Erimiyaasi 52 - Kafa Linguistics Project

Yerusaalemi Happeyoo

¹ Sedeqiyaasi bi taatehooba, bi eeno hiyaa ikke natone. Yerusaalem beechii, aaraa ikke naton qeejjiye. Bi indee Hamuxaali getteehan; biyoo Libini katemee asho Erimiyaasi busheene.

² Sedeqiyaasi Yoyaqiimi tuniitoommi gonde mooyo bullin Doono Yeeri aafooch tuniihe.

³ Doono Yeerichi kaaro cufii cufii hammiye. Ebich Yerusaaleminaa Yihudee showoonooch beeti asheenaꞌon bi aafoochee yookkiye. Aroochee Sedeqiyaasi Baabloonee taatoo toommooch hukkoon tiijjiye.

⁴ Sedeqiyaasi taateti yiixiyinnee natooba, aashirinnee agenee aashirinnee qemooba, Baabloonee taatoo Nabukadinatsori bi ginee naayo bullina tookkii waaꞌi, Yerusaalemin kocha giichiye. Bi ginee naayinaꞌoo katemee guudoona showoon gutiyeete.

⁵ Ebina Sedeqiyaasi taateti aaraa ikkinnee natooch beddaahaa katemoo giicheehe.

⁶ Aroobee natooba, awuddinnee agenee yiixiyinnee qemooba, shaacoo katemooch bi kupphetoyich, are katemee asheenaꞌo maayemmi maayo amolla aallehe.

⁷ Katemee uxeroo gaakkeehe; Baabloonee ginee naayinaꞌo katemee guudoona boonoshi beetaa, taatoo bi ginee naayo bullina tookkii xumoona katemoochee muricciꞌi, gutte uxeree danooch beeti kelloona kechii, taatoochi bechee michi gaꞌoona besheꞌi Yoordaanoosi bamboo waan hammiye.

⁸ Tunebaani Baabloonee ginee naayinaꞌo taatoo Sedeqiyaasin yookkii dabbiꞌi, Yaariki katemee gaꞌooch beeti gaddoochaa yechiyeete. Bi ginee naayinaꞌo biin duppiichii shaceheete.

⁹ Aroochee taatoon yechiꞌi, Baabloonee taatoo waan Hamaatee showooch beeti Ribili katemooch deebiyeete. Aroochaa Nabukadinatsori bi toommooch nalliye.

¹⁰ Baabloonee taatoo, Sedeqiyaasi ciinnii beetaa, bi bushiisheenaꞌonaa Yihudee ukkireenaꞌo bullinon Ribilaa wuxiye;

¹¹ Sedeqiyaasichi aafoonoo qoqenee kichiyeete; sansalatoona cuchiꞌi Baabloonee showooch daammiyeete; bi qitimmooch beddaahaa cuyee kexooch geddiyeete.

Yeerichi Yaafee Kexo Happeyoo

¹² Baabloonee showooch Nabukadinatsori taateti aaraa yiixiyinnee natooba, uuchinnee agenee aashirinnee qemooba, Nabukadinatsorichi naayo, wottoo taatoo quyee naayinaꞌochi iraashoo tuneti Naabuzaridaani Yerusaalem waahe.

¹³ Aroochee Doono Yeerichi yaafee kexonaa taatee kexonon michiye. Yerusaalem beeti ogoogeenaꞌo kexo bullinaa bare kexo bullinon michiye.

¹⁴ Taatoo quyee naayinaꞌochi iraashoona tookkii beeti, Baabloonee ginee naayinaꞌo bulli Yerusaalemi guudoona beeti uxeroon happiyeete.

¹⁵ Aroochee taatoo quyee naayinaꞌochi iraashoo Naabuzaridaani, asheenaꞌo daggoochee oogeti girechinaꞌonaa Yerusaalem echeti asho bullinon, boonoshi showoon qajjiꞌi Baabloonee taatoo waan giddetinaꞌonaa echeti qoppechinaꞌonon keccii Baabloonee showooch daammiye.

¹⁶ Tunebaani hucigumbe ikkikke girechinaꞌon, woyinee goyoonaa bare goyoonooch beeti shuunoon boonoshi shuunemmoyich arooch echiihe.

¹⁷ Baabloonee asheenaꞌo Doono Yeerichi yaafee kexooch beeti gooshee giimbeenaꞌon, gedereebeeti gengee baatechi qiicee kotoon, gooshoochee shuuneeti, aaco kiceebeeti, ooge gamini goonoonoo tiichiꞌi, gooshoon Baabloonee showooch daammiyeete.

¹⁸ Shexxeenaꞌon, tulloo ucheebeeti maankeenaꞌon, qaaqqee buno yecheebeeti gomeenaꞌon, ixaanee saaneenaꞌon, yaafee kechi maddooch heechiibeeti gooshee qiico bullin daammiyeete.

¹⁹ Quppe saaneenaꞌon, qaaqqee buno yecheebeeti qiiceenaꞌon, gafeteenaꞌonaa qondeenaꞌonon, maqirajjeenaꞌonaa shaateenaꞌonon, uyee deejjoo ukkeebeeti koddeenaꞌon, aachoonaa birewoonoochee shuuneeti qiico bullin taatoo quyee naayinaꞌochi iraashoo daammiye.

²⁰ Doono Yeerichi yaafee kexoyich taatoo Solomooni shuuniiti gutte giimboochi gooshoon, aaco kiceebeeti, ooge gamini goonoochi gooshoonaa bi kotoyee dech beeti aaraa gutte gattee misilee gooshoonon daammiye. Ebi qiiceenaꞌochi gooshoo maggee naboona, machoona qoco hakkeyaanoone.

²¹ Ikke giimbee neexo aaraa shimitte hiroone. Bi guude gawo aaraa gutte hiroone; bi taggoo awudde yapheree matone; giimboo maacaa aahechone.

²² Ebi giimbee kallaachoo shuuneeto gooshoocheenane. Bi neexo uuche hiroone. Bi guudoona tookkaa gooshoochee shuuneeti romaanee aafoommi qecaaqeconaa dabboommi mooyona beetone; wotta ohe giimboo hajjaa shaahoone.

²³ Maachaa yixenaa shiritte romaanee aafoommi qecaaqeco beetone; dabboommi mooyochi guudoona beeti romaanee aafoommi mooyo balloone.

Yihudee Asheenaꞌo Baabloon Kecaa Hamo

²⁴ Taatoo quyee naayinaꞌochi iraashoo qeeshee guudo Seraayin, bi hillee qeeshee guudo Sofoniyaasinaa Yeerichi yaafee kechi kelloon quyeebeeti keejje iraasheenaꞌonon yechii daammiye.

²⁵ Katemoochee, ginee naayinaꞌochi iraashoo tuneti ikke uroon, aroochee bi daneti taatoochi shabaatte mikkirechinaꞌon, showee asheenaꞌon ginooch kaacciibeeti ginee iraashoochi koorechonaa showee asheenaꞌo tuneti shiche asheenaꞌonon daammiye.

²⁶ Taatoo quyee naayinaꞌochi iraashoo Naabuzaridaani Ribila beeti Baabloonee taatoo waan boonoshin yechii daammiye.

²⁷ Baabloonee taatoo Hamaatee showooch beeti Ribili katemoochaa boonoshin wuxiye. Ebiyoommon Yihudee asheenaꞌo boonoshi showoochee kecaa hammiyeete.

²⁸ Nabukadinatsori keccii daammiti macceenaꞌo eboshine: Bi taateti shabaattinnee natooch, keejje humaa hiyaa keejje Ayihudeenaꞌon,

²⁹ bi taateti aaraa shimittinnee natooch, shimitte ballaa shaashaa gutte asheenaꞌon, Yerusaalemee keccii daammiye.

³⁰ Nabukadinatsori taateti hiyaa keejjinnee natooch, taatoo quyee naayinaꞌochi iraashoo Naabuzaridaani Ayihudeenaꞌoochee shabaatte ballaa aabbaa uuche ashoon keccii daammiye. Kecee hammiti asheenaꞌo bulla awudde humaa shiritte balleenaꞌone.

³¹ Yihudee taatoo Yoyakiini kecceti shaashaa shabaattinnee natooba, aaraa guttinnee agenee hiyaa uuchinnee qemooba, Baabloonee taatoo Ebil Merodaaki bi taateti batti batti natooch, ariqqeꞌi Yihudee taatoo Yoyakiinin cuyee kexoochee kichiye.

³² Ebil Merodaaki Yoyakiinin shunoona yibbaatiihe; biichoommon kecee hammiꞌi, Baabloonee showooch beeti taateenaꞌo bullichoyee beshe oogee xaaꞌoon biich immiye.

³³ Yoyakiini cuyee kechi tahoon shaddiye. Aroochee Yoyakiini bi kashee yemeeno bulliich taatoochi madoochee maa beehe.

³⁴ Kashoona bi beeti yemeeno bulliich, Baabloonee taatoo biich qaawiibeeti mooyon qemi qemona immii beehe.