Erimiyaasi 51 - Kafa Linguistics Project

¹ Doono Yeeri ishichiye: “Baabloonee showoonaa arooch beetinaꞌonochi toommooch aalliibeeti yongoon deejjemmo taane.

² Biin boonoshi woqqemmoyich woqqechinaꞌon Baabloonee showooch deejjemmo taane; boonoshiyoo bi showoon shokkoon echiyemminaꞌone; bi xuuxee aabooba bi guudo bulliichaa biin kochemminaꞌone.

³ Shangecho bi maꞌoon ciixximmi wottoon, bi koyooba taheebeeti tahoon bi tahemmi wottoon biin tooꞌiyaahote; bi gurimaasheenaꞌoyich ariqqeyaahote; bi ginee naayinaꞌo bullin aalliibote.

⁴ Boonoshiyoo bi gaddoochaa guureeree, bi gommoochaanoo mayeree dihemminaꞌone.

⁵ Boonoshi showoo Israꞌeelee Yaafoo toommooch xukkeeti xuꞌoona ceennito bi tunetaanoona, Israꞌeeleenaꞌo tunebeeta Yihudee asheenaꞌo boonoshi Nuggishoo Beshe Mawe Doono Yeeri boonoshin dufaanoone.

⁶ “Baablooni daggoochee keyi aallebote; ittoshi ikkikkoona ittoshi kashoon wodiibote; bi xuꞌee naboona aalleyaahote; hini Doono Yeerichi nichoon gaacci aaboone; bi kaalloon biich wochemmone.

⁷ Baablooni showoo bulli mashemmoyich tuniiti, Doono Yeeri ta kishooch beeti aachee xoofoone; aageteenaꞌo bi uyoochee uchitinaꞌone; ebich geyetinaꞌone.

⁸ Baablooni diqqoona hollii tiishetone; biich eefote; diqqich bi wodemmo gaata, bi mayoyich attoon daambote. Bare asheenaꞌoo

⁹ ‘Baabloonin wodiiya qiiccehone; tunebaani aroo wodoon hakkaanoone; bi toommooch nalleeti nalloo shimaayooch bi shaggitoyich, gumooch beddaahaanoo damba bi tiyitoyich, biin qayote; no ikkikkoona no showi showooch wottebone’ gettemminaꞌone.

¹⁰ “Israꞌeeleenaꞌoo ‘Doono Yeeri nooch bi nallitoyich ittoshi waataa, Tsiyoonaa no Nuggishoo Doono Yeerichi shuunoon getone’ gettemminaꞌone.

¹¹ “Ittoshi shangeenaꞌon hachibote; ittoshi gaacheenaꞌonoo qanniibote; Doono Yeerichi gaboo Baabloonin aalliyooch bi tunetoyich, Meedee taateenaꞌochi mulloon shuurikkitone; ebiyoo Doono Yeeri bi yaafee kechi nichoon kichemmo bi tunetoyichiye.

¹² Baablooni uxeroon gaakkii gimoyich malletoon tiijjibote; kupphii quyebote; kellechon neechibote; ottii koyechinaꞌon qanniibote; ebiyoo Doono Yeeri Baabloon beetinaꞌochon bi gettiton, gabiꞌi bi tuniitoyichiye.

¹³ Meeti aachi gashooch kotetocho! Gaannoon ciqqinnetocho! Ne aallemmi aaboo, ne ciiro shaggitone.

¹⁴ Neen boonoshi kochemmoyich, meeti gechoommi asheenaꞌon deebemmo taane; boonoshiyoo ne toommooch wudee danee cookoon cookemminaꞌone” iꞌi, Beshe Mawe Doono Yeeri bi shigoona wogetone.

¹⁵ Showoon bi hakkoona hallito, bi ariyoona showee tuggeenaꞌon manjiito, bi shalligoona shimaayoon yaggito, biine.

¹⁶ Bi qaaroon bi waayiimmona aacinaꞌo gumoyee dambaa gugiyeete; biyoo showee tuggoochee qubo qubemmoyich tuniihe; amiyo dihiyooboo xeeyoon xeejjiihe; yongoonoo bi kicee xaaꞌoochee kichiye.

¹⁷ Asho bulli mullaalloonaa tuushoonane; aachee ukkecho bulli bi shuuneti misilee naboona yeelletone; bi shuuneeti misilo kootoone; kasho biich aalloone.

¹⁸ Eboshi gaacaalleenaꞌone; cooqqiree shuuneenaꞌone; boonoshi naxeyemmi aabooba aallemminaꞌone.

¹⁹ Yaaqobichi Nuggishoo boonoshiyoommo toonoone; aroo bulli mooyon hallitone; Israꞌeeliyoo biich bariti maccoone; bi shigoo Beshe Mawe Doono Yeerine.

²⁰ Doono Yeeri ishichiye: “Baabloono, ne, ta modooshoo, ta ginee qiico neene; neenna aageteenaꞌon tiichoye; neenna taatittineenaꞌon aalliihoye;

²¹ neenna hareshoonaa hareshechinaꞌonon tiichoye; neenna gaarinaa gaarin gashee beetonon tiichoye;

²² neenna anaamonaa maacheenon tiichoye; neenna geenoonaa bushoonon tiichoye; neenna gurimaashoonaa gidiideenon tiichoye;

²³ neenna qiddoonaa bi gijjoonon tiichoye; neenna goyechonaa bi gattoonon tiichoye; neenna ukkiroonaa iraashoonon tiichoye” iye.

²⁴ Doono Yeeri ishichiye: “Tsiyooni toommooch boonoshi tuniiti gondee kaalloon Baablooninaa Kalidee showooch beetinaꞌo bullinochi toommooch, ittoshi ciini beetaa ittoshi aafoochaa wochemmo taane” iye Doono Yeeri.

²⁵ “Showoo bullin aalliibeeti guudoocho! Ta ne toommooch tiyeto taane” iye Doono Yeeri. “Ne toommooch ta mochoon tiijjemmo taane; xaqqee guudinaꞌo toommoochee neen gederikkemmo taane; micciti guudon neen tuniyemmo taane.

²⁶ Guummo tunemmi xaqqoonaa hecoo tunemmi xaqqoona ne waanee daneyaachemmone; bulli aabooch shokkoon echemmo neene” iye Doono Yeeri.

²⁷ Koyee malletoon damba tiijjibote; aageteenaꞌo daggooch tiroon hugote; biin koyoyich aageteenaꞌonoo qanniibote; Araraatichi, Miinichi, Ashikenaazichi taatee showoonoo bi toommooch kicibote; ginee iraashoonoo bi toommooch iraashiibote; gechoommon shiwureebeeti haresheenaꞌonoo bi toommooch daachiibote.

²⁸ Meedee taateenaꞌo, boonoshi iraasheenaꞌonaa ukkireenaꞌona, boonoshi kishooch beeti showoo bulliyoo, biin boonoshi kochemmoyich qanniibote.

²⁹ Baabloonin koniyoona koteyaachemmi shokkoon tuniyoyich, Doono Yeeri gabito Baablooni toommooch ceennemmo bi tunetoyich, showoo shuuri qewemmone.

³⁰ Baabloonee ginee naayinaꞌo koyoon qajjitinaꞌone; boonoshi mishigooch kotetinaꞌone; boonoshi hakkoo niretone; maacheen shaahitinaꞌone; bi kexinaꞌonoo qaaqqoo maatone. Bi tuggeenaꞌo kuxetinaꞌone.

³¹ Katemoo okkee hach beddaahaa bi yechoon Baabloonee taatoyich getoyich, ikke woccecho bare woccechona, ikke wocheyecho bare wocheyechona danoyich woccemmone.

³² Aachi kimo yechetone; dilaaloo miccitone; ginee naayinaꞌo keqqoona qewetinaꞌone.

³³ Israꞌeelee Nuggishoo Beshe Mawe Doono Yeeri, “Baablooni bi xuuxee aabooba maayo bucheebeeti godoommone; bi qeccee gooroo kaate shaggemmone” itone.

^34-35 Tsiyoon beetinaꞌo: “Baabloonee taatoo Nabukadinatsori noon maahe; noon yiikkehe; shokkaache qiicoommon noon tuniihe; dareboochoommon noon qooxxiye; shaawi no maayoona bi eriboon ceechiye; aroocheenoo noon maach aapphiye. No toommooch, no xibeenaꞌo toommoochoo tuneti xuꞌo Baablooni toommooch tunebe” gettemminaꞌone. Yerusaalemi beetinaꞌo: “No damoo Kalidee asheenaꞌo toommooch tunebe” gettemminaꞌone.

³⁶ Ebich Doono Yeeri ishichiye: “Ta ittoshi qoodoon taggemmo taane; ittoshi nichoonoo gaaccemmo taane; bi baharoon shuuꞌiyemmo taane; bi aachi xuupheenaꞌo shuuqqemmoyichoo tuniyemmo taane.

³⁷ Baablooni xaqqee gutoo boqqelleenaꞌo kuufaaree xaaꞌoon tunemmone; ciigeyemmone; wuche, getteyemmone; arooch kotemmo daneyaachemmone.

³⁸ Ikkittinoona daahereenaꞌochoommon ciddemminaꞌone; more daahereenaꞌochoommonoo gigemminaꞌone.

³⁹ Boonoshich bi qeecee boonoshi emiremmoyich, bulli aabee tokketoon boonoshi tokketemmoyich, ciroonoo boonoshi tiyaachemmoyich, uyee gifiroon boonoshich qanniyemmo taane; boonoshin mashiyemmo taane, iye Doono Yeeri.

⁴⁰ Bagee bushiisheenaꞌochoommon, bagee baaddeenaꞌonaa emmishee baaddeenaꞌonochoommon, guuree xaaꞌooch boonoshin deebemmo taane.

⁴¹ “Sheshaaki aabichiꞌi keccehe; showoo bulli yebeneebeeto aabichii yechehe! Baablooni aagetoo bullichi daggooch aabichiꞌi ciigeehe!

⁴² Baharo Baablooni toommona woccemmone; aachi aayonoo qoochemmone.

⁴³ Bi katemeenaꞌoo wuche getteetinaꞌo, shuuꞌi showoonaa barahoona, asho arooch koteyaano, wottoo aroona koniyoona besheyaani showoon tunemmone.

⁴⁴ Baabloonee nuggishoo Beelin naxemmo taane; bi qooxxiton aaphiyemmo taane; ebiyee bekk aageteenaꞌo arooch oriheyaachemminaꞌone. Baablooni xaqqee uxeroo dihemmone.

⁴⁵ “Ta asheenaꞌote, bi daggoochee keyote; Doono Yeerichi kaaree shiixxoochee ittoshi qelloon wodiibote.

⁴⁶ Showee toommooch hukkoo timicho, ikke taatoon bare taatoo koyicho, ikke natooch ikke yibbaatoo, bi gubbi natoochoo bare yibbaatoo waayeyemmo bi tunetoyich, showee toommooch yibbaateebeeti yibbaatoona shattaahote; ittoshi mulloo qitaaye.

⁴⁷ Ebich shuuneeti Baabloonee shahalleenaꞌon ta naxemmi yemeeno waa beetone; bi showoo bulli yeellemmone; koyaa qititinaꞌo bi daggooch dihemminaꞌone.

⁴⁸ Aalliyechinaꞌo biin koyoyich dambi-waanee woyemminaꞌo boonoshi tunetoyich, shimaayoonaa showoona, bi daggooch beeto bulli Baablooni toommooch ililemminaꞌone” iye Doono Yeeri.

⁴⁹ “Baablooni, showoo bulliichaa guureetinaꞌon dichitine; Israꞌeeleenaꞌoochee guureetinaꞌochi naboona Baablooni dihemmine” iye.

⁵⁰ Goraadoochee muriccitinaꞌote, hambote; neexeyaahote; wohoochaa Doono Yeerin gabibote; Yerusaaleminoo ittoshi mulloona gabibote.

⁵¹ Naagoon no waayetoyich cooneeto noone; dallaawe asheenaꞌo Doono Yeerichi yaafee kechi yaafe xaaꞌooch boonoshi giyitoyich, yeello no aafoon qeritone.

⁵² Ebich Doono Yeeri ishichiye: “Shuuneeti bi misilo naxeyemmi yemeeno woyemmone. Bi showoo bulliichaa mayetinaꞌo gaashillemminaꞌone.

⁵³ Baablooni shimaayooch bi kechetaanona, bi mishigoon bi manjiitaanona aalliyechinaꞌon deejjemmo taane” iye Doono Yeeri.

⁵⁴ Baabloonee showoochee cookoo, Kalidee asheenaꞌo showoochee ooge aallee qaaro waayeehe.

⁵⁵ Ebiyoo Doono Yeeri Baabloonin bi aalliitoyich, ooge bi qaaroonoo bi haweccaayitoyichiye. Boonoshi etteenaꞌochi goohoo ooge aachi qaaroommone; boonoshi qaaro shillii beetone.

⁵⁶ Aalliyecho Baablooni toommooch bi waatoyich, bi ginee naayinaꞌo kecceheete; boonoshi maꞌoo tiishehe; ebiyoo Doono Yeeri nichoon kichiibeeti, tatoonoo qocciibeeti Nuggishoo bi tunetoyichiye.

⁵⁷ “Bi woraaferasheenaꞌonaa ariyechi bi asheenaꞌonon, bi ukkireenaꞌonaa bi iraasheenaꞌonon, bi ginee iraasheenaꞌonoo mashiyemmo taane; bulli aabee tokketoon tokketemminaꞌone; ciroonoo tiyaachemminaꞌone” iye bi shigo Beshe Mawe Doono Yeeri getteebeeti Taatoo.

⁵⁸ Beshe Mawe Doono Yeeri ishichiye: “Baabloonichi tagge uxeroo happeyemmone; bi genje kelleenaꞌo qaaqqoona miccemminaꞌone, asheenaꞌochi aayo duubemmone; aageteenaꞌochi shuunoo qaaqqooch tunemmone” iye.

Erimiyaasi Baabloon Daachiiti Wocho

⁵⁹ Sedeqiyaasi taateti awuddinnee natooch, Mahisiyi bushoochi bushoo, Neraayichi bushoo, taatoochi katini naayo Seraayi, Yihudee taatoo Sedeqiyaasina tookkii Baabloonee showooch bi hamiyooba keemechi Erimiyaasi Seriyaahina wochoon daachiihe.

⁶⁰ Baablooni toommooch woyemmi gonde mooyo bullin, Baabloonicho kooreeti qaaro bullin macaafooch kooriye.

⁶¹ Biyoo Seraayich ishichiye: “Baabloonee showooch ne shagiyooba ebi qaaro bullin ne qaaroon oogichiree shemmebe.

⁶² Aroochee ‘Doono Yeero, hini xaaꞌoon aalliyemmo ne tunoon, hini xaaꞌeechon ashoochee tiijji gijjooch beddaahaa koniyoona koteyaachemmo, bulli aabooch shokkoon echemmo bi tunoon getteto neene’ gete.

⁶³ Hini macaafoon shemmaa ne ciichitoyee gubb, xaqqooch cuyiree Efiraaxisi aacooch dufe.

⁶⁴ ‘Doono Yeeri deebemmi gonde mooyoochee tiyitona, ebiyoommon Baablooni dech duukkemmone; tiyaachemmone’ gete” iye. Erimiyaasi gettiti qaaro ebi wottoone.