

Doono Yeerichi Gommoochee Israꞌeeleenaꞌo Keyo

¹⁶ Doono Yeeri ishichiye: “ ‘Kaattooch neexebote; ciinishoo getote; batti batti gommonoo echebote; gaawe gommo aabi gaata, aroona hambote; ittoshi kashe kashemmoyich tuniyemmo ittoshine’ iyoye. “Tunebaani ittoshi ‘Aroona hamaachone’ iyote.

¹⁷ Tawoo ‘Shametee qaaroon waayebote’ iyaꞌa quyechinaꞌon ittoshi toommooch ukkiriihoye; tunebaani ittoshi waayeyaachone iyote.

¹⁸ Ebich aageteenaꞌote, waayebote; iiteenaꞌote, amo boonoshi toommooch shaggemmo gaata ciinote.

¹⁹ Showoocho waayebe; ta qaaroon waayo boonoshi qajjitoyich, ta sheeroonoo boonoshi duppitoyich, boonoshi gabeechi aafo tuneti gonde mooyon boonoshi toommooch deebemmo taane.

²⁰ Amoyich ixaano Sheebee showoochee, gaawe cinnechi shitto wohi showoochee, taach waahe? Micciibeeti ittoshi deejjoon deꞌaachemmo taane; bare ittoshi deejjoo taan emirikkaanoone” iye.

²¹ Ebich Doono Yeeri ishichiye: “Hini macceenaꞌo aafooch xugeenaꞌon geddemmo taane; niheenaꞌonaa bushiisheenaꞌona ikkittinoona tepheyemminaꞌone; giyeenaꞌonaa xibeenaꞌonoo qiti ciiremminaꞌone” iye.

Dambi-Waanee Koyecho Shuuroo

²² Doono Yeeri ishichiye: “Dambi-waani showoochee asheenaꞌo waa beetinaꞌone; ooge aagetoo showee daaroochee tiyii beetone;

²³ maꞌoonaa ginoonon boonoshi kishooch yechitinaꞌone; maacmanjeenaꞌonaa ariqqaalleenaꞌone; boonoshi qaaro baharoochoommon goohii beetone; haresheenaꞌon yebbetinaꞌone; Yerusaalemi katemoocho, koyooch qanniti ashichoommon neen kocha qannitinaꞌone” iye.

²⁴ Ebi woroon waayeto noone; no mochoo niretone; shiyaabeeti maacheen maaxoo mamoommon xuuxo noon yechitone.

²⁵ Etto goraadoon yechitone; bulli xaaꞌooch keqqoo beetone; ebich goyooch hammaahote; gommonoo shaꞌeyaahote.

²⁶ Ta asheenaꞌote, dookoon tahebote; tulloochoo gederebote; aalliyecho diqqoona ittoshi toommooch woyemmo bi tunetoyich, ikke mixxe bushoyich eeppeyoommon caame eefon eefote.

²⁷ Doono Yeeri, “Erimiyaaso, ta ashi daggooch neen boshechon tuniito taane; ebiyoo ne ariyemmonaa boonoshi gommon ne boshemmonoyichiye.

²⁸ Boonoshi bulliyona oogeti hukkechinaꞌone; oonooch hammii beetinaꞌone; gooshoonaa xuuroonoomminaꞌone; duube mooyon tuniiheete.

²⁹ Wonaafoona qaaqqoo hukkehe; tunebaani gondecho birewoochee woccii ufeyaanoone; ebiyoommon gonde mooyo ta asheenaꞌo waanee baraano bi tunetoyich, boonoshin birewoon ukkoommon ukkiya aayo gaacaalloone.

³⁰ Doono Yeeri boonoshin bi qajjitoyich Duppeti Birewoo getaa ceekkemminaꞌone” iye.